ຮອງນາຍົກລັດຖະມົນຕີ ພົບປະພະນັກງານ ຫຼັກແຫຼ່ງ ແຂວງບໍລິຄຳໄຊ


...

09.10.2019 9:33     

   ທ່ານ ສອນໄຊ ສີພັນດອນ ກຳມະການກົມການ ເມືອງສູນກາງພັກ ຮອງນາຍົກ ລັດຖະມົນຕີ ພ້ອມດ້ວຍຄະ ນະໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງບໍລິຄຳໄຊ ເມື່ອບໍ່ດົນມານີ້ ທີ່ຫ້ອງ ປະຊຸມຫ້ອງວ່າການປົກຄອງແຂວງ ໂດຍໃຫ້ກຽດຕ້ອນຮັບຂອງທ່ານ ກອງແກ້ວ ໄຊສົງ ຄາມ ກຳມະການສູນກາງພັກ ເລຂາພັກແຂວງ ເຈົ້າແຂວງບໍລິຄຳໄຊ, ມີຄະນະປະຈຳພັກ ແຂວງ, ກຳມະການພັກແຂວງ, ພະນັກງານຫຼັກແຫຼ່ງ ແລະ ບັນ ດາພະແນກການອ້ອມຂ້າງແຂວງເຂົ້າຮ່ວມ.
    ໂອກາດດັ່ງກ່າວ ທ່ານ ກອງແກ້ວ ໄຊສົງຄາມ ໄດ້ລາຍງານຫຍໍ້ກ່ຽວກັບການພັດທະນາເສດຖະກິດ-ສັງຄົມ ຂອງແຂວງ ໃນໄລຍະຜ່ານມາ ເຖິງວ່າແຂວງບໍລິຄຳໄຊ ຈະໄດ້ຮັບຜົນກະທົບຈາກອຸທົກກະໄພ ໃນກາງປີ 2018 ການລະບາດຂອງໄຂ້ຍຸງລາຍ ແລະ ການລະບາດພະຍາດອະຫິວາໝູອາຟຣິກາ ແຕ່ສະພາບເສດຖະກິດຂອງແຂວງ 9 ເດືອນຕົ້ນປີ 2019 ຍັງສືບຕໍ່ມີການເຕີບໂຕຢ່າງຕໍ່ເນື່ອງ ສາມາດອະນຸຍາດໃຫ້ນັກລົງທຶນພາຍໃນ ແລະ ຕ່າງປະເທດ ເຂົ້າມາລົງທຶນ ຈຳນວນ 61 ໂຄງການ ມູນຄ່າ 1.345,43 ຕື້ກີບ, ລາຍຮັບພູດສູນກາງປະຕິບັດໄດ້ 408,50 ຕື້ກີບ ເທົ່າກັບ 60,83% ຂອງແຜນການປີ ແລະ 86,89% ຂອງແຜນການ 9 ເດືອນ, ລາຍຮັບພູດທ້ອງຖິ່ນ ປະຕິບັດໄດ້ 146,35 ຕື້ກີບ ເທົ່າກັບ 75,07% ຂອງແຜນການປີ ແລະ 109,89% ຂອງແຜນການ 9 ເດືອນ, ການຜະລິດເຂົ້ານາແຊງໄດ້ 1.357 ເຮັກຕາ ຜົນຜະລິດໄດ້ 5.904 ນາປີ 37.451 ເຮັກຕາ ເທົ່າກັບ 99,95%, ພືດປະເພດຕ່າງໆມີ 15.325 ເຮັກຕາ ເທົ່າກັບ 98,24% ພ້ອມດຽວກັນ ສະພາບການພັດທະນາວຽກງານວັດທະນະທຳ-ສັງຄົມກໍໄດ້ຮັບການປັບປຸງ ແລະ ພັດທະ ນາໃຫ້ດີຂຶ້ນເປັນລຳດັບວຽກງານປ້ອງກັນຊາດ-ປ້ອງກັນຄວາມສະຫງົບ ກໍໄດຮັບການເອົາໃຈໃສ່ ເຮັດໃຫ້ສັງຄົມມີຄວາມສະຫງົບຮຽບຮ້ອຍ ໂດຍພື້ນຖານ. ຈາກນັ້ນທ່ານຮອງນາຍົກລັດຖະມົນຕີກໍໄດ້ໂອ້ລົມກ່ອນອື່ນ ທ່ານໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານທີ່ແຂວງຍາດມາໄດ້ພ້ອມເນັ້ນໜັກບາງບັນຫາສຳຄັນ ເປັນຕົ້ນແມ່ນການຄຸ້ມຄອງການນຳໃຊ້ສານເຄມີເຂົ້າໃນການຜະລິດກະສິກຳ ທີ່ອາດເປັນອັນຕະລາຍຕໍ່ສຸຂະພາບ, ການຈັດສັນການຄຸ້ມຄອງນຳໃຊ້ທີ່ດິນ ໂດຍສະເພາະການອອກໃບຕາດິນ ການຂຶ້ນສຳມະໂນທີ່ດິນຢູ່ເຂດຊົນນະບົດ, ສືບຕໍ່ປະຕິບັດບັນດາຄາດໝາຍສູ້ຊົນໃຫ້ໄດ້ຮັບຜົນສຳເລັດດ້ວຍໝາກຜົນສູງ, ເລັ່ງໃສ່ການປະເມີນບັນດາໂຄງການການລົງທຶນໃຫ້ເປັນໄປຕາມຄາດໝາຍທີ່ວາງໄວ້ ເພື່ອເປັນການສ້າງຈຸດດຶງດູດໃຫ້ນັກທ່ອງທ່ຽວ, ຫັນສູ່ການນຳໃຊ້ເຄື່ອງມືທີ່ທັນສະໄໝເຂົ້າໃນວຽກງານການເຝົ້າລະວັງ ແລະ ເຕືອນໄພ ຕໍ່ກັບໄພພິບັດທີ່ອາດຈະເກີດຂຶ້ນໄດ້ ເພື່ອຫຼຸດຜ່ອນຄວາມເສຍຫາຍແກ່ຊີວິດ ແລະ ຊັບສິນຂອງພໍ່ແມ່ປະຊາຊົນ, ໃຫ້ປັບປຸງບັນດານິຕິກຳຂັ້ນແຂວງໃຫ້ມີປະສິດທິພາບ ແລະ ການປະຕິບັດລະບຽບກົດໝາຍ ດ້ວຍຄວາມຖືກຕ້ອງໃນທົ່ວສັງ ຄົມ ພ້ອມດຽວກັນທ່ານຍັງໄດ້ເນັ້ນເຖິງວຽກງານການເງິນ, ອຸດສາຫະກຳການຄ້າ, ວຽກງານແຜນການ-ການລົງທຶນ ແລະ ສິ່ງແວດລ້ອມໃຫ້ຕັ້ງໜ້າປະຕິບັດຢ່າງສອດຄ່ອງ ເຮັດໃຫ້ສະພາບການພັດທະນາເສດຖະກິດ-ສັງຄົມ ໄດ້ຮັບການພັດທະນາຢ່າງຕໍ່ເນື່ອງ ເຮັດໃຫ້ຊີວິດການເປັນຢູ່ຂອງພໍ່ແມ່ປະຊາຊົນດີຂຶ້ນເປັນກ້າວໆ. ໃນໂອກາດດັ່ງກ່າວ ທ່ານຮອງນາຍົກລັດຖະມົນຕີ ຍັງໄດ້ມອບເງິນຈຳນວນ 100.000.000 ກີບ ເພື່ອຊ່ວຍເຫຼືອຜູ້ປະສົບໄພນ້ຳຖ້ວມ ແລະ ຟື້ນຟູການຜະລິດຫຼັງໄພພິບັດ.
(ຂ່າວ-ພາບ: ວຽງສະຫວັນ)