ໜ່ວຍພັກສະຫະພັນແມ່ຍິງແຂວງອັດຕະປືສຳເລັດກອງປະຊຸມໃຫຍ່ ຄັ້ງທີ VIII

07.11.2019 10:55     

  ກອງປະຊຸມໃຫຍ່ ຄັ້ງທີ VIII ຂອງໜ່ວຍພັກສະຫະພັນແມ່ຍິງແຂວງອັດຕະປືໄດ້ເປີດຂຶ້ນ ແລະ ສໍາເລັດ ໃນວັນທີ 1 ພະຈິກຜ່ານມາ ພາຍໃຕ້ການເປັນປະທານຂອງສະຫາຍ ນາງ ຈັນເພັດ ຈັນທະມາດ ເລຂາໜ່ວຍພັກ ວ່າການປະທານສະຫະພັນແມ່ຍິງແຂວງອັດຕະປື, ເປັນກຽດເຂົ້າຮ່ວມໂດຍສະຫາຍ ນາງ ມີນາພອນ ໄຊສົມພູ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງອັດຕະປື, ມີບັນດາແຂກຖືກເຊີນພ້ອມດ້ວຍສະມາຊິກພັກພາຍໃນໜ່ວຍ ພັກເຂົ້າຮ່ວມ. ກອງປະຊຸມໃຫຍ່ຄັ້ງນີ້, ສະຫາຍ ນາງ ຈັນເພັດ ຈັນທະມາດ ໄດ້ຜ່ານບົດລາຍງານການເມືອງ ການເຄື່ອນໄຫວຈັດຕັ້ງປະຕິບັດຕະຫຼອດໄລຍະ 5 ປີຜ່ານມາ ໂດຍພາຍໃຕ້ການຊີ້ນຳ-ນຳພາໂດຍກົງຂອງຄະນະໜ່ວຍພັກ, ຄະນະປະຈໍາພັກແຂວງ ຊຶ່ງໜ່ວຍພັກສະຫະພັນແມ່ຍິງແຂວງໄດ້ເອົາໃຈໃສ່ສຶກສາອົບຮົມການເມືອງ-ນຳ ພາແນວຄິດໃຫ້ສະມາຊິກຢ່າງເປັນປົກກະຕິ ແລະ ຕໍ່ເນື່ອງ ໂດຍໄດ້ຖືເອົາການດຳເນີນຊີວິດການເມືອງປະຈຳເດືອນຂອງໜ່ວຍພັກເປັນບ່ອນຕຳນິສົ່ງຂ່າວ, ກໍສ້າງຊ່ວຍເຫຼືອຊຶ່ງກັນ ແລະ ກັນ, ຈັດຕັ້ງການຄົ້ນຄວ້າເຊື່ອມຊຶມມະຕິຄຳສັ່ງ, ແນວທາງນະໂຍບາຍຂອງພັກ, ລະບຽບກົດໝາຍ ແລະ ແຜນພັດທະນາເສດຖະກິດ-ສັງຄົມຂອງລັດ ແນໃສ່ໃຫ້ສະມາຊິກສະຫະພັນແມ່ຍິງພາຍໃນໜ່ວຍພັກຮັບຮູ້ເຂົ້າໃຈ ແລະ ຜ່ານທິດທາງແຜນການ 5 ປີຕໍ່ໜ້າ ແລະ ຄາດໝາຍສູ້ຊົນ ແຕ່ປີ2019-2024. ປັດຈຸບັນໜ່ວຍພັກສະຫະພັນແມ່ຍິງແຂວງ ມີສະມາຊິກພັກສົມບູນທັງໜົດ 18 ສະຫາຍ, ຊາຍ 1 ສະຫາຍ ຄະນະພັກ,ສະມາຊິກພັກໄດ້ສູ້ຊົນຈັດຕັ້ງປະຕິບັດແຜນການກໍ່ສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານ ໄດ້ຮັບໃບຢັ້ງຢືນປີ 2014. ປັດຈຸບັນມີສະມາຊິກພັກປະເພດແຂງ 11 ສະຫາຍ, ຍິງ11 ສະຫາຍ, ປະເພດກາງ 2 ສະຫາຍ.ໄດ້ມອບບັດແດງໃຫ້ສະມາຊິກພັກສົມບູນ 12 ສະຫາຍ. ຄັດເລືອກຜົນງານໃນໄລຍະຜ່ານມາໄດ້ຮັບຫຼຽນໄຊແຮງງານຊັ້ນ II ມີ 1 ສະຫາຍ, ຫຼຽນໄຊແຮງງານຊັ້ນ III ມີ 3 ສະຫາຍ, ໃບຍ້ອງຍໍເຈົ້າແຂວງ 65 ສະຫາຍ, ຊົມເຊີຍ 50 ສະຫາຍ, ໃບຍ້ອງຍໍສູນກາງສະຫະພັນແມ່ຍິງລາວມີ 20 ສະຫາຍ, ໃບຍ້ອງຍໍຈາກຊາວໜຸ່ມ, ກຳມະບານ, ແມ່ຍິງ 59 ສະຫາຍ. ສະຫະພັນແມ່ຍິງແຂວງໄດ້ຮັບຫຼຽນໄຊມິດຕະ ພາບຈາກສະຫະພັນແມ່ຍິງ ສສ ຫວຽດນາມ 1 ຫຼຽນ ໃນປີ 2018. ໃນກອງປະຊຸມສະຫາຍ ນາງ ກົງຕາ ໂພສາລາດ ຮອງປະທານສະຫະພັນແມ່ຍິງແຂວງໄດ້ຂຶ້ນຜ່ານແຜນພັດທະ ນາເສດຖະກິດ-ສັງຄົມຂອງ ແຂວງກໍຄືແຜນພັດທະນາແມ່ ຍິງແຂວງໃນໄລຍະ 5 ປີ ນັບແຕ່ປີ2019-2024 ໂດຍປະຕິບັດຕາມ 8 ແຜນງານ 25 ໂຄງການ. ຈາກນັ້ນ, ກໍໄດ້ດຳເນີນການປ່ອນບັດຄັດເລືອກເອົາຄະນະໜ່ວຍພັກສະຫະພັນແມ່ຍິງຊຸດໃໝ່ ຊຶ່ງມີຜູ້ອອກສະໝັກ 5 ສະຫາຍ, ໃນກອງປະຊຸມໄດ້ເລືອກເອົາສະຫາຍ ນາງ ຈັນເພັດ ຈັນທະມາດ ເປັນເລຂາໜ່ວຍພັກຊຸດໃໜ່. ສ່ວນອີກ 2 ສະຫາຍເປັນຄະນະ. (ຂ່າວ-ພາບ: ວັດທະນາ ຫຼວງອາໄພ)