ໜ່ວຍພັກກົມມາດຕະຖານ ແລະ ວັດແທກ ດຳເນີນກອງປະຊຸມໃຫຍ່

01.11.2019 9:11     

  ກອງປະຊຸມໃຫຍ່ ຄັ້ງທີ II ຂອງໜ່ວຍພັກກົມມາດຕະ ຖານ ແລະ ວັດແທກ ກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ຈັດຂຶ້ນໃນວັນທີ 30 ຕຸລາຜ່ານມາ ທີ່ສະຖາບັນນິເວດວິທະຍາ ແລະ ເຕັກ ໂນ ໂລຊີຊີວະພາບ ກວຕ ໂດຍການໃຫ້ກຽດເຂົ້າຮ່ວມຂອງສະຫາຍ ບໍ່ວຽງຄໍາ ວົງດາລາ ກໍາມະການສູນກາງພັກ ເລຂາຄະນະພັກ ລັດຖະມົນຕີ ກວຕ, ມີຄະນະພັກກົມມາດຕະຖານ ແລະ ວັດແທກ, ແຂກຖືກເຊີນ ພ້ອມດ້ວຍສະມາຊິກພັກສົມບູນ ແລະ ສໍາຮອງເຂົ້າຮ່ວມຢ່າງ ພ້ອມພຽງ. ໃນກອງປະຊຸມ, ສະຫາຍ ວຽງທອງ ວົງທະວິໄລ ເລຂາໜ່ວຍພັກ ກົມມາດຕະຖານ ແລະ ວັດແທກໄດ້ຜ່ານບົດລາຍ ງານການເມືອງ ໃນໄລຍະ 5 ປີທີ່ຜ່ານມາ ຊຶ່ງໄດ້ຍົກໃຫ້ເຫັນດ້ານດີ, ອ່ອນ, ຂໍ້ຂາດຕົກບົກຜ່ອງ, ບົດຮຽນທີ່ຖອດຖອນໄດ້ ແລະແຜນການຕໍ່ໜ້າ ຊຶ່ງຕະຫຼອດໄລຍະທີ່ຜ່ານມາ, ໜ່ວຍພັກ ໄດ້ຊີ້ນໍາໆພາການເຄື່ອນໄຫວວຽກງານວິຊາສະເພາະ ດ້ວຍຄວາມເອົາໃຈໃສ່ ແລະ ມີຜົນສໍາເລັດທີ່ພົ້ນເດັ່ນ ເປັນຕົ້ນແມ່ນໄດ້ສໍາເລັດການສ້າງ ແລະ ປະກາດໃຊ້ ບັນດານິຕິກໍາລຸ່ມກົດໝາຍ ທັງໝົດມີ 11 ສະບັບ, ໄດ້ສໍາເລັດການຮັບຮອງ ແລະ ປະກາດໃຊ້ມາດຕະຖານແຫ່ງຊາດຈໍານວນ 442 ມາດຕະຖານ ຊຶ່ງໃນນັ້ນແມ່ນໄດ້ຮັບຮອງເອົາມາດຕະຖານສາກົນມາເປັນ ມາດຕະຖານແຫ່ງຊາດ ຈໍານວນ 400 ມາດຕະຖານ ແລະ ຄົ້ນຄວ້າສ້າງຂຶ້ນໃໝ່ ຈໍານວນ 42 ມາດຕະຖານ. ສປປ ລາວ ໄດ້ເຂົ້າເປັນ ສະມາຊິກຜູ້ສັງເກດການຂອງອົງການມາດຕະຖານສາກົນ ໃນວັນທີ 1 ມັງກອນ 2007 ແລະ ໄດ້ເລື່ອນເປັນສະມາຊິກເຄິ່ງສົມບູນ ໃນວັນທີ 1 ມັງກອນ 2017 ແລະ ເຂົ້າຮ່ວມ ໃນຄະນະກໍາມະການເຕັກນິກຂອງອົງການມາດຕະຖານສາກົນ 5 ໜ່ວຍງານຄື: ໜ່ວຍງານການບໍລິຫານຈັດການຄຸ້ມຄອງ ລະບົບ, ໜ່ວຍງານການບໍລິ ຫານຈັດການຄຸ້ມຄອງສິ່ງແວດລ້ອມ, ໜ່ວຍງານເຫຼັກ, ໜ່ວຍງານເຟີນີເຈີ ແລະ ໜ່ວຍງານໄມ້ ພ້ອມທັງໄດ້ອອກໃບຢັ້ງຢືນກາໝາຍແຫ່ງຊາດ ຈໍານວນ 18 ບໍລິສັດ, ຂຶ້ນທະບຽນຜະລິດຕະພັນສິນຄ້າ ຈໍານວນ 33 ຜະລິດຕະພັນ, ຂຶ້ນທະບຽນສິນຄ້ານໍາເຂົ້ານໍ້າມັນເຊື້ອໄຟ ຈໍານວນ 35 ບໍລິສັດ, ຂຶ້ນທະບຽນກົດລະຫັດສາກົນ (ບາໂຄດ) ໄດ້ຈໍານວນ 72 ບໍລິສັດ, ກວດສອບເຄື່ອງໃຊ້ໄຟຟ້າໃນຄົວເຮືອນ ແລະ ເຄື່ອງເອເລັກໂຕຣນິກປະຈໍາດ່ານ ທັງໝົດ 25 ບໍລິສັດ, ກວດສອບຜະລິດຕະພັນວັດສະດຸກໍ່ສ້າງປະຈໍາດ່ານ ທັງໝົດ 21 ບໍລິສັດ. ນອກຈາກນີ້ ຍັງໄດ້ສໍາເລັດການເປີດຫ້ອງກວດກາສິນຄ້າປະຈໍາດ່ານສາກົນ ທັງໝົດ 17 ດ່ານ ໃນຈໍານວນ 11 ແຂວງ ໃນຂອບເຂດທົ່ວປະເທດ; ດໍາເນີນການກວດສອບນໍ້າມັນເຊື້ອໄຟປະຈໍາດ່ານ ສາມາດກວດສອບ ລົດຊີແທັກນໍ້າມັນໄດ້ທັງໝົດຈໍານວນ 91.688 ເທື່ອຄັນ, ລວມຈໍານວນນໍ້າມັນທັງໝົດທີ່ກວດສອບໄດ້ ຈໍານວນ 3.556.204.382 ລິດ ຄຽງ ຄູ່ກັນ ກໍໄດ້ເອົາໃຈໃສ່ວຽກງານ ວັດແທກກວດສອບຊິງຊັ່ງລົດ ບັນທຸກໄດ້ຈໍານວນ 145 ຫົວ ໜ່ວຍ, ຊິງຊັ່ງຫ້ອງທົດລອງ 199 ໜ່ວຍ, ແມ່ແບບນໍ້າໜັກໄດ້ຈໍານວນ 353 ໜ່ວຍ, ສອບທຽບຫົວຈ່າຍສາງນໍ້າມັນເຊື້ອໄຟ ແລະ ຖັງຜອງບໍລິມາດ ໄດ້ຈໍານວນ 337 ຄັ້ງ, ຄາລິບເບີ, ໄມໂຄຣແມັດເຕີ ແລະ ໄມ້ແມັດໄດ້ຈໍານວນ 27 ອັນ, ເຄື່ອງແທກອຸນຫະພູມໄດ້ 79 ໜ່ວຍ, ກວດສອບລົດບັນທຸກນໍ້າມັນເຊື້ອໄຟໄດ້ທັງໝົດ 2.103 ເທື່ອຄັນ, ຂຶ້ນທະບຽນ ແລະ ກວດສອບໝໍ້ນັບໄຟຟ້າທີ່ນໍາເຂົ້າໃໝ່ ໂມໂນ ແລະ ອາເຕ ໄດ້ຈໍານວນ 1.028.820 ໜ່ວຍ, ກວດສອບສິນຄ້າຫຸ້ມຫໍ່ໄດ້ຈໍານວນ 150 ຜະລິດຕະພັນ ແລະ ວຽກງານອື່ນໆອີກ. ກອງປະຊຸມ, ໄດ້ປ່ອນບັດເລືອກເອົາຄະນະພັກຊຸດໃໝ່ ຊຶ່ງໄດ້ເລືອກເອົາສະຫາຍ ວຽງທອງ ວົງທະວິໄລ ເປັນເລຂາໜ່ວຍພັກກົມມາດຕະຖານແລະ ວັດແທກ, ເລືອກເອົາ ສະຫາຍ ນາງ ນິສິດ ຄໍາມູນເຮືອງ ເປັນຮອງເລຂາໜ່ວຍພັກ, ເລືອກເອົາ ສະຫາຍ ວຽງຄໍາ ສິງສອນໄຊ ເປັນປະທານກວດກາ, ເລືອກເອົາ ສະຫາຍ ພວງມາລາ ຈູມພະຈັນ, ສະຫາຍສົມພອນໄຊ ວົງດາລາແລະສະຫາຍ ກະດິທອງ ສິງດາລາ ເປັນຄະນະ. (ຂ່າວ: ແສງຈັນ + ຮູບ: ພູວຽງຄໍາ)