ຍົກຍ້າຍທ່ານ ຄຳຟອງ ອິນມະນີ ໄປເປັນປະທານກວດກາພັກ-ລັດ ແຂວງຫຼວງນຳ້ທາ

06.11.2019 9:57     

  ແຂວງຫຼວງນ້ຳທາ ໄດ້ຍົກຍ້າຍ ທ່ານ ຄຳຟອງ ອິນມະນີ ປະທານສານປະຊາຊົນແຂວງ ໄປຮັບໜ້າທີ່ໃໝ່ ເປັນປະທານອົງການກວດກາພັກ - ລັດແຂວງ ຊຶ່ງພິທີມອບ -ຮັບໜ້າທີ່ໄດ້ຈັດຂຶ້ນໃນວັນທີ 4 ພະຈິກ 2019 ທີ່ຫ້ອງວ່າການແຂວງຫຼວງນ້ຳທາ ໂດຍມີ ທ່ານ ຄຳໄຫຼ ສີປະເສີດ ຮອງເຈົ້າແຂວງໆຫຼວງນໍ້າທາ, ມີພາກສ່ວນທີ່ກ່ຽວຂ້ອງເຂົ້າຮ່ວມ. ທ່ານ ຄຳເລົ່າ ແກ້ວລະກຳ ຮອງຫົວໜ້າຄະນະຈັດຕັ້ງແຂວງ ໄດ້ຜ່ານຂໍ້ຕົກລົງຂອງທ່ານເຈົ້າແຂວງເລກທີ 813/ຈຂ ລົງວັນທີ 4 ພະຈິກ 2019 ແລະ ເຈົ້າແຂວງໆຫຼວງນ້ຳທາອອກຂໍ້ຕົກລົງແຕ່ງຕັ້ງ ທ່ານ ຄຳຟອງ ອິນມະນີ ປະທານສານປະຊາຊົນແຂວງຍົກຍ້າຍໄປຮັບໜ້າທີ່ໃໝ່ ເປັນປະທານອົງການກວດກາພັກ - ລັດແຂວງຫຼວງນໍ້າທາ. ໃນພິທີ ທ່ານ ບຸນທອນ ສີສະຫວັນ ຮອງປະທານ ຮັກສາການປະທານກວດກາພັກ-ອົງການກວດກາລັດແຂວງ ໄດ້ຜ່ານບົດລາຍງານ ການຈັດຕັ້ງປະຕິບັດວຽກງານພາຍໃນຄະນະກວດກາພັກ-ອົງການກວດກາລັດແຂວງ ໄລຍະຮັກສາການແທນປະທານ ຊຶ່ງໄດ້ຍົກໃຫ້ເຫັນກ່ຽວກັບວຽກງານຕິດຕາມ,ກວດກາພັກ-ລັດ, ການປະຕິບັດກົດລະບຽບຂອງພັກ ການກໍ່ສ້າງຂະຫຍາຍພັກມາຮອດປັດຈຸບັນ ທົ່ວແຂວງມີ 5 ອົງຄະນະພັກເມືອງ, 2 ອົງຄະນະພັກກອງບັນຊາການ, 83 ຄະ ນະພັກຮາກຖານມີ 623 ໜ່ວຍພັກ ມີສະມາຊິກພັກທັງໝົດ 12.056 ສະຫາຍ ຍິງ 3.280 ສະຫາຍ, ຕິດຕາມການຄຸ້ມຄອງ ນຳໃຊ້ເງິນສະຕິພັກຢ່າງເປັນປົກກະຕິໃຫ້ຖືກຕ້ອງ. ທ່ານຮອງເຈົ້າແຂວງໆຫຼວງນໍ້າທາໄດ້ໃຫ້ກຽດໂອ້ລົມ ຊຶ່ງກ່ອນອື່ນທ່ານໄດ້ສະແດງຄວາມຍ້ອງຍໍ ຊົມເຊີຍການຈັດຕັ້ງປະຕິບັດວຽກງານກວດກາພັກ-ອົງການກວດກາລັດແຂວງໃນໄລຍະຜ່ານມາ ພ້ອມທັງເນັ້ນໜັກຫຼາຍບັນຫາ ໂດຍສະເພາະແມ່ນເອົາໃຈໃສ່ ສຶກສາອົບຮົມການເມືອງແນວຄິດ ສາມັກຄີທັງພາຍໃນ ແລະ ພາຍນອກໃຫ້ແໜ້ນແຟ້ນ ສືບຕໍ່ຈັດຕັ້ງປະຕິບັດ ຫຼັກການນຳພາຂອງພັກ ລວມສູນປະຊາທິປະໄຕ ເຮັດວຽກເປັນໝູ່ຄະນະ ປະຕິບັດພາລະບົດບາດສິດໜ້າທີ່ ທີ່ຂັ້ນເທິງມອບໝາຍໃຫ້ມີຄວາມເຂັ້ມແຂງ ແລະ ສຳເລັດຕາມລະດັບຄາດໝາຍ ແນໃສ່ເຮັດໃຫ້ວຽກງານກວດກາພັກ-ອົງການກວດກາລັດມີຄວາມໜັກແໜ້ນເຂັ້ມແຂງ ໂປ່ງໃສ ແລະ ຖືກຕ້ອງຕາມລະບຽບກົດໝາຍ. (ຂ່າວ: ມຸນຕີ)