ເວທີສົນທະນາ ເນື່ອງໃນວັນເຄຫະສະຖານໂລກ ແລະ ວັນຄູແຫ່ງຊາດ


...

11.10.2019 9:13     

   ມະຫາວິທະຍາໄລແຫ່ງຊາດ (ມຊ) ໄດ້ຈັດເວທີສົນທະນາ ເນື່ອງໃນວັນເຄຫະສະຖານໂລກ ແລະ ວັນຄູແຫ່ງຊາດ ໃນຫົວຂໍ້: ຊາວໜຸ່ມນັກຮຽນ, ນັກສຶກສາກັບການພັດທະນາຕົວເມືອງວຽງຈັນ ຂຶ້ນເມື່ອວັນທີ 10 ຕຸລານີ້ ທີ່ ມຊ ພາຍ ໃຕ້ການເຂົ້າຮ່ວມ ແລະ ກ່າວ ເປີດງານຂອງທ່ານ ອາລຸນໄຊ ສູນນະລາດ ເລຂາຄະນະບໍ ລິຫານງານສູນກາງຊາວໜຸ່ມປະຊາຊົນ ປະຕິວັດລາວ ຊຶ່ງທ່ານໄດ້ກ່າວວ່າ: ມື້ນີ້ຮູ້ສຶກເປັນກຽດ ແລະ ພາກພູມໃຈເປັນການສະເຫຼີມສະຫຼອງວັນສໍາຄັນ ໂດຍສະເພາະແມ່ນວັນເຄຫະສະຖານໂລກ, ວັນຄູແຫ່ງຊາດ ຄົບຮອບ 25 ປີ ທີ່ຕາງໜ້າຄົນຮຸ່ນໜຸ່ມທີ່ກວມເອົາ 60% ຂອງພົນລະເມືອງລາວທົ່ວປະເທດ ທຸກສາຂາອາຊີບ, ທຸກກຸ່ມຄົນ ແລະ ໃນທຸກຂົງເຂດຂະແໜງການ ແລະ ທ້ອງຖິ່ນ ມື້ນີ້ ພວກເຮົາໄດ້ຈັດເວທີສົນທະນາທີ່ເໝາະກັບຄວາມຕ້ອງການ ແລະ ຈິດ ຕະສາດຂອງຄົນຮຸ່ນໜຸ່ມ ພາຍໃຕ້ຫົວຂໍ້ວ່າ: ''ຊາວໜຸ່ມນັກຮຽນ, ນັກສຶກສາກັບການພັດທະນາຕົວເມືອງວຽງຈັນ ເນື່ອງໃນວັນເຄຫະສະຖານໂລກ ແລະ ວັນຄູແຫ່ງຊາດ 2019'' ຊຶ່ງເວທີດັ່ງກ່າວນີ້ແມ່ນໄດ້ ຮັບການໃກ້ຊິດ ແລະ ຊີ້ນໍາຈາກຄະນະພັກເຈົ້າຄອງນະ ຄອນຫຼວງວຽງຈັນ ຊຶ່ງເປັນຜູ້ໜຶ່ງທີ່ມີຫົວຄິດ ແລະ ລິເລີ່ມໃນການນໍາພາແຫ່ງຍຸກສະໄໝຂອງຊາວໜຸ່ມ ໃນການອອກແບບຕົວເມືອງ ຊຶ່ງ ເປັນບັນຫາພື້ນຖານໃນການ ພັດທະນາຕົວເມືອງ ໂດຍສະ ເພາະຄົນຮຸ່ນໜຸ່ມຜູ້ທີ່ຈະນໍາໃຊ້ໃຫ້ເກີດໝາກອອກຜົນໃນການພັດທະນາ.
ທ່ານ ສົມສີ ລໍວັນໄຊ ອະທິການບໍດີ ມຊ ໄດ້ກ່າວວ່າ: ສະຖາບັນການສຶກສາແມ່ນບ່ອນສໍາຄັນທີ່ສຸດຂອງການສຶກສາ, ສ້າງຊັບພະຍາກອນມະນຸດ, ຜູ້ສືບທອດໃນການພັດທະນາປະເທດຊາດ ແລະ ສັງຄົມກໍຄືທຸກໆປະເທດກໍຄືກັນ ເພື່ອເຮັດໃຫ້ຍືນຍົງ ໃນນັ້ນທີ່ຢູ່ອາໄສກໍ ເປັນເລື່ອງໜຶ່ງທີ່ສໍາຄັນຂອງຄົນ ເຮົາ ບວກກັບການຮັກສາສິ່ງ ແວດລ້ອມ ໃນນັ້ນກໍແມ່ນວິຊາການຜູ້ທີ່ອອກແບບການສ້າງສະຖານທີ່ໃຫ້ມັນເໝາະສົມກັບສະຖານທີ່.
ໃນໂອກາດເຂົ້າຮ່ວມກອງປະຊຸມ ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນໄດ້ກ່າວວ່າ: ການມາເຕົ້າໂຮມກັນຂອງພວກເຮົາໃນມື້ນີ້ ແມ່ນປຶກສາຫາລືກັນເນື່ອງໃນໂອກາດສັບປະດາເຄຫະສະຖານໂລກ ຊຶ່ງປີນີ້ອົງການສະຫະປະຊາຊາດ ເພື່ອການພັດທະນາ (UNDP) ໄດ້ໃນຫົວຂໍ້: ''ນໍາໃຊ້ວິທະຍາການແຖວໜ້າເປັນເຄື່ອງມືປະດິດສ້າງຢ່າງໜຶ່ງ ເພື່ອຫັນປ່ຽນສິ່ງເສດເຫຼືອໃຫ້ເປັນສົມບັດລໍ້າຄ່າຂອງພວກເຮົາ'' ຈົ່ງພ້ອມກັນອຸທິດໃຫ້ສັບປະດາດັ່ງກ່າວ ເພື່ອໃຫ້ຜູ້ອອກແຮງງານມີຄວາມຜາສຸກ, ມີຄຸນນະພາບຊີວິດທີ່ດີຂຶ້ນ, ພ້ອມດຽວກັນນັ້ນທ່ານຍັງໄດ້ສະແດງຄວາມຊົມເຊີຍຕໍ່ຫົວຄິດປະດິດສ້າງຂອງຄະນະບໍລິຫານງານຊາວໜຸ່ມ 3 ພາກສ່ວນ ໃນການຈັດກິດຈະກໍາຄັ້ງນີ້ ເປັນການເຕົ້າໂຮມຖັນແຖວຊາວໜຸ່ມ ໃຫ້ໄດ້ມາພົບພໍ້ກັນ ແລະ ທັງເປັນການສ້າງບັນຍາກາດສະເຫຼີມສະຫຼອງວັນປະກາດເອ ກະລາດ 12 ຕຸລາ ທີ່ຈະມາເຖິງນີ້ອີກດ້ວຍ.
(ຂ່າວ-ພາບ: ສຸກສາຄອນ ທອງດີສີລິສັກ)