ລັດຖະມົນຕີ ປທສ ໂອ້ລົມກອງປະຊຸມ ຄະນະພັກຮາກຖານ ອີທີແອລ


...

19.09.2019 9:12     

   ສະຫາຍ ທັນສະໄໝ ກົມມະສິດ ເລຂາຄະນະພັກກະຊວງ ລັດຖະມົນຕີກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ໃຫ້ກຽດໂອ້ລົມ ຕໍ່ກອງປະຊຸມໃຫຍ່ຄັ້ງທີ II ຂອງຄະນະພັກຮາກຖານບໍລິສັດ ອີທີແອລ ຈໍາກັດ (ອທອ) ໃນວັນທີ 18 ກັນຍານີ້ ທີ່ຫ້ອງປະຊຸມໃຫຍ່ສໍານັກງານ ອທອ ໂດຍການເປັນປະທານຂອງ ສະຫາຍ ສຸດໃຈ ລໍລອນສີ ຄະນະພັກກະຊວງ ປທສ ເລຂາຄະນະພັກຮາກຖານ ອທອ ມີບັນດາເລຂາໜ່ວຍພັກ ແລະ ຄະນະພັກຮາກຖານທີ່ຂຶ້ນກັບ ອົງຄະນະພັກກະຊວງ ປທສ ແລະ ຂຶ້ນກັບຮາກຖານພັກ ອທອ ພ້ອມດ້ວຍແຂກທີ່ຖືກເຊີນເຂົ້າຮ່ວມ.
ສະຫາຍ ສຸດໃຈ ລໍລອນ ສີ ໄດ້ຜ່ານບົດສະຫຼຸບລາຍ ງານການເມືອງແຜນການ ເຄື່ອນໄຫວໃນໄລຍະ 5 ປີ ຜ່ານມາ ແລະ ທິດທາງແຜນ ການໃນຕໍ່ໜ້າ ຊຶ່ງໃນໄລຍະຜ່ານມາ ຄະນະບໍລິຫານງານ, ສະມາຊິກພັກ ອທອ ໄດ້ສໍາເລັດໜ້າທີ່ວຽກງານໃນຫຼາຍໆດ້ານທີ່ພົ້ນເດັ່ນເຊັ່ນ: ວຽກງານທາງດ້ານການບໍລິການຄຸ້ມຄອງ, ດ້ານເສດຖະກິດ ແລະ ດ້ານເຕັກນິກ ທີ່ສາມາດຕອບສະໜອງ ແລະ ອໍານວຍຄວາມສະດວກ ໃຫ້ແກ່ພາກສ່ວນທີ່ກ່ຽວຂ້ອງ ໃນການປະກອບສ່ວນເຂົ້າໃນການເຄື່ອນໄຫວວຽກງານລວມຂອງບໍລິສັດ ກໍຄືພາກລັດ ແລະ ເອກະຊົນ. ການຊີ້ນໍາ-ນໍາພາ ຂອງຄະນະພັກ ອທອ ສາມາດປະຕິບັດໜ້າທີ່ວຽກງານວິຊາສະເພາະ ທີ່ຖືກມອບໝາຍດ້ວຍຄວາມຕັ້ງໜ້າ ແລະ ມີຄວາມຮັບຜິດຊອບສູງ. ສຶກສາອົບຮົມທາງດ້ານການເມືອງ-ແນວຄິດ ຂອງສະ ມາຊິກພັກ-ພະນັກງານ ຢ່າງເປັນປະຈໍາ ເພື່ອໃຫ້ພາຍໃນມີຄວາມສະຫງົບ, ມີຄວາມອຸ່ນອ່ຽນທຸ່ນທ່ຽງ ແລະ ເຊື່ອໝັ້ນຕໍ່ການນໍາພາຂອງພັກ. ຊຸກຍູ້ອົງການຈັດຕັ້ງມະຫາຊົນ ເຄື່ອນໄຫວຕາມພາລະບົດບາດ ກໍຄືກົດລະບຽບຂອງບໍລິສັດ ແລະ ກົດລະບຽບຂອງລັດຢ່າງເຂັ້ມງວດ ພ້ອມທັງ ກໍ່ສ້າງພັກ-ພະນັກງານ ໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ແລະ ສາມາດປະຕິບັດໜ້າທີ່ ທີ່ການຈັດຕັ້ງພັກ-ລັດ ມອບໝາຍໃຫ້ສໍາເລັດຕາມທິດທາງທີ່ວາງໄວ້.
ໃນຕອນທ້າຍ, ສະຫາຍ ທັນສະໄໝ ກົມມະສິດ ໄດ້ສະແດງຄວາມຍ້ອງຍໍ, ຊົມເຊີຍຕໍ່ຜົນງານ ກໍຄືຜົນສໍາເລັດທີ່ຍາດມາໄດ້ ພ້ອມເນັ້ນໃຫ້ ຄະນະພັກຮາກຖານ ອທອ ເອົາໃຈໃສ່ຕື່ມວຽກງານສຶກສາອົບຮົມການເມືອງ-ແນວຄິດ ຂອງສະມາຊິກພັກ-ພະນັກງານ ຢ່າງເປັນລະບົບ ແລະ ຕໍ່ເນື່ອງ, ຊີ້ນໍາ-ນໍາພາ, ຕິດຕາມກວດກາການເຄື່ອນໄຫວ ຈັດຕັ້ງ-ປະຕິບັດວຽກງານ ຂອງພະນັກງານໃຫ້ສໍາເລັດຕາມທິດທາງ, ແຜນການທີ່ວາງໄວ້. ສືບຕໍ່ຄົ້ນຄວ້າ, ປັບປຸງການຈັດຕັ້ງລັດ ໃຫ້ມີຄວາມກະທັດຮັດ, ຊຸກຍູ້ອົງການຈັດຕັ້ງມະຫາຊົນ ໃຫ້ມີຄວາມເຂັ້ມແຂງຂຶ້ນກວ່າເກົ່າ ສາມາດເປັນກໍາລັງແຮງຂອງພັກ-ລັດ ໃນການຂັບເຄື່ອນວຽກງານ ໃຫ້ມີປະສິດທິພາບສູງ. ເອົາໃຈໃສ່ປັບປຸງ, ກໍ່ສ້າງຂະຫຍາຍພັກ ໃຫ້ໄດ້ທາງດ້ານປະລິມານ ແລະ ຄຸນນະພາບ ເພື່ອຮັບປະກັນໃຫ້ພາຍໃນພັກ ມີຄວາມປອດໃສ, ເຂັ້ມແຂງ, ໜັກແໜ້ນ ຄຽງຄູ່ກັບການ ບໍາລຸງກໍ່ສ້າງພະນັກງານ ທັງ 3 ລະດັບໄປພ້ອມໆກັນຄື: ພະນັກງານນໍາພາ-ຄຸ້ມຄອງ, ພະນັກງານສືບທອດ ແລະ ພະນັກງານວິຊາການ. ນອກນີ້, ທ່ານໄດ້ເນັ້ນໜັກ ໃຫ້ເພີ່ມທະວີຄວາມເອົາໃຈໃສ່ທາງດ້ານ ວຽກງານການສະກັດກັ້ນການເຄື່ອນໄຫວຂອງກຸ່ມຄົນບໍ່ດີ ເພື່ອຮັບປະກັນຄວາມສະຫງົບປອດໄພພາຍໃນ ກໍຄືເອົາໃຈໃສ່ວຽກປ້ອງກັນພະ ນັກງານ ໂດຍການຕິດຕາມ, ກວດກາ ແລະ ເກັບກໍາການເຄື່ອນໄຫວຂອງສະມາຊິກພັກ-ພະນັກງານເປັນປະຈໍາ ເພື່ອແກ້ໄຂ ແລະ ບໍ່ໃຫ້ເກີດປະກົດການຫຍໍ້ທໍ້ຂຶ້ນພາຍໃນບໍລິສັດ.