ສນຊ ເຜີຍແຜ່ຜົນສຳເລັດກອງປະຊຸມສະໄໝ ສາມັນເທື່ອທີ 7 ຂອງສະພາແຫ່ງຊາດ ຊຸດທີ VIII


...

01.10.2019 9:12     

   ສູນກາງແນວລາວສ້າງຊາດ (ສນຊ) ໄດ້ຈັດພິທີເຜີຍແຜ່ ຜົນສໍາເລັດກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ VIII ຂຶ້ນໃນວັນທີ 30 ກັນຍານີ້ ທີ່ ສນຊ, ເຜີຍແຜ່ໂດຍທ່ານ ບຸນປອນ ບຸດຕະນະວົງ ກໍາມະການສູນກາງພັກ ຮອງປະທານສະພາແຫ່ງຊາດ ຊຶ່ງມີຮອງປະທານ ພ້ອມດ້ວຍພະນັກງານ-ລັດຖະກອນອ້ອມຂ້າງ ສນຊ ເຂົ້າຮ່ວມ.
ຈຸດປະສົງ ໃນການເຜີຍແຜ່ຄັ້ງນີ້ ແມ່ນເພື່ອເປັນການຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ຜົນສໍາເລັດຂອງກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ VIII ໃຫ້ຕິດພັນກັບການຜັນຂະຫຍາຍມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 8 (ສະໄໝທີ X) ຊຸກຍູ້ການຈັດຕັ້ງປະຕິບັດແຜນພັດ ທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດໃຫ້ບັນລຸຕາມລະດັບຄາດໝາຍ ເພື່ອໂຄສະນາໃຫ້ທົ່ວປວງຊົນ ຮັບຮູ້ເຊື່ອມຊຶມຢ່າງກວ້າງຂວາງ ແລະ ເຂົ້າຮ່ວມຈັດຕັ້ງປະຕິບັດບັນດາວຽກງານດັ່ງກ່າວ.
ທ່ານຮອງປະທານສະພາແຫ່ງຊາດ ໄດ້ເຜີຍແຜ່ 4 ເນື້ອໃນຄື: ມະຕິກອງປະຊຸມສະພາແຫ່ງຊາດ; ບົດລາຍງານຂອງລັດຖະບານ; ບົດຊີ້ແຈງຕໍ່ກອງປະຊຸມສະພາແຫ່ງຊາດ ແລະ ບັນດາກົດໝາຍສ້າງໃໝ່ ໂດຍເນັ້ນໜັກບັນດາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະ ບົດລາຍງານຂອງລັດຖະບານໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2019; ບົດລາຍງານກ່ຽວກັບວຽກງານທ່ອງທ່ຽວ ຕິດພັນກັບການຈັດຕັ້ງປະຕິບັດປີທ່ອງທ່ຽວ ລາວ-ຈີນ; ບົດລາຍງານກ່ຽວກັບການພັດທະນາຊັບພະຍາກອນມະນຸດທີ່ຕິດພັນກັບການພັດທະນາເສດຖະກິດ-ສັງຄົມ ໂດຍສະເພາະແມ່ນຂະແໜງກະສິກໍາ, ຄູ ແລະ ພະຍາບານ ເພື່ອສາມາດຕອບສະໜອງໃຫ້ແກ່ການພັດທະ ນາປະເທດຊາດ ແລະ ແກ້ໄຂຄວາມທຸກຍາກ; ບົດລາຍງານກ່ຽວກັບຄໍາຕັດສິນຂອງສານ, ມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ຊີ້ແຈງຕໍ່ຄໍາຊັກຖາມ ກ່ຽວກັບການຄຸ້ມຄອງການອອກໃບຕາດິນ, ການອອກໃບຕາດິນຊໍ້າຊ້ອນ, ມະຕິວ່າດ້ວຍການຟື້ນຟູປ່າໄມ້, ມະຕິວ່າດ້ວຍການຮັບຮອງເອົາການເລືອກຕັ້ງປະທານສານປະຊາຊົນສູງສຸດ, ມະຕິວ່າດ້ວຍການຮັບຮອງການແຕ່ງຕັ້ງລັດຖະມົນຕີປະຈໍາສໍານັກງານນາຍົກລັດຖະມົນຕີ ແລະ ໃນຕອນທ້າຍຂອງກອງປະຊຸມທ່ານຮອງປະທານຍັງໄດ້ເຜີຍແຜ່ກົດໝາຍສ້າງໃໝ່ ແລະ ກົດໝາຍທີ່ໄດ້ປັບປຸງໃໝ່ ອີກດ້ວຍ.
(ຂ່າວ-ພາບ: ສນຊ)