ກອງປະຊຸມເປີດກວ້າງຄົບຄະນະບໍລິຫານງານພັກ ເມືອງປາກກະດິງ

04.11.2019 9:24     

  ກອງປະຊຸມເປີດກວ້າງຄົບ ຄະນະບໍລິຫານງານພັກເມືອງປາກກະດິງ ແຂວງບໍລິຄຳໄຊ ຄັ້ງທີ 17 ສະໄໝທີ VI ໄດ້ເປີດຂຶ້ນຢ່າງເປັນທາງການ ໃນວັນທີ 30 ຕຸລາຜ່ານມາ ທີ່ຫ້ອງປະຊຸມກຸ່ມເສດຖະກິດຂອງເມືອງພາຍ ໃຕ້ການເປັນປະທານຂອງ ສະຫາຍ ສົມພອນ ຈັນທະນາສຸກ ກຳມະການພັກແຂວງ ເລຂາພັກເມືອງ ເຈົ້າເມືອງປາກກະດິງ, ມີຄະນະປະຈຳ, ກຳມະການພັກເມືອງ, ຫົວໜ້າຫ້ອງການ-ກອງບັນຊາການ ປກຊ-ປກສ ແລະ ຄະນະບ້ານ-ນາຍບ້ານທົ່ວເມືອງເຂົ້າຮ່ວມ.
ສະຫາຍ ສົມພອນ ຈັນທະນາສຸກ ກຳມະການພັກແຂວງ ເລຂາພັກເມືອງ ເຈົ້າເມືອງປາກກະດິງ ໄດ້ກ່າວເປີດກອງປະຊຸມ ບາງຕອນທ່ານກ່າວວ່າ: ໂດຍປະຕິບັດຕາມກົດລະບຽບຂອງພັກປະຊາຊົນປະຕິວັດລາວ ວ່າດ້ວຍໜ້າທີ່ຂອງຄະນະບໍລິຫານງານພັກເມືອງ 3 ເດືອນໃດ ປະຊຸມຄົບຄະນະສະໄໝສາມັນ 1 ເທື່ືອ. ກອງປະຊຸມເປີດກວ້າງຄົບຄະນະບໍລິຫານງານພັກເມືອງປາກກະດິງ ຄັ້ງທີ 17 ສະໄໝທີ VI ໄດ້ເປີດຂຶ້ນຢ່າງເປັນທາງການ ພາຍໃຕ້ບັນຍາກາດທີ່ທົ່ວພັກທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດ ກໍຄືປະຊາຊົນເມືອງປາກກະດິງ ພວມສຸມໃສ່ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ ກໍຄືມະຕິກອງປະຊຸມໃຫຍ່ຄັ້ງທີ VI ຂອງອົງຄະນະພັກແຂວງ ແລະ ເມືອງວາງອອກ ແລະ ແຜນພັດທະນາເສດຖະກິດສັງຄົມ 5 ປີ ຄັ້ງທີ III ຂອງເມືອງ ແລະ ແມ່ນໄລຍະກະກຽມສ້າງຂະບວນການຕ້ອນຮັບກອງປະຊຸມໃຫຍ່ຂອງອົງຄະນະພັກເມືອງປາກກະດິງສະໃໝທີ VII ທີ່ຈະດຳເນີນຂຶ້ນໃນຕົ້ນປີ 2020ນີ້. ກອງປະຊຸມເປີດກ້ວາງຄົບຄະນະບໍລິຫານງານພັກເມືອງປາກກະດິງ ຄັ້ງທີ 17 ສະໄໝທີ VI ຈະໄດ້ດຳເນີນເປັນເວລາ 2 ວັນ (30-31 ຕຸລາ 2019). ຊຶ່ງຈະໄດ້ຮັບຟັງການເຜີຍແຜ່ມະຕິ 056 ແລະ 058/ກມສພ ແລະ ສະຫຼຸບຕີລາຄາຄືນການຈັດຕັ້ງປະຕິບັດມະຕິກອງປະຊຸມເປີດກ້ວາງຄົບຄະນະບໍລິຫານງານພັກເມືອງປາກກະດິງ ຄັ້ງທີ 16 ສະໄໝທີ VI ແລະ ບາງຂະແໜງການຍັງຈະໄດ້ຕອບຄຳຖາມເຈາະຈີ້ມວຽກງານບາງດ້ານເພື່ອເປັນບ່ອນອີງໃຫ້ແກ່ການວາງແຜນ 3 ເດືອນປະຈຳໄຕມາດ IV ທ້າຍປີ 2019 ໃຫ້ເໝາະສົມກັບວຽກງານຕົວຈິງ.
(ຂ່າວ: ແສງທອງ)