ກອງປະຊຸມໃຫຍ່ ຜູ້ແທນອົງຄະນະພັກ ເມືອງຕະໂອ້ຍ ຄັ້ງທີ XII


...

19.09.2019 9:17     

   ໃນວັນທີ 18 ກັນຍານີ້ ເມືອງຕະໂອ້ຍ ແຂວງສາ-ລະວັນ ໄດ້ເປີດກອງປະຊຸມໃຫຍ່ຜູ້ແທນອົງ-ຄະນະພັກເມືອງຂຶ້ນຢ່າງເປັນທາງການ ຢູ່ທີ່ສະໂມສອນເມືອງ ໂດຍການເປັນປະທານຂອງ ສະຫາຍ ບຸນເນື້ອ ຫຼອງຄຳໄຕ ຮັກສາການເລຂາພັກເມືອງ ເຈົ້້າເມືອງໆຕະໂອ້ຍ ເປັນກຽດເຂົ້າຮ່ວມຂອງ ສະຫາຍ ສີສຸວັນ ວົງຈອມສີ ກຳມະການສູນກາງພັກ ເລ-ຂາພັກແຂວງ ເຈົ້າແຂວງໆສາລະວັນ,ສະຫາຍ ບຸນທຽມ ແກ້ວໄຊຍະວົງ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ, ມີຄະນະປະຈຳພັກເມືອງ ກຳມະການພັກເມືອງ, ພະນັກງານອາວຸໂສບຳນານ ອະດີດການນຳຂອງເມືອງ ພ້ອມດ້ວຍແຂກຖືກເຊີນເຂົ້າຮ່ວມ.
ສະຫາຍ ບຸນເນື້ອ ຫຼອງຄຳໄຕ ໄດ້ກ່າວວ່າ: ກອງປະຊຸມຄັ້ງນີ້ ເຕັມໄປດ້ວຍບັນຍາກາດທີ່ຟົດຟື້ນ ແລະ ມີຄວາມໝາຍຄວາມສຳຄັນ ເພື່ອພ້ອມກັນທົບທວນຕີລາຄາຄືນຜົນງານ ແລະໄຊຊະນະທີ່ຍາດມາໄດ້ ເພື່ອເສີມຂະຫຍາຍດ້ານຕັ້ງໜ້າ, ປັບປຸງແກ້ໄຂຈຸດອ່ອນຂໍ້ຄົງຄ້າງ ແລະ ຖອດຖອນບົດຮຽນໃນການຈັດຕັ້ງປະຕິບັດແນວທາງນະໂຍບາຍຂອງພັກ, ມະຕິກອງປະຊຸມໃຫຍ່ຂອງອົງຄະນະພັກເມືອງໃນໄລຍະ 5 ປີ ຜ່ານມາ ແລະ ທິດທາງແຜນການຕໍ່ໜ້າ ກໍຄືທິດທາງແຜນພັດທະນາເສດຖະກິດສັງຄົມຂອງເມືອງ ເພື່ອເຮັດໃຫ້ເມືອງຕະໂອ້ຍຫຼຸດພົ້ນອອກຈາກຄວາມທຸກຍາກ ແລະ ມີການພັດທະນາຂຶ້ນເປັນກ້າວໆ.
ນອກ-ຈາກນັ້ນໃນກອງປະ-ຊຸມ ຍັງໄດ້ຜ່ານຮ່າງບົດລາຍງານການ-ເມືອງຂອງຄະ -ນະບໍລິ-ຫານງານພັກເມືອງ ສະໄໝທີ XI, ຮ່າງບົດລາຍງານການຈັດຕັ້ງປະຕິບັດແຜນພັດທະນາເສດຖະກິດສັງຄົມຂອງເມືອງ 5 ປີຜ່ານມາ ແລະ ທິດທາງແຜນການຕໍ່ໜ້າ. ພ້ອມນັ້ນຕາງໜ້າແຕ່ລະຂົງເຂດວຽກງານອ້ອມຂ້າງເມືອງຍັງຈະໄດ້ປະກອບຄຳຄິດເຫັນ ແລະ ໃຊ້ສິດປະຊາທິປະໄຕ ປ່ອນບັດເລືອຕັ້ງເອົາຄະນະບໍລິຫານງານພັກເມືອງຕະໂອ້ຍ ຊຸດທີ XII, ປ່ອນບັດເອົາຜູ້ແທນສົມບູນ, ສຳຮອງ ໄປຮ່ວມກອງປະຊຸມໃຫຍ່ ຄັ້ງທີ 9 ຂອງອົງຄະນະພັກແຂວງສາລະວັນຕື່ມອີກ.