ກອງປະຊຸມໃຫຍ່ຜູ້ແທນອົງຄະນະພັກ ເມືອງໄຊພູທອງ


...

16.10.2019 9:33     

   ກອງປະຊຸມໃຫຍ່ຜູ້ແທນ ອົງຄະນະພັກ ເມືອງໄຊພູທອງ ຄັ້ງທີ V ແຂວງສະຫວັນນະເຂດ ໄດ້ເປີດຂຶ້ນໃນວັນທີ 8-9 ຕຸລານີ້ ໂດຍການເປັນປະທານ ຂອງສະຫາຍ ສັນຕິພາບ ພົມ ວິຫານ ກຳມະການສູນກາງພັກ ເລຂາພັກແຂວງ ເຈົ້າແຂວງສະ ຫວັນນະເຂດ, ສະຫາຍ ທອງທ່ຽງ ສີດາວົງ ກຳມະການປະຈຳພັກແຂວງ ຫົວໜ້າຄະ ນະຈັດຕັ້ງແຂວງ, ມີບັນດາແຂກ, ພະແນກການອ້ອມຂ້າງ, ເມືອງຕ່າງໆຕະຫຼອດຮອດຜູ້ແທນສົມບູນ ໃນທົ່ວເມືອງ ຈຳນວນ 155 ສະຫາຍ ຍິງ 31 ສະຫາຍ ຊຶ່ງເປັນຕົວແທນໃຫ້ແກ່ສະມາຊິກພັກໃນທົ່ວເມືອງເຂົ້າຮ່ວມ.ສະຫາຍ ຄຳວິໃສ ຜຸຍຍະວົງ ກຳມະການພັກແຂວງ ເລຂາພັກເມືອງ ເຈົ້າເມືອງໄຊ ພູທອງ ໄດ້ຜ່ານບົດລາຍງານການເມືອງ ຕໍ່ກອງປະຊຸມໃຫຍ່ ຄັ້ງທີ V ຂອງອົງຄະນະພັກເມືອງ ເພື່ອຕີລາຄາຄືນການຈັດຕັ້ງປະ ຕິບັດມະຕິກອງປະຊຸມໃຫຍ່ ໃນຄັ້ງທີ່ຜ່ານມາ ຕະຫຼອດໄລຍະ 5 ປີຜ່ານມາ ໂດຍອີງ ໃສ່ເງື່ອນໄຂຈຸດພິເສດ ແລະ ທ່າແຮງບົ່ມຊ້ອນທີ່ເປັນພື້ນຖານໃຫ້ແກ່ການຜະລິດກະສິ ກຳ ເຮັດໃຫ້ຜະລິດຕະພັນພາຍໃນບັນລຸໄດ້ 814 ຕື້ກີບ, ສະເລ່ຍລາຍໄດ້ຕໍ່ຫົວຄົນເທົ່າກັບ 15,8 ລ້ານກີບ ຫຼື ເທົ່າກັບ 1.884 ໂດລາ/ຄົນ/ປີ ສຳລັບການຈັດເກັບລາຍຮັບເຂົ້າງົບປະມານຂອງລັດປະຕິບັດໄດ້ 94% ຂອງແຜນລາຍຮັບງົບປະມານ, ສົມທຽບໃສ່ກອງປະຊຸມໃຫຍ່ ຄັ້ງທີ IV ປະຕິບັດໄດ້ 86% ຂອງແຜນການ, ປະຕິບັດລາຍຈ່າຍໄດ້ 101,98%, ໄດ້ຕັ້ງໜ້າຍູ້ແຮງຂະບວນການຜະລິດກະ ສິກຳ ຕິດພັນກັບການຜະລິດເປັນສິນຄ້າ, ສະເລ່ຍໃສ່ຫົວຄົນໄດ້ 1.223 ກິໂລ/ຄົນ/ປີ, ມີເຂົ້າເຫຼືອກິນແຮໄວ້ ແລະ ຂາຍອອກ 44.436 ໂຕນ/ປີ, ສາມາດຄ້ຳສະບຽງອາຫານໄດ້ 100%. ໄດ້ຊຸກຍູ້ສົ່ງເສີມສ້າງຕັ້ງບ້ານພັດທະນາໄດ້ 19 ບ້ານ, ມີທຶນທັງໝົດ 7,9 ຕື້ກວ່າກີບ ໃນນັ້ນເດັ່ນກວ່າໝູ່ແມ່ນກອງທຶນບ້ານນາພານມີທຶນ 4,2 ຕື້ກີບ. ດ້ານການສຶກສາທົ່ວເມືອງໄດ້ປະກາດຈົບຊັ້ນມັດທະຍົມຕົ້ນບຳລຸງ ໃນສົກປີ 2015 ເປັນເມືອງອັນດັບທີໜຶ່ງຂອງແຂວງ, ພິເສດ ໄດ້ສົ່ງນັກກິລາກະຕໍ້ຫວາຍຍິງ ເຂົ້າຮ່ວມແຂ່ງຂັນມະຫາວິທະຍາໄລອາຊຽນ ແລະນັກກິລາສີພາຍເຮືອຊ່ວງຂອງເມືອງ ເປັນຕົວແທນເຂົ້າຮ່ວມ ແຂ່ງຂັນລະດັບຊາດທີ່ ສປ ຈີນ, ສາມາດຍາດໄດ້ 1 ຫຼຽນຄຳ, 1 ຫຼຽນເງິນ ແລະ ທີ່ ສສ ຫວຽດ ນາມ ສາມາດຍາດໄດ້ 1 ຫຼຽນຄຳ. ໄດ້ໃຊ້ສິດປະຊາທິປະໄຕ ລົງຄະແນນສຽງປ່ອນບັດຄັດເລືອກເອົາຄະນະບໍລິຫານງານພັກເມືອງຊຸດໃໝ່ ຊຶ່ງມີຜູ້ລົງສະ ໝັກເລືອກຕັ້ງທັງໝົດ ຈຳນວນ 27 ສະຫາຍ, ຍິງ 3 ສະຫາຍ, ໃນນັ້ນ ໄດ້ເລືອກເອົາ 23 ສະ ຫາຍ ໃນນັ້ນເປັນຄະນະປະຈຳພັກເມືອງ 7 ສະຫາຍ ແລະ ໄດ້ເລືອກເອົາສະຫາຍ ຄຳວິໃສ ຜຸຍຍະວົງ ເປັນເລຂາຄະນະບໍລິຫານງານພັກເມືອງ, ສະຫາຍ ຫ່ວນ ຮັງບົວສອນ ເປັນຮອງເລຂາ, ສະຫາຍ ແສງສະຫວັນ ອານຸສິນ ເປັນຮອງເລຂາ ທັງເປັນປະທານກວດກາພັກ, ສະຫາຍ ພັທ ຄຳພາ ຄຳມະນີວົງ, ສະຫາຍ ພົມມາ ສົງວິໄລ, ສະຫາຍ ເກີດມີ ຈັນທິລາດ ແລະ ສະຫາຍ ສົມໝາຍ ແກ້ວລັດຕະນະວົງ ເປັນຄະນະປະຈຳພັກເມືອງ. ສ່ວນອີກ 16 ສະຫາຍ ເປັນກຳມະການພັກເມືອງ.
(ຂ່າວ-ພາບ: ຕຸກໆ)