ມອບ-ຮັບໜ້າທີ່ ເລຂາພັກ ລັດຖະມົນຕີ ກະຊວງ ຖວທ ລະຫວ່າງ ຜູ້ເກົ່າ ກັບ ຜູ້ໃໝ່

31.10.2019 10:05     

  ພິທີມອບ-ຮັບ ໜ້າທີ່ເລຂາຄະນະພັກກະຊວງ ລັດ ຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ລະຫວ່າງ ສະຫາຍ ບໍ່ແສງຄຳ ວົງດາລາ ກຳມະການສູນກາງພັກ ລັດຖະມົນຕີກະຊວງ ຖວທ ຜູ້ເກົ່າ ກັບ ສະຫາຍ ກິແກ້ວ ໄຂຄຳພິທູນ ຄະນະເລຂາທິການສູນກາງພັກ ວ່າການລັດຖະມົນຕີກະຊວງ ຖວທ ຜູ້ໃໝ່ ໄດ້ຈັດຂຶ້ນຢ່າງສົມກຽດ ທີ່ຫໍວັດທະນະທຳແຫ່ງຊາດ ເມື່ອຕອນເຊົ້າຂອງວັນທີ 30 ຕຸລານີ້ ໂດຍການເຂົ້າຮ່ວມເປັນກຽດຂອງ ສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ ພ້ອມດ້ວຍຄະນະພັກກະຊວງ, ຫົວໜ້າກົມ, ຮອງກົມ, ຫົວໜ້າພະແນກ ແລະ ແຂກຖືກເຊີນເຂົ້າຮ່ວມ.
ໃນພິທີ ພາຍຫຼັງ ສະຫາຍ ບົວເງິນ ຊາພູວົງ ຮອງເລຂາຄະນະພັກ ຮອງລັດຖະມົນຕີກະຊວງ ຖວທ ໄດ້ຂຶ້ນສະເໜີຈຸດປະສົງ ແລະ ແຂກເຂົ້າຮ່ວມແລ້ວ, ທ່ານ ນາງ ບຸດສະດີ ທະນະເມືອງ ຕາງໜ້າຄະນະຈັດຕັ້ງສູນກາງພັກ ອ່ານມະຕິຕົກລົງເລກທີ 088/ກມສພ ລົງວັນທີ 16/9/2019 ວ່າດ້ວຍການອະນຸມັດໃຫ້ພະນັກງານອອກພັກການຮັບອຸດໜູນບຳນານ, ຄຳສັ່ງເລກທີ 077/ກມສພ ລົງວັນທີ 13/9/2019 ວ່າດ້ວຍການຍົກຍ້າຍພະນັກງານການນຳຂັ້ນສູງໄປຮັບໜ້າທີ່ໃໝ່, ມະຕິຕົກລົງເລກທີ 078/ກມສພ ລົງວັນທີ 13/9/2019 ວ່າດ້ວຍການແຕ່ງຕັ້ງເລຂາຄະນະບໍລິຫານງານພັກກະຊວງ ຖວທ ແລະ ດຳລັດເລກທີ 356/ນຍ ລົງວັນທີ 8/10/2019 ວ່າດ້ວຍການແຕ່ງຕັ້ງ ວ່າການລັດຖະມົນຕີກະຊວງ ຖວທ. ຈາກນັ້ນ ສະຫາຍລັດຖະມົນຕີກະຊວງ ຖວທ ຜູ້ເກົ່າ ກໍໄດ້ຂຶ້ນຜ່ານບົດສະຫຼຸບຫຍໍ້ການຊີ້ນຳ-ນຳພາໃນໄລຍະຜ່ານມາ ແລະ ກ່າວມອບໜ້າທີ່, ຕິດຕາມດ້ວຍການຈັດພິທີເຊັນບົດບັນທຶກມອບ-ຮັບໜ້າທີ່ຢ່າງເປັນທາງການ. ໃນພິທີ ຍັງໄດ້ມີການມອບກະຕ່າດອກໄມ້ໃຫ້ສະຫາຍ ບໍ່ແສງຄຳ ວົງດາລາ ແລະ ຮັບຟັງການໂອ້ລົມຈາກ ສະຫາຍ ພັນຄຳ ວິພາວັນ ຊຶ່ງກ່ອນອື່ນ ທ່ານໄດ້ສະແດງຄວາມຍ້ອງຍໍຊົມເຊີຍຜົນງານກະຊວງ ຖວທ ໃນໄລຍະຜ່ານມາ ພາຍໃຕ້ການຊີ້ນຳ ແລະ ນຳພາຂອງລັດຖະມົນຕີຜູ້ເກົ່າ ກໍຄືຂອງອົງຄະນະພັກກະຊວງ ຖວທ ພ້ອມດຽວກັນນີ້ ກໍໄດ້ໃຫ້ທິດຊີ້ນຳຕໍ່ການເຮັດວຽກງານໃນຕໍ່ໜ້າໃຫ້ແກ່ສະຫາຍລັດຖະມົນຕີຜູ້ໃໝ່.
ສະຫາຍ ພັນຄຳ ວິພາວັນ ໄດ້ກ່າວບາງຕອນສຳຄັນວ່າ: ການຕົກລົງຂອງກົມການເມືອງ ແລະ ຄະນະເລຂາທິການສູນກາງພັກກ່ຽວກັບການປະຕິບັດນະໂຍບາຍອອກພັກການຮັບອຸດໜູນບຳນານ ແລະ ການຈັດວາງຊັບຊ້ອນພະນັກງານນຳພາຄຸ້ມຄອງຂັ້ນສູງຂອງສູນກາງພັກຈຳນວນໜຶ່ງແມ່ນອີງຕາມມະຕິຕົກລົງຂອງກົມການເມືອງສູນກາງພັກວ່າດ້ວຍມາດຖານ ແລະ ເງື່ອນໄຂຂອງພະນັກງານນຳພາຄຸ້ມຄອງ, ອີງຕາມນະໂຍບາຍລວມຂອງພັກ-ລັດຂອງພວກເຮົາ ໂດຍສະເພາະແມ່ນກົດໝາຍວ່າດ້ວຍລັດຖະກອນແຫ່ງ ສປປ ລາວ. ດັ່ງນັ້ນ, ກົມການເມືອງສູນກາງພັກ ແລະ ຄະນະເລຂາທິການສູນກາງພັກຈຶ່ງໄດ້ຕົກລົງໃຫ້ສະຫາຍ ບໍ່ແສງຄໍາ ວົງດາລາ ອອກພັກການຮັບອຸດໜູນບຳນານ ການຮັບນະໂຍບາຍດັ່ງກ່າວເປັນສິ່ງຢັ້ງຢືນເຖິງການເຮັດສຳເລັດໜ້າທີ່ຕໍ່ປະເທດຊາດ ແລະ ປະຊາຊົນ ແລະ ຕິດພັນກັບການຍົກຍ້າຍຊັບຊ້ອນ ສຳລັບສະຫາຍ ກິແກ້ວ ໄຂຄຳພິທູນ ໄດ້ຮັບການແຕ່ງຕັ້ງມາຮັບໜ້າທີ່ໃໝ່ ຂໍຮຽກຮ້ອງໃຫ້ທຸກຄົນ ທຸກພາກສ່ວນໃນອົງການຈັດຕັ້ງຈົ່ງໃຫ້ການຮ່ວມມືເພື່ອປະກອບສ່ວນເຮັດສຳເລັດໜ້າທີ່ຕາມການຈັດຕັ້ງຂັ້ນເທິງມອບໝາຍໃຫ້.
(ຂ່າວ-ພາບ: ພູວັນ)