ກອງປະຊຸມໃຫຍ່ ຄັ້ງທີ VI ຂະແໜງລ້ຽງສັດ ແລະ ການປະມົງ ແຂວງຄຳມ່ວນ

07.11.2019 10:59     

  ກອງປະຊຸມໃຫຍ່ຄັ້ງທີ IV ໜ່ວຍພັກຂະແໜງລ້ຽງສັດ ແລະ ການປະມົງ ພະແນກກະສິກຳ ແລະ ປ່າໄມ້ແຂວງຄຳມ່ວນ ຈັດ ຂຶ້ນໃນວັນທີ 1 ພະຈິກ ຜ່ານມາໂດຍການເປັນປະທານຂອງສະຫາຍ ບຸນເນດ ມານະທຳ ເລຂາໜ່ວຍພັກຂະແໜງລ້ຽງສັດ ແລະ ການປະມົງ ໂດຍມີສະຫາຍ ບຸນຈັນ ໄຊປັນຍາ ເລຂາພັກຮາກຖານ ຫົວໜ້າພະແນກກະສິກຳ ແລະ ປ່າໄມ້ແຂວງ, ມີຕາງໜ້າຈາກຄະນະໂຄສະນາອົບຮົມແຂວງ, ຄະນະຈັດຕັ້ງແຂວງ, ມີບັນດາໜ່ວຍພັກອ້ອມຂ້າງ ຕະຫຼອດເຖິງສະມາຊິກພັກສົມບູນພາຍໃນໜ່ວຍເຂົ້າຮ່ວມ. ສະຫາຍ ບຸນເນດ ມານະທຳ ໄດ້ຜ່ານຮ່າງບົດລາຍງານການເມືອງ ແລະ ຜົນຂອງການ ຈັດຕັ້ງປະຕິບັດມະຕິກອງປະ ຊຸມໃຫຍ່ຄັ້ງທີ III ຜ່ານມາຊຶ່ງໜ່ວຍພັກຂະແໜງລ້ຽງສັດ ແລະ ການປະມົງ ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ສະມາຊິກພັກ, ພະນັກງານ-ລັດຖະກອນຕິດພັນ ກັບການກວດກາຕີລາຄາໜ່ວຍພັກປອດໃສເຂັ້ມແຂງ, ປັບປຸງລະບົບການຈັດຕັ້ງພັກ, ແບບ ແຜນວິທີເຮັດວຽກຂອງຄະນະພັກໃຫ້ມີຄວາມໜັກແໜ້ນ, ເຂັ້ມແຂງ. ປັດຈຸບັນມີສະມາຊິກພັກທັງໝົດ 20 ສະຫາຍ, ສຳຮອງ 1 ສະຫາຍ, ສະມາຊິກພັກກວມເອົາ 95,23% ຂອງພະນັກງານ-ລັດຖະກອນທັງໝົດ, ວຽກງານ ວິຊາສະເພາະແມ່ນໄດ້ຫັນເອົາພະນັກງານລົງເຄື່ອນໄຫວຕາມພາລະບົດບາດ ຢ່າງເປັນຂະບວນ ສາມາດບັນລຸໄດ້ຄື: ແຕ່ປີ 2014-2019 ການເກັບກຳສະຖິຕິດ້ານສັດລ້ຽງມີ ຄວາຍ 76.278 ໂຕ ເພີ່ມຂຶ້ນ 3,19%, ງົວ 146.412 ໂຕ ເພີ່ມຂຶ້ນ30,98%, ໝູລາດ 78.038 ໂຕ ເພີ່ມຂຶ້ນ 32,84%, ໝູພັນ 16.622 ໂຕ ຫຼຸດລົງ 32,22%, ແບ້ 34.033 ໂຕ ເພີ່ມຂຶ້ນ 41,21%, ສັດປີກ 1.233.502 ໂຕ ເພີ່ມຂຶ້ນ 48,72%. ວຽກງານຄຸ້ມຄອງການປະມົງ ສ້າງວັງສະຫງວນໄດ້ 49 ວັງ ເພີ່ມຂຶ້ນ 22,5%, ຈັດພິທີປ່ອຍປາ ໃນວັນປ່ອຍປາ ແຫ່ງຊາດ 13 ກໍລະກົດ ໄດ້ 38 ຄັ້ງ ມີປາທີ່ປ່ອຍທັງໝົດ 20 ລ້ານກວ່າໂຕ ເພີ່ມຂຶ້ນ 15,37%. ຈາກນັ້ນກອງປະຊຸມກໍໄດ້ໃຊ້ສິດປະຊາທິປະໄຕ ປ່ອນບັດເລືອກເອົາ ຄະນະພັກຊຸດໃໝ່ ໂດຍກອງປະຊຸມ ໄດ້ເຫັນດີເປັນເອກະພາບເລືອກເອົາສະຫາຍ ຄຳພຽນ ວິລະສັກ ເປັນເລຂາໜ່ວຍພັກ, ສະຫາຍ ເພັດສະໝຸດ ສີສະຫຼຽວ ເປັນຮອງເລຂາ ທັງເປັນປະທານກວດກາ ແລະ ສະຫາຍ ພູຂັນ ແສງສຸລິເດດ ເປັນຄະນະໜ່ວຍ. (ຂ່າວ: ກອງຄຳ)