ເມືອງ​ຫົງ​ສາ ດຳ­ເນີນ​ກອງ​ປະ­ຊຸມ​ທາ​ບ​ທາມ​ບຸກ​ຄະ­ລາ​ກອນ ຮອບ​ທີ II

22.10.2019 9:19     

  ເພື່ອ​ເປັນ​ການ​ກະກຽມ​ໃຫ້​ແກ່​ການ​ດຳເນີນ​ກອງ​ປະຊຸມ​ໃຫຍ່ ຄັ້ງ​ທີ VIII ຂອງ​ອົງຄະນະ ​ພັກ​ເມືອງ​ຫົງ​ສາ ແຂວງ​ໄຊ​ຍະ​ບູ​ລີ ທີ່​ຈະ​ເປີດ​ຂຶ້ນ​ໃນ​ມໍ່ໆນີ້, ດັ່ງ ນັ້ນ, ໃນ​ວັນ​ທີ 18 ຕຸລາຜ່ານມາ ຈຶ່ງ​ໄດ້​ເປີດ​ກອງ​ປະຊຸມ​ທາ​ບ​ ທາມ​ບຸກ​ຄະລາ​ກອນ ຮອບ​ທີ II ຂຶ້ນ​ທີ່​ສະ ໂມສອນ​ຂອງ​ເມືອງ ໂດຍ​ພາຍ​ໃຕ້​ການ​ເປັນ​ປະທານ​ຮ່ວມ​ຂອງສະຫາຍ ດວງ​ຕາ ໄຊ​ວຸດ ກຳມະການ​ປະຈຳ​ພັກ​ແຂວງ ປະທານ​ຄະນະ​ກວດກາ​ພັກ​-​ຫົວໜ້າ​ກວດກາ​ລັດ​ແຂວງ​ໄຊ​ຍະ​ບູ​ລີ, ສະຫາຍ ຄຳ​ຫຼ້າ ຜິວ​ວັນນາ ວ່າການ​ເລຂາ​ພັກ​ເມືອງ ວ່າການ​ເຈົ້າເມືອງ​ຫົງ​ສາ, ມີ​ຄະນະ​ທີ​ມ​ງານ​ຊີ້​ນຳ​ຂັ້ນ​ແຂວງ, ຄະນະ​ປະຈຳ​ພັກ​ເມືອງ, ກຳມະການ​ພັກ​ເມືອງ, ເລ​ຂາ​-​ຮອງ​ເລຂາ​ຄະນະ​ພັກ​ຮາກ​ຖານ, ເລ​ຂາ​-​ຮອງ​ເລຂາ​ໜ່ວຍ​ພັກ​ສຳນັກງານ, ອົງການ, ທະຫານ, ຕຳຫຼວດ, ໂຮງຮຽນ ແລະ ບ້ານ​ເຂົ້າ​ຮ່ວມ​ທັງ​ໝົດ 182 ສະຫາຍ ຍິງ 29 ສະ​ຫາຍ.

  ກອງ​ປະຊຸມ​ຄັ້ງ​ນີ້, ໄດ້​ຮັບ​ຟັງ​ການ​ຜ່ານ​ຮ່າງ​ບົດ​ລາຍ​ງານ​ການເມືອງ​ຂອງ​ເມືອງ​ໂດຍ​ຫຍໍ້, ຜ່ານ​ຮ່າງ​ແຜນ​ພັດທະນາ​ເສດ​ຖະ​ກິດ​-​ສັງຄົມ ແລະ ຜ່ານ​ຮ່າງ​ບົດ​ສຳຫຼວດ​ການ​ນຳພາ​ລວມ​ຂອງ​ອົງຄະ​ນະ​ພັກ​ເມືອງ​ຊຸດ​ເກົ່າ. ພ້ອມ​ນີ້, ກອງ​ປະຊຸມ​ກໍ່​ໄດ້​ແບ່ງ​ກຸ່ມ ເພື່ອ​ປະກອບ​ຄຳ​ຄິດ​ເຫັນ​ໃສ່​ຮ່າງ​ບົດ​ລາຍ​ງານ​ການເມືອງ, ຮ່າງ​ແຜນ​ພັດທະນາ​ເສດ​ຖະ​ກິດ​-​ສັງຄົມ ແລະ ຮ່າງ​ບົດ​ສຳຫຼວດ​ການ​ນຳ​ພາ. ທັງ​ນີ້, ກໍເພື່ອ​ຄວາມ​ເປັນ​ເອກະ​ພາບ ແລະ ຮັບຮອງ​ເອົາ​ບັນດາ​ເນື້ອ​ໃນ​ດັ່ງກ່າວ ເພື່ອ​ນຳ​ສະເໜີ​ຕໍ່​ກອງ​ປະຊຸມ​ໃຫຍ່ ຄັ້ງ​ທີ VIII ຂອງ​ອົງຄະ​ນະ​ພັກ​ເມືອງ​ຫົງ​ສາ. ຈາກ​ນັ້ນ, ກອງ​ປະຊຸມ​ຍັງ​ໄດ້​ຜ່ານ​ມາດຖານ​ເງື່ອນໄຂ​ຂອງ​ຄະນະ​ບໍລິຫານ​ງານ​ພັກ​ເມືອງ, ຄະນະ​ປະຈຳ​ພັກ​ເມືອງ, ເລ​ຂາ​-​ຮອງ​ເລຂາ​ພັກ​ເມືອງ ແລະ ປະ​ທານ​-​ຮອງ​ປະທານ​ຄະນະ​ກວດກາ​ພັກ​ເມືອງ, ທາບ​ທາມ​ຄຳ​ຄິດ​ຄຳ​ເຫັນ​ຄຳ​ຕຳ​ນິ​ສົ່ງ​ຂ່າວ​ຕໍ່​ການ​ນຳພາ​ລວມ​ຂອງ​ຄະນະ​ບໍລິຫານ​ງານ​ພັກ​ເມືອງ, ຕໍ່​ບຸກຄົນ​ໃນ​ຄະນະ​ບໍລິຫານ​ງານ​ພັກ​ເມືອງ ແລະ ຫົວໜ້າ​ຫ້ອງການ​ທີ່​ບໍ່​ແມ່ນ​ກຳມະການ​ພັກ​ເມືອງ ພ້ອມ​ທັງ​ອະທິບາຍ​ການ​ລົງ​ຄະແນນ​ສຽງ​ໃສ່​ຮ່າງ​ ທາ​ບ​ທາມ​ຕື່ມ​ອີກ.

  ທັງ​ນີ້ກໍເພື່ອ​ກະກຽມ​ໃຫ້​ແກ່​ກອງ​ປະຊຸມ​ໃຫຍ່ ຄັ້ງ​ທີ VIII ຂອງ​ອົງຄະ​ນະ​ພັກ​ເມືອງ​ຫົງ​ສາ ທີ່​ຈະ​ເປີດ​ຂຶ້ນ​ໃນຕໍ່ໜ້າ​ນີ້, ໃຫ້​ບັນລຸ​ຜົນສຳເລັດ​ຕາມ​ລະດັບ​ຄາດ​ໝາຍ.
(ພາບ​-​ຂ່າວ: ກິດ​ຕິ​ສັກ ບົວ​ໄລ)