ກອງປະຊຸມໃຫຍ່ ຄັ້ງທີ VIII ອົງຄະນະພັກເມືອງພຽງ


...

24.09.2019 8:46     

   ກອງປະຊຸມໃຫຍ່ຄັ້ງທີ VIII ຂອງອົງຄະນະພັກ ເມືອງ ພຽງ ແຂວງ ໄຊຍະບູລີ ໄດ້ເປີດຂຶ້ນຢ່າງເປັນທາງການໃນວັນທີ 22 ກັນຍາຜ່ານມາ ທີ່ສະໂມສອນເມືອງດັ່ງກ່າວ ໂດຍການເປັນປະທານຂອງ ສະຫາຍ ເສີດ ແສງສຸລິນ ວ່າການເລຂາພັກເມືອງ ວ່າການເຈົ້າເມືອງໆພຽງ, ເປັນກຽດເຂົ້າຮ່ວມຂອງ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໄຊຍະບູລີ ພ້ອມດ້ວຍແຂກຖືກເຊີນ.
ກອງປະຊຸມໃຫຍ່ຄັ້ງນີ້ ໄດ້ພ້ອມກັນທົບທວນຕີລາຄາຄືນຜົນງານ ໃນແຕ່ລະດ້ານທີ່ຍາດມາໄດ້, ຈຸດອ່ອນຂໍ້ຄົງຄ້າງ ແລະ ສະຫຼຸບຖອດຖອນບົດຮຽນໃນການຈັດຕັ້ງປະຕິບັດແນວທາງນະໂຍບາຍຂອງພັກ, ມະຕິກອງປະຊຸມໃຫຍ່ຄັ້ງທີ VIIຂອງອົງຄະນະພັກເມືອງ ພຽງ ແລະ ພ້ອມກັນກຳນົດທິດທາງຄາດໝາຍຍຸດທະສາດແຕ່ ລະດ້ານ ໃນການປົກປັກຮັກ ສາ ແລະ ພັດທະນາເມືອງພຽງແຕ່ນີ້ຮອດປີ 2024, ອັນສໍາຄັນຜູ້ແທນກອງປະຊຸມຈະໄດ້ພ້ອມກັນເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່, ເລືອກໃຫ້ໄດ້ບຸກຄົນທີ່ມີ ຄວາມຮູ້ຄວາມສາມາດ, ມີຄຸນສົມບັດສິນທຳປະຕິວັດ, ມີຄວາມຮັບຜິດຊອບຕໍ່ໜ້າທີ່ການເມືອງ ເພື່ອສືບຕໍ່ຊີ້ນຳ-ນຳພາເມືອງພຽງກ້າວຂຶ້ນຢ່າງບໍ່ຢຸດຢັ້ງດ້ວຍຜົນງານ ແລະ ຜົນ ສໍາເລັດໃໝ່ໃຫຍ່ຫຼວງກ່ວາເກົ່າ, ສູ້ຊົນພັດທະນາເມືອງພຽງໃຫ້ມີການຫັນປ່ຽນຢ່າງຕັ້ງໜ້າໃນທຸກດ້ານ, ຕາມທິດຍືນຍົງ, ສີຂຽວ ແລະ ເປັນມິດກັບສິ່ງແວດລ້ອມ ໂດຍລວມແລ້ວຕະຫຼອດໄລຍະ 5 ປີຜ່ານມາ ເມືອງພຽງແມ່ນໄດ້ຫັນເອົາພະນັກງານລົງກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍ, ໂຄສະນາເຜີຍແຜ່ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານໃຫ້ແກ່ພະນັກງານສະມາຊິກພັກ, ພະ ນັກງານ-ລັດຖະກອນ ແລະ ພໍ່ແມ່ປະຊາຊົນບັນດາເຜົ່າ, ເຮັດໃຫ້ເມືອງສືບຕໍ່ມີສະຖຽນລະ ພາບທາງດ້ານການເມືອງ, ສັງ ຄົມມີຄວາມສະຫງົບ, ມີຄວາມ ເປັນລະບຽບຮຽບຮ້ອຍ ໂດຍ ພື້ນຖານ, ເສດຖະກິດມະຫາ ພາກຂອງເມືອງສືບຕໍ່ຂະຫຍາຍ ຕົວສະເລ່ຍ 9,3% ລາຍໄດ້ສະເລ່ຍໃສ່ຫົວຄົນໜຶ່ງໄດ້ 20,70 ລ້ານກີບ ຫຼື ເທົ່າກັບ 2.588 ໂດລາ, ທຽບໃສ່ ປີ 2014 ເພີ່ມຂຶ້ນ 804 ໂດລາ, ພື້ນຖານໂຄງລ່າງ, ເສັ້ນທາງ, ໄຟຟ້າ, ນໍ້າ ປະປາຊຸມຊົນໄດ້ຮັບການພັດທະນາ, ຍົກລະດັບດີຂຶ້ນກວ່າຜ່ານມາ, ຄວາມທຸກຍາກຂອງປະຊາຊົນໄດ້ຮັບການແກ້ໄຂຫຼຸດລົງຢ່າງຈະແຈ້ງ ຍັງເຫຼືອ 45 ຄອບຄົວ ເທົ່າກັບ 0,39% ຂອງຄອບຄົວທັງໝົດ, ຂົງເຂດວັດທະນະທໍາ-ສັງຄົມໄດ້ຮັບການພັດທະນາຍົກລະດັບໃຫ້ມີຄຸນນະພາບດີຂຶ້ນກວ່າເກົ່າ, ລະບົບການເມືອງຢູ່ຮາກຖານໄດ້ຮັບການປັບປຸງ ມີຄວາມເຂັ້ມແຂງຂຶ້ນເປັນກ້າວໆ.
ກອງປະຊຸມຄັ້ງນີ້ຍັງໄດ້ຮັບ ຟັງການໂອ້ລົມຂອງສະຫາຍ ພົງສະຫວັນ ສິດທະວົງ ເພື່ອເປັນທິດຊີ້ນໍາອັນສໍາຄັນໃຫ້ແກ່ ອົງຄະນະພັກເມືອງພຽງໃນການ ສືບຕໍ່ປະຕິບັດໜ້າທີ່ວຽກງານກໍ ຄືການຈັດຕັ້ງຜັນຂະຫຍາຍມະ ຕິກອງປະຊຸມໃຫຍ່ຄັ້ງນີ້ໃຫ້ເກີດຜົນເປັນຈິງ.
(ຂ່າວ-ພາບ: ອຸ່ນເຮືອນ ໂພທິລັກ)