ກອງປະຊຸມໃຫຍ່ ຄັ້ງທີ XII ອົງຄະນະພັກ ເມືອງຊຳເໜືອ


...

23.09.2019 10:08     

   ກອງປະຊຸມໃຫຍ່ຄັ້ງທີ XII ຂອງອົງຄະນະພັກເມືອງຊຳເໜືອແຂວງຫົວພັນ ໄດ້ເປີດຂຶ້ນຢ່າງເປັນທາງການ ໃນວັນທີ 19 ກັນຍາ ຜ່ານມາ ທີ່ສະໂມສອນແຂວງ ໂດຍພາຍໃຕ້ການເປັນປະທານຂອງສະຫາຍ ພຸດພັນ ແກ້ວວົງໄຊ ກຳມະການພັກແຂວງເລຂາຄະນະບໍລິຫານງານພັກເມືອງເຈົ້າເມືອງຊຳເໜືອ ເປັນກຽດເຂົ້າຮ່ວມຂອງສະຫາຍ ວັນໄຊ ແພງຊຸມມາ ກຳມະການສູນກາງພັກ ເລຂາຄະນະບໍລິຫານງານພັກແຂວງເຈົ້າແຂວງຫົວ ພັນ, ມີບັນດາສະຫາຍຮອງເລຂາຄະນະບໍລິຫານງານພັກແຂວງ, ຄະນະປະຈຳພັກແຂວງ, ຜູ້ຕາງໜ້າຄະນະຈັດຕັ້ງສູນກາງພັກ, ຫ້ອງວ່າການສູນກາງພັກ, ສະຫາຍໃນຄະນະປະຈຳພັກເມືອງ, ກຳມະການພັກເມືອງຊຳເໜືອ, ເລຂາຄະນະບໍລິຫານງານພັກເມືອງ 9 ເມືອງທົ່ວແຂວງຫົວພັນ,ເລຂາຄະນະພັກບ້ານຂອງເມືອງຊຳເໜືອເຂົ້າຮ່ວມທັງໝົດ 200 ກວ່າສະຫາຍ.ໃນນີ້ມີຜູ້ແທນສົມບູນທີ່ເປັນຕົວແທນແກ່ສະມາຊິກພັກ ແລະ ປະຊາຊົນບັນດາເຜົ່າໃນທົ່ວເມືອງຊຳເໜືອເຂົ້າຮ່ວມ 163 ສະຫາຍ, ຍິງ 17 ສະຫາຍ.
ກອງປະຊຸມໄດ້ສະຫຼຸບຕີລາຄາຄືນສະພາບການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງອົງຄະນະພັກເມືອງຊຳເໜືອ ໃນ 5 ປີຜ່ານມາ ( 2014-2019 ) ໃນນີ້ໄດ້ຖືເອົາວຽກງານປ້ອງກັນຊາດ-ປ້ອງກັນຄວາມສະຫງົບເປັນວຽກງານທີ່ສໍາຄັນສາມາດເຮັດໃຫ້ທົ່ວເມືອງມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ, ຫັນເອົາພະນັກງານລົງກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍ ໂຄສະນາເຜີຍແຜ່ແນວທາງປ້ອງກັນຊາດ - ປ້ອງກັນຄວາມສະຫງົບທົ່ວປວງຊົນຮອບດ້ານໃຫ້ແກ່ພະນັກງານສະມາຊິກພັກ, ພະນັກງານລັດຖະກອນ ແລະ ພໍ່ແມ່ປະຊາຊົນບັນດາເຜົ່າໄດ້ຢ່າງທົ່ວເຖິງ; ການພັດທະນາເສດຖະກິດ ແລະ ແກ້ໄຂຄວາມ ທຸກຍາກໄດ້ສຸມໃສ່ຊີ້ນຳ - ນຳພາການຈັດຕັ້ງປະຕິບັດຕາມທິດທາງ ແລະ ຄາດໝາຍທີ່ມະຕິກອງປະຊຸມໃຫຍ່ ຄັ້ງທີ XI ໄດ້ຮັບຮອງ ໂດຍສຸມໃສ່ສົ່ງເສີມການລົງທຶນຂອງນັກທຸລະກິດທັງພາຍໃນ ແລະ ຕ່າງປະເທດ, ເອົາໃຈໃສ່ກໍ່ສ້າງພື້ນຖານໂຄງ ລ່າງ ພ້ອມທັງຂຸດຄົ້ນນຳໃຊ້ທ່າແຮງທີ່ມີຂອງແຕ່ລະທ້ອງ ຖິ່ນ ເພື່ອປະກອບສ່ວນເຂົ້າໃນການພັດທະນາເສດຖະກິດ -ສັງຄົມ ກໍຄືການພັດທະນາແກ້ໄຂຊີວິດການເປັນຢູ່ຂອງປະຊາຊົນເມືອງຊຳເໜືອໃຫ້ນັບມື້ດີຂຶ້ນ.
ມາຮອດປັດຈຸບັນລວມຍອດຜະລິດຕະພັນພາຍໃນ ( GDP ) ທົ່ວເມືອງບັນລຸ 2.114 ຕື້ກວ່າກີບ. ໃນນີ້ກະສິກຳກວມ 43,60%, ອຸດສາຫະກຳ - ຫັດຖະກຳ 14,07% ແລະ ການຄ້າ - ການບໍລິການ ກວມ 42,33% ຮອດປັດ ຈຸບັນສະເລ່ຍລາຍຮັບໃສ່ພົນລະເມືອງຜູ້ໜຶ່ງໄດ້ 7 ລ້ານກວ່າກີບຕໍ່ຄົນຕໍ່ປີ. ນອກຈາກນີ້ຍັງສຸມໃສ່ນຳພາ - ຊີ້ນຳການພັດທະນາຕາມຂະແໜງການ, ຄຸ້ມຄອງຕິດຕາມບັນດາວິສາ ຫະກິດທີ່ກຳລັງດຳເນີນການ ເຄື່ອນໄຫວໃຫ້ຖືກຕ້ອງຕາມລະບຽບກົດໝາຍ. ບັນດາພື້ນຖານໂຄງລ່າງຄ່ອຍໆໄດ້ຮັບການພັດທະນາ ແລະ ຍົກລະດັບເປັນກ້າວໆມາເປັນຕົ້ນແມ່ນການປົກປັກຮັກສາເສັ້ນທາງຫຼວງແຫ່ງຊາດ, ທາງຊົນນະບົດ, ການຄຸ້ມຄອງໂຄງການກໍ່ສ້າງ ແລະ ສ້ອມແປງເສັ້ນທາງທີ່ມີແລ້ວ ຍົກລະດັບເສັ້ນທາງດິນແດງເປັນເສັ້ນທາງປູແຮ່. ປັດຈຸບັນທົ່ວເມືອງຊຳເໜືອມີເສັ້ນທາງເຂົ້າເຖິງທຸກບ້ານ, ບ້ານທີ່ມີເສັ້ນທາງທຽວໄດ້ສອງລະດູມີ 68 ບ້ານກວມເອົາ 61,82%; ທົ່ວເມືອງມີຕາຂ່າຍໄຟຟ້າເຂົ້າເຖິງ 107 ບ້ານ ແລະ ມີຄົວເຮືອນຊົມໃຊ້ໄຟຟ້າຕາຂ່າຍກວມ 95,82% ສຸມໃສ່ຂຸດຄົ້ນທຸກແຫຼ່ງລາຍຮັບເຂົ້າງົບປະມານບັນລຸຕາມຄາດໝາຍ ພ້ອມທັງຄຸ້ມຄອງລາຍຈ່າຍໃຫ້ຖືກຕ້ອງຕາມລະ ບຽບການ; ການພັດທະນາວຽກງານວັດທະນະທຳ - ສັງຄົມໄດ້ເອົາໃຈໃສ່ຍົກລະດັບຄວາມ ສາມາດຂອງຄູ-ອາຈານ ແລະ ສຸມໃສ່ການຮຽນ - ການສອນ ຊັ້ນມຕົ້ນບຳລຸງສາມາດປະ ກາດເປັນເມືອງຈົບຊັ້ນປະຖົມບຳລຸງໃນທົ່ວເມືອງໄດ້, ຂະ ຫຍາຍໂຮງຮຽນອອກສູ່ເຂດຊົນນະບົດຢ່າງທົ່ວເຖິງ ເຮັດໃຫ້ອັດຕາການເຂົ້າຮຽນສຸດທິຊັ້ນປະຖົມບັນລຸ 99,8%, ຊັ້ນມຕົ້ນ 96,5% ແລະ ຊັ້ນມປາຍ 68,5%; ຂະຫຍາຍຕາໜ່າງສາທາລະນະສຸກອອກສູ່ຊົນນະບົດ ເຮັດໃຫ້ປະຊາຊົນໄດ້ຮັບການບໍລິການດ້ານສາທາລະນະສຸກຢ່າງທົ່ວເຖິງ. ຄຽງຄູ່ກັນນີ້ຍັງໄດ້ເອົາໃຈໃສ່ປົກປັກຮັກສາ ແລະ ເສີມຂະຫຍາຍມູນເຊື້ອວັດທະນະທຳຮີດຄອງປະເພນີອັນດີງາມຂອງເຜົ່າ - ຂອງຊາດໃຫ້ຄົງຢູ່ຄູ່ກັບປະຊາ ຊົນບັນດາເຜົ່າຕະຫຼອດໄປ.
(ຂ່າວ-ພາບ: ງຸດ ວິໄລຄຳ)