ສາລະວັນ ຍົກສູງຄຸນນະພາບວຽກງານການເມືອງ-ແນວຄິດ


...

18.10.2019 10:28     

   ແຂວງສາລະວັນ ໄດ້ຈັດກອງປະຊຸມແລກປ່ຽນຄຳຄິດເຫັນກ່ຽວກັບການຍົກສູງຄຸນນະພາບວຽກງານການເມືອງ-ແນວຄິດຂຶ້ນໃນວັນທີ 16 ຕຸລາໂດຍເປັນກຽດເຂົ້າຮ່ວມຂອງທ່ານ ສີປະເສີດ ແສນສະຫວັດ ຮອງຫົວໜ້າຄະນະໂຄສະນາອົບຮົມສູນກາງພັກ, ມີຄະນະປະຈຳພັກແຂວງ, ກຳມະການພັກແຂວງ, ຫົວໜ້າພະແນກການ-ຮອງພະແນກການຕ່າງໆອ້ອມຂ້າງແຂວງ ແລະ ອົງການຈັດຕັ້ງມະຫາຊົນ ພ້ອມດ້ວຍຫົວໜ້າຄະນະໂຄສະນາອົບຮົມເມືອງໃນ 8 ຕົວເມືອງເຂົ້າຮ່ວມ.
    ທ່ານ ສີເຮັ່ງ ຫອມສົມບັດ ກຳມະການປະຈຳພັກແຂວງ ຫົວໜ້າຄະນະໂຄສະນາອົບຮົມ ແຂວງສາລະວັນ ກໍໄດ້ລາຍງານສະພາບການໂດຍຫຍໍ້, ແຂວງສາລະວັນ ກໍແມ່ນແຂວງໜຶ່ງທີ່ເປັນພື້ນຖານຂອງການປະຕິວັດມາແຕ່ດົນນານກ່ອນມີພັກນຳ ພາຂະບວນການຕໍ່ສູ້ຕ່າງໆໄດ້ລຸກຂຶ້ນຕໍ່ສູ້ຢ່າງພິລະອາດຫານ ເປັນຕົ້ນກໍແມ່ນຂະບວນການຕໍ່ສູ້ຂອງອົງແກ້ວ ໃນຊຸມປີ 1901-1910 ແລະ ໄດ້ຮັບໄຊຊະນະເປັນກ້າວໆມາ ຊຶ່ງທົ່ວແຂວງມີເນື້ອທີ່ທັງໝົດ 10.691 ກິໂລຕາແມັດ, ມີປະຊາກອນທັງໝົດ 4 ແສນກວ່າຄົນ, ປະກອບມີ 8 ຕົວເມືອງ 579 ບ້ານ ແລະ ມີ 72 ພັນກວ່າຄອບຄົວ, ມີບ້ານທຸກຍາກ 40 ກວ່າບ້ານ ແລະ 2 ພັນກວ່າຄອບຄົວ, ການຂະຫຍາຍຕົວທາງດ້ານເສດຖະກິດສະເລ່ຍ 7,5% ຕໍ່ປີ, ລວມຍອດຜະລິດຕະພັນພາຍໃນສະເລ່ຍຕໍ່ຫົວຄົນ 10 ລ້ານກວ່າກີບ ຫຼື ເທົ່າກັບ 1.290 ໂດລາ, ນອກຈາກນັ້ນ ກໍແມ່ນວຽກງານກະກຽມກອງປະຊຸມໃຫຍ່ 3 ຂັ້ນຂອງພັກ, ປັດຈຸບັນທົ່ວແຂວງມີສະມາຊິກພັກທັງໝົດ 13 ພັນກວ່າສະຫາຍ ຍິງ 2 ພັນກວ່າສະຫາຍ, ມີ 942 ໜ່ວຍພັກຮາກຖານ, ໃນນັ້ນໜ່ວຍພັກແຂງຮູ້ນຳພາຮອບດ້ານກວມ 80%, ການກະກຽມກອງປະຊຸມໃຫຍ່ 3 ຂັ້ນຂອງພັກ ກໍໄດ້ດຳເນີນໄປຢ່າງເປັນຂະບວນຟົດຟື້ນພາຍຫຼັງໄດ້ມີມະຕິຂອງສູນກາງພັກ, ຄະນະປະຈຳພັກແຂວງ ກໍໄດ້ອອກມະຕິເລກທີ 02/ຄຈພຂ, ຂໍ້ຕົກລົງເລກທີ 153,154 ລົງວັນທີ 5 ກໍລະກົດ ປີ 2018 ກ່ຽວກັບການກະກຽມກອງປະຊຸມຢ່າງເປັນລະບົບຄົບຊຸດ ແລະ ສອດຄ່ອງກັບມະຕິຄຳສັງຂັ້ນເທິງວາງອອກ, ປັດຈຸບັນຂັ້ນແຂວງໄດ້ກະກຽມຮ່າງລາຍງານການເມືອງ, ແຜນພັດທະນາເສດຖະກິດ-ສັງຄົມສຳເລັດໂດຍພື້ນຖານ, ສຳລັບຂັ້ນເມືອງແມ່ນສຳເລັດໄປແລ້ວ 3 ເມືອງຄື: ເມືອງສະໝ້ວຍ, ເມືອງຕະໂອ້ຍ ແລະ ເມືອງຕຸ້ມລ້ານ ພ້ອມນັ້ນຄະນະໂຄສະນາອົບຮົມແຂວງຍັງໄດ້ເອົາໃຈໃສ່ໃນການຜັນຂະຫຍາຍມະຕິ X ຂອງພັກ ແລະ ມະຕິ VIII ຂອງອົງຄະນະພັກແຂວງໃຫ້ເຂົ້າສູ່ລວງເລິກ.
    ຈາກນັ້ນ ທ່ານ ສີປະເສີດ ແສນສະຫວັດ ກໍໄດ້ຍົກໃຫ້ເຫັນຫຼາຍສາເຫດ, ຫຼາຍບັນຫາ ແລະ ຫຼາຍປະກົດການທີ່ເກີດຂຶ້ນກ່ຽວກັບການຍົກສູງຄຸນນະພາບວຽກງານການເມືອງ-ແນວຄິດເປັນຕົ້ນກໍແມ່ນປະກົດການຫຍໍ້ທໍ້, ບັນຫາເສດຖະກິດ, ບັນຫາຊົນຊັ້ນຖານະ ພ້ອມດ້ວຍຄວາມສາມັກຄີຕ່າງໆ ແລະ ການແກ້ໄຂຄວາມທຸກຍາກໃນເຂດຫ່າງໄກສອກຫຼີກ, ຄວາມຫ່າງເຫີນຈາກປະຊາຊົນ, ນອກຈາກນັ້ນ ກໍໄດ້ຍົກໃຫ້ເຫັນກ່ຽວກັບການປົກປັກຮັກສາປະເທດຊາດ, ການຕໍ່ສູ້ຂອງຂະບວນການຕ່າງໆໃນແຕ່ລະໄລຍະ ແລະ ການເສຍສະຫຼະຂອງທ່ານຜູ້ນຳ.
(ພາບ-ຂ່າວ: ສິດຕາ ເພັດວົງສາ)