ກະຊວງ ຮສສ ແຕ່ງຕັ້ງຂັ້ນຫົວໜ້າກົມ ແລະ ທຽບເທົ່າກົມ


...

15.10.2019 10:09     

   (ຂປລ) ກະຊວງແຮງງານ ແລະ ສະຫວັດດີການສັງຄົມ (ຮສສ) ຈັດພິທີປະກາດແຕ່ງຕັ້ງພະນັກງານຂັ້ນຫົວໜ້າກົມ ແລະ ທຽບເທົ່າກົມ ໃນວັນທີ 10 ຕຸລາ 2019, ໃນນັ້ນໄດ້ປະກາດແຕ່ງຕັ້ງ ທ່ານ ວິໄລພົງ ສີສົມຫວັງ ເປັນຫົວໜ້າກົມສັງຄົມສົງເຄາະ ແລະ ແຕ່ງຕັ້ງທ່ານ ໂຈມແຍງ ແພງທອງສະຫວັດ ເປັນຫົວໜ້າຫ້ອງການ ຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງ ຢູ່ສປປ ລາວ (ຄຊກລ).
    ໂອກາດນີ້, ທ່ານ ຄຳແພງ ໄຊສົມແພງ ລັດຖະມົນຕີ ກະ ຊວງແຮງງານ ແລະ ສະຫວັດດີການສັງຄົມໄດ້ມີຄຳເຫັນ ແລະ ໃຫ້ທິດຊີ້ນຳວ່າ: ການຍົກຍ້າຍ, ການແຕ່ງຕັ້ງ, ການບັນຈຸ-ສັບ ຊ້ອນບ່ອນປະຈຳການຂອງພະ ນັກງານນຳພາ-ຄຸ້ມຄອງ ແລະ ພະນັກງານລັດຖະກອນ ເປັນວຽກປົກກະຕິຂອງພັກ ແລະ ລັດຖະບານ ແລະ ເປັນວຽກ ງານກົກຂອງວຽກງານ ພັກ -ພະນັກງານ ຊຶ່ງເນື້ອແທ້ຂອງການແຕ່ງຕັ້ງຕຳແໜ່ງບໍລິ ຫານ ປະເພດຕ່າງໆ ແມ່ນການ ມອບ ໝາຍໜ້າທີ່ວຽກງານຂອງພັກ-ລັດຖະບານ ກໍຄືຄະນະພັກ-ຄະນະນຳຂອງກະຊວງ ຮສສ ໃຫ້ທັງສອງທ່ານ ຊີ້ນຳ-ນຳພາ ແລະ ຈັດຕັ້ງປະຕິບັດວຽກງານໃນຂົງເຂດຄວາມຮັບ ຜິດຊອບຂອງຕົນຢ່າງມີຜົນສຳເລັດ.
    ໂອກາດນີ້, ທ່ານລັດຖະ ມົນຕີ ຍັງໄດ້ຮຽກຮ້ອງມາຍັງຜູ້ທີ່ໄດ້ຮັບການແຕ່ງຕັ້ງໃນຄັ້ງນີ້ ໃຫ້ມີການປ່ຽນແປງທັດສະນະຄະຕິໃໝ່, ປັບປ່ຽນຫຼັກການ ແລະ ລະບອບແບບແຜນວິທີນຳພາ ແລະ ເຮັດວຽກຂອງຕົນໃໝ່ ໂດຍຢຶດໝັ້ນ ແລະ ປະຕິບັດຫຼັກການລວມສູນປະຊາທິປະ ໄຕເຂັ້ມງວດ, ນຳພາ ແລະ ເຮັດວຽກເປັນໝູ່ຄະນະ, ແບ່ງວຽກ, ແບ່ງຄວາມຮັບຜິດຊອບໃຫ້ໝູ່ຄະນະຢ່າງຈະແຈ້ງ, ເຮັດວຽກຢ່າງມີແຜນການ, ມີການຊຸກຍູ້ຕິດຕາມກວດກາ, ຕີລາຄາ, ປະເມີນຜົນ, ສະຫຼຸບລາຍງານ ແລະ ຖອດຖອນບົດຮຽນຢ່າງເປັນປົກກະຕິ.