ປະທານປະເທດ ເນັ້ນໃຫ້ເມືອງໄຊເສດຖາ ສຸມໃສ່ແກ້ໄຂ ບັນຫາຢ່າງເດັດຂາດ


...

...

25.09.2019 9:33     

   ທ່ານ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ໄດ້ລົງຢ້ຽມຢາມພົບປະໂອ້ລົມ ແລະ ເຮັດວຽກກັບການນຳ ແລະ ພະນັກງານຫຼັກແຫຼ່ງເມືອງໄຊເສດຖາ ເມື່ອວັນທີ 23 ກັນຍາຜ່ານມາ ທີ່ຫ້ອງວ່າການປົກຄອງເມືອງໄຊເສດຖາ ນະຄອນຫຼວງວຽງຈັນ ຊຶ່ງຕ້ອນຮັບໂດຍທ່ານ ຖະໜອມ ທຳທອງ ເຈົ້າເມືອງໄຊເສດຖາ, ມີທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ບັນດາຫົວໜ້າກົມ ແລະ ພະແນກການກ່ຽວຂ້ອງເຂົ້າຮ່ວມ. ທ່ານ ຖະໜອມ ທຳທອງ ໄດ້ລາຍງານການຊີ້ນຳໆພາ ວຽກງານຮອບດ້ານຂອງເມືອງ ໄຊເສດຖາ ໃນແຕ່ລະຂົງເຂດ ເປັນຕົ້ນການນຳພາການເມືອງ -ແນວຄິດ, ປ້ອງກັນຊາດ-ປ້ອງ ກັນຄວາມສະຫງົບ, ເສດຖະ ກິດ, ວັດທະນະທຳ-ສັງຄົມ, ແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະ ຫາຊົນ, ວຽກງານພັກ-ພະນັກ ງານ ແລະ ວຽກງານອົງການປົກ ຄອງໃນໄລຍະຜ່ານມາ ແລະ ທິດທາງແຜນການຕໍ່ໜ້າ ໂດຍສະເພາະການກະກຽມກອງປະ ຊຸມໃຫຍ່ 3 ຂັ້ນຂອງພັກທີ່ຫຼາຍໜ່ວຍພັກຂັ້ນບ້ານ ພ້ອມກັນຈັດຕັ້ງດຳເນີນກອງປະຊຸມໃຫຍ່ຂອງພັກຕົນ. ພ້ອມດຽວກັນນີ້ທ່ານເຈົ້າເມືອງຍັງໄດ້ສະເໜີບັນຫາຕ່າງໆຕໍ່ທ່ານປະທານປະເທດ ເພື່ອຂໍທິດທາງໃນການ ປັບປຸງ ແລະ ການແກ້ໄຂໃນຕໍ່ ໜ້າຕື່ມອີກ ເປັນຕົ້ນບັນຫາການອະນຸມັດງົບປະມານໃຫ້ທ້ອງຖິ່ນນຳໃຊ້ ໂດຍສະເພາະເມືອງໄຊເສດຖາ ໃນໄລຍະຜ່ານມາ ມີຄວາມຕ້ອງການທຶນ 568,52 ຕື້ກີບ ແຕ່ການອະນຸມັດຕົວຈິງມີພຽງແຕ່ 20,69 ຕື້ກີບ ເຫັນວ່າຂັ້ນເທິງອະນຸມັດໃຫ້ໜ້ອຍ ສະເລ່ຍພຽງແຕ່ 3%, ບັນຫາຢາເສບຕິດ ຂໍ້ຂັດແຍ່ງ ທາງດ້ານທີ່ດິນຄວາມບໍ່ສະ ອາດຕາມເສັ້ນທາງສາຍຫຼັກໃນຕົວເມືອງ ການກໍ່ສ້າງຂະຫຍາຍພັກ ແລະ ອື່ນໆທີ່ຍັງເປັນສິ່ງທ້າທາຍຈະຕ້ອງໄດ້ແກ້ໄຂ ໃນສະເພາະໜ້າ ແລະ ຍາວນານ. ໃນໂອກາດນີ້ ທ່ານ ບຸນຍັງ ວໍລະຈິດ ໄດ້ສະແດງຄວາມ ຍ້ອງຍໍຊົມເຊີຍຕໍ່ບັນດາຜົນງານທີ່ເມືອງໄຊເສດຖາຍາດມາໄດ້ ໃນໄລຍະຜ່ານມາ ພ້ອມນີ້ ທ່ານຍັງໄດ້ເນັ້ນໃຫ້ອຳນາດການປົກ ຄອງເມືອງໄຊເສດຖາກໍຄືຂະ ແໜງການທີ່ກ່ຽວຂ້ອງເອົາໃຈ ໃສ່ໃນການຈັດຕັ້ງປະຕິບັດການ ສຶກສາອົບຮົມການເມືອງ-ແນວຄິດ, ແນວທາງນະໂຍບາຍຂອງພັກ ແລະ ລະບຽບກົດໝາຍ ຂອງລັດ ຊຶ່ງບັນຫາດັ່ງກ່າວເປັນ ບັນຫາທີ່ຕັດສິນການປະຕິບັດໜ້າທີ່ວຽກງານຂອງແຕ່ລະຂະ ແໜງການນຳໃຊ້ສິດປະຊາທິ ປະໄຕ ເຂົ້າໃນການພັດທະນາວຽກງານເສດຖະກິດ-ສັງຄົມ ການແກ້ໄຂບັນຫາສັງຄົມໄພ ວ່າງງານການສຶກສາສາທາລະ ນະສຸກ ການຈັດຕັ້ງປະຕິບັດ ນະໂຍບາຍ 6 ສ ຂອງນະຄອນ ຫຼວງວຽງຈັນວາງອອກ ການເກັບລາຍຮັບເຂົ້າງົບປະມານການແກ້ໄຂໜີ້ສິນ ແລະ ຂໍ້ຄົງຄ້າງຕ່າງໆ ຍົກລະດັບສີມືແຮງງານ ການສ້າງວຽກເຮັດງານທຳໃຫ້ກັບຊາວໜຸ່ມ-ໄວໜຸ່ມ ຕະຫຼາດຈຳໜ່າຍສິນຄ້າປະກົດການຫຍໍ້ທໍ້ໃນສັງຄົມ ການແກ້ໄຂຮ່ອງລະບາຍນ້ຳ ເປັນຕົ້ນການເກີດຜັກຕົບຢູ່ບໍລິເວນຮ່ອງລະ ບາຍນ້ຳ ການຜະລິດສິນຄ້າກະ ສິກຳເປັນສິນຄ້າ ແລະ ອື່ນໆ ຊຶ່ງການແກ້ໄຂບັນຫາເຫຼົ່ານີ້ ຕ້ອງເອົາໃຈໃສ່ຢ່າງຈິງຈັງເດັດຂາດ ແລະ ເໝາະສົມ ນຳພາຢ່າງໃກ້ ຊິດຕິດແທດ ຈຶ່ງຈະເຮັດໃຫ້ແກ້ ໄຂບັນຫາຢ່າງມີປະສິດທິຜົນ ໄດ້. (ແຫຼ່ງຂ່າວຈາກໜັງສືພິມວຽງຈັນໃໝ່)