ສຳເລັດກອງປະຊຸມໃຫຍ່ ຄັ້ງທີ VII ຂອງອົງຄະນະພັກເມືອງຊຽງຮ່ອນ


...

15.10.2019 10:06     

   ກອງປະຊຸມໃຫຍ່ຄັ້ງທີ VII ຂອງຜູ້ແທນອົງຄະນະພັກ ເມືອງ ຊຽງຮ່ອນ ແຂວງໄຊຍະບູລີ ໄດ້ດຳເນີນມາເປັນເວລາ 2 ວັນ ໄດ້ສໍາເລັດລົງ ໃນຕອນບ່າຍວັນທີ 8 ຕຸລາຜ່ານມາ ທີ່ສະໂມສອນໃຫຍ່ຂອງເມືອງດັ່ງກ່າວ ໂດຍເປັນປະທານຂອງ ສະຫາຍ ບຸນລ້ວນ ຊົມສີຫາປັນຍາ ກໍາມະການພັກແຂວງ ເລຂາພັກເມືອງ ເຈົ້າເມືອງ ຊຽງຮ່ອນ ໂດຍການເຂົ້າຮ່ວມຂອງ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ ເລຂາພັກແຂວງ ເຈົ້າແຂວງ ໄຊຍະບູລີ, ມີປະທານສະພາປະຊາຊົນແຂວງ, ມີຄະນະປະຈຳພັກແຂວງ, ກຳມະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ, ມີພະນັກງານອາວຸໂສບຳນານ, ມີນັກທຸລະກິດ, ຜູ້ປະກອບການ, ແຂກຮັບເຊີນຈາກເມືອງອ້ອມຂ້າງເຂົ້າຮ່ວມ.
     ໃນກອງປະຊຸມຜູ້ແທນທີ່ເຂົ້າຮ່ວມໄດ້ພ້ອມກັນຄົ້ນຄວ້າຕີລາຄາຄືນການຈັດຕັ້ງປະຕິບັດແນວທາງປຽ່ນແປງໃໝ່ ຮອບດ້ານທີ່ມີຫຼັກການຂອງພັກກໍຄືການຈັດຕັ້ງປະຕິບັດເນື້ອໃນຈິດໃຈມະຕິກອງປະຊຸມໃຫຍ່ຂອງອົງຄະນະພັກເມືອງ, ເສີມຂະຫຍາຍດ້ານຕັ້ງໜ້າ, ຊອກຫາວິທີແກ້ໄຂຂໍ້ຂາດຕົກບົກຜ່ອງ ແລະ ບົດຮຽນທີ່ຖອດຖອນໄດ້ ເພື່ອພ້ອມກັນປັບປຸງແກ້ໄຂ ແລະ ໄດ້ກຳນົດທິດທາງ 5 ປີຕໍ່ໜ້າ, ແນໃສ່ພັດທະນາເມືອງ ຊຽງຮ່ອນໃຫ້ໄປຕາມ 4 ເນື້ອໃນ 4 ຄາດໝາຍ ໂດຍສຸມໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານເສດຖະກິດ, ວຽກງານວັດທະນະທໍາ-ສັງຄົມ ແລະ ການບໍລິການ-ທ່ອງທ່ຽວ ຕາມຄໍາຂວັນທີ່ວ່າ: ສ້າງເມືອງຊຽງຮ່ອນໃຫ້ເປັນເມືອງຜະລິດກະສິກໍາສະອາດ, ປູກເຂົ້າ ແລະ ລ້ຽງສັດເປັນສິນຄ້າ ຕິດພັນກັບການປຸງແຕ່ງ ແລະ ສົ່ງເສີມຫັດຖະກໍາທີ່ເປັນເອກະລັກຂອງທ້ອງຖິ່ນ ໄປພ້ອມກັບການພັດທະນາການທ່ອງທ່ຽວດ້ານວັດທະນະທໍາ ແລະ ທໍາມະຊາດ ພ້ອມນີ້ກອງປະຊຸມຍັງໄດ້ເປັນເອກະສັນກັນຮັບຮອງເອົາຮ່າງລາຍງານການເມືອງ, ແຜນພັດທະນາເສດຖະກິດ-ສັງຄົມ ແລະ ບົດສຳຫຼວດການນຳພາລວມຂອງຄະນະພັກຊຸດເກົ່າ ແລະ ໄດ້ດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ຊຶ່ງມີຜູ້ຮັບສະໝັກທັງໝົດ 31 ສະຫາຍ, ຍິງ 4 ສະຫາຍ, ເລືອກໄດ້ 27 ສະຫາຍ,ຍິງ 3 ສະຫາຍ, ອາຍຸສູງສຸດ 57 ປີ, ຕໍ່າສຸດ 38 ປີ ແລະ ອາຍຸສະເລ່ຍ 48 ປີ, ກອງປະຊຸມຄັ້ງປະຖົມມະລືກໄດ້ຕົກລົງເລືອກເອົາ ສະຫາຍ ບຸນລ້ວນ ຊົມສີຫາປັນຍາ ເປັນເລຂາພັກເມືອງ, ສະຫາຍ ອິນຕາ ນີ້ມນວນ ແລະ ສະຫາຍ ຖາວອນ ເລື່ອນແກ້ວ ເປັນຮອງເລຂາ, ຕົກລົງເລືອກເອົາ ສະຫາຍ ຖາວອນ ເລື່ອນແກ້ວ ເປັນປະທານຄະນະກວດກາພັກເມືອງ, ສະຫາຍ ບີ ທໍ ແລະ ສະຫາຍ ຈໍາປາ ທອງເທພາ ເປັນຮອງປະທານ, ກອງປະຊຸມຍັງໄດ້ຮັບຟັງການໂອ້ລົມຂອງສະຫາຍເລຂາພັກແຂວງ ຊຶ່ງສະຫາຍໄດ້ເນັ້ນໜັກໃຫ້ຄະນະບໍລິຫານງານພັກເມືອງຊຸດໃໝ່ເອົາໃຈໃສ່ ເສີມຂະຫຍາຍຄວາມສາມັກຄີເປັນປຶກແຜ່ນ, ເຊີດຊູຈິດໃຈຮັກຊາດ ຮັກບ້ານເກີດເມືອງນອນໃຫ້ສູງຂຶ້ນ ພ້ອມທັງເສີມຂະຫຍາຍ ຈິດໃຈເປັນເຈົ້າຕົນເອງ ເພິ່ງຕົນເອງ ສ້າງຄວາມຮັ່ງມີເຂັ້ມແຂງດ້ວຍຕົນເອງ, ສືບຕໍ່ແກ້ໄຂຄວາມທຸກຍາກຕິດພັນກັບການຈັດສັນອາຊີບຄົງທີ່ໃຫ້ປະຊາຊົນ ໂດຍຫັນເອົາວຽກງານດັ່ງກ່າວເປັນໜ້າທີ່ຂອງທົ່ວປວງຊົນມີສ່ວນຮ່ວມ ເພື່ອພ້ອມກັນແກ້ໄຂຢ່າງມີຈຸດສຸມ, ເສີມຂະຫຍາຍທ່າແຮງ, ຄວາມອາດສາມາດບົ່ມຊ້ອນຂອງແຕ່ລະເຂດ ເພື່ອຍູ້ການພັດທະນາ ໃນການຜະລິດເປັນສິນຄ້າໃຫ້ແຂງແຮງ ແລະ ກວ້າງຂວາງກວ່າເກົ່າ, ສົ່ງເສີມການພັດທະນາອຸດສາຫະກຳປຸງແຕ່ງ, ຜະລິດຕະພັນກະສິກຳ ເພື່ອສ້າງລາຍໄດ້ທີ່ໝັ້ນທ່ຽງ ແກ່ປະຊາຊົນໃນໄລຍະຍາວ.
(ຂ່າວ: ອຸ່ນເຮືອນ ໂພທິລັກ)