ກອງປະຊຸມຄົບຄະນະກຳມາທິການ ປກຊ-ປກສ ປະຈຳປີ 2019


...

18.10.2019 9:31     

   ກອງປະຊຸມຄົບຄະນະຂອງກຳມາທິການ ປກຊ-ປກສ ປະຈຳປີ 2019 ຂອງສະພາແຫ່ງຊາດ,ໄດ້ເປີດຂຶ້ນ ໃນວັນທີ 17 ຕຸລານີ້ ທີ່ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ພົນຈັດຕະວາ ຄຳສຸກ ວີອິນທະວົງ ປະທານກຳມາທິການ ປກຊ-ປກສ ສະພາແຫ່ງຊາດ, ມີບັນດາກຳມາທິການ ປກຊ-ປກສ ຈາກ 18 ເຂດ ແລະ ຮອງລັດຖະມົນຕີ 2 ກະຊວງ ປກຊ-ປກສ ເຂົ້າຮ່ວມ.
ທ່ານ ພົນຈັດຕະວາ ຄຳສຸກ ວີອິນທະວົງ ໄດ້ເວົ້າວ່າ: ສຳລັບສະພາບພາຍໃນປະເທດເຮົາ ໄລຍະໜຶ່ງປີຜ່ານມາ, ມີຫຼາຍທ້ອງຖິ່ນໃນທົ່ວປະເທດ ໄດ້ປະສົບກັບອຸທົກກະໄພ ທາງທຳມະຊາດຢ່າງຮ້າຍແຮງ ໂດຍສະເພາະ ພາກກາງຕອນໃຕ້ ກັບ ພາກໃຕ້ຂອງລາວ ຊຶ່ງເປັນຜົນກະທົບ ຕໍ່ຊີວິດ ແລະ ຊັບສິນຂອງປະຊາຊົນບໍ່ໜ້ອຍ.    ໄປພ້ອມກັນນັ້ນ ປະເທດເຮົາໄດ້ປະສົບກັບບັນຫາຄວາມຫຍຸ້ງຍາກດ້ານເສດຖະກິດ ຄວາມບໍ່ຄ່ອງຕົວດ້ານການເງິນ ເຮັດໃຫ້ໄພເງິນເຟີ້ ຊຶ່ງໄດ້ສົ່ງຜົນກະທົບຕໍ່ແຜນພັດທະນາເສດຖະກິດ ບໍ່ໜ້ອຍ. ພ້ອມກັນນັ້ນ ກໍໄດ້ກະທົບຕໍ່ ການປະຕິບັດແຜນການ ປະຈຳປີ 2020 ຂອງກຳມາທິການ ປກຊ-ປກສ ພວກເຮົາບໍ່ໜ້ອຍເຊັ່ນກັນ.     ທ່ານຍັງໄດ້ເວົ້າວ່າ: ໃນກອງປະຊຸມຄັ້ງນີ້ ພວກເຮົາຈະໄດ້ສຸມໃສ່ຄົ້ນຄວ້າພິຈາລະນາ ບັນຫາເນື້ອໃນຕົ້ນຕໍ່ດັ່ງນີ້:
1. ພິຈາລະນາ ປະກອບຄໍາເຫັນໃສ່ບົດສະຫຼຸບການເຄື່ອນໄຫວວຽກງານ ຂອງກຳມາທິການ ປ້ອງກັນຊາດ-ປ້ອງກັນຄວາມສະຫງົບ ປະຈຳປີ 2019 ແລະ ແຜນ ການເຄື່ອນໄຫວປະຈຳປີ 2020.
2. ຄົ້ນຄວ້າປະກອບຄຳເຫັນໃສ່ຮ່າງມະຕິ ກອງປະຊຸມຄົບຄະນະ ຂອງກຳມາທິການ ປກຊ-ປກສ ປະຈຳປີ 2019.
ສະນັ້ນ, ເພື່ອເຮັດໃຫ້ ກອງປະຊຸມມີປະສິດທິຜົນ ແລະ ມີເນື້ອໃນຄົບຖ້ວນ-ເລິກເຊິ່ງ, ເຂົ້າສູ່ປະເດັນ, ແທດເໝາະກັບສະພາບຕົວຈິງ, ເອົາຄວາມຈິງມາເວົ້າ, ສາມາດຮັບຮອງເອົາ ແລະ ນຳໄປຈັດຕັ້ງປະຕິບັດ ຜັນຂະຫຍາຍ ໃຫ້ໄດ້ຮັບໝາກຜົນທີ່ດີນັ້ນ ຈຶ່ງຮຽກຮ້ອງ ມາຍັງບັນດາທ່ານ ກຳມະການ ຂອງກຳມາທິການ ກໍຄືຜູ້ແທນກອງປະຊຸມ ຈົ່ງໄດ້ພ້ອມກັນເພີ່ມທະວີຄວາມຮັບຜິດຊອບຂອງຕົນ ປະກອບຄຳຄິດ-ຄຳເຫັນ ກ້າຫານ ໃສ່ບັນ ຫາຕ່າງໆ ຢ່າງກົງໄປ-ກົງມາ, ມີລັກສະນະສ້າງສັນ, ມີຈຸດສຸມ ເພື່ອຊອກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ວິທີແກ້ໄຂໃນຕໍ່ໜ້າ.
(ຂ່າວ-ພາບ: ບຸນຕອມ)