ກອງປະຊຸມໃຫຍ່ ຄັ້ງທີ II ຂອງໜ່ວຍພັກກົມເຕັກໂນໂລຊີ ແລະ ນະວັດຕະກຳ

14.11.2019 10:31     

  ກອງປະຊຸມໃຫຍ່ ຄັ້ງທີ II ຂອງໜ່ວຍພັກກົມເຕັກໂນໂລຊີ ແລະ ນະວັດຕະກໍາໄດ້ເປີດຂຶ້ນ ໃນວັນທີ 12 ພະຈິກຜ່ານມາທີ່ສະຖາບັນນິເວດວິທະຍາ ກະຊວງວິທະຍາສາດ ແລະ ເຕັກໂນໂລ ຊີ (ກວຕ) ພາຍໃຕ້ການເປັນປະ ທານຂອງ ສະຫາຍ ບໍ່ວຽງຄຳ ວົງດາລາ ກໍາມະການສູນກາງພັກ ເລຂາຄະນະພັກ ລັດຖະ ມົນຕີ ກວຕ. ໃນກອງປະຊຸມ ສະຫາຍ ສຸມານະ ຈຸລາມະນີ ເລຂາ ໜ່ວຍ ພັກ ກົມເຕັກໂນໂລຊີ ແລະ ນະວັດຕະກໍາ (ກຕນ) ໄດ້ຂຶ້ນລາຍງານບົດສະຫຼຸບການເຄື່ອນໄຫວວຽກງານໄລຍະຜ່ານມາ ຊຶ່ງໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຂາດຕົກບົກຜ່ອງ,ບົດຮຽນທີ່ຖອດຖອນໄດ້ ແລະ ທິດທາງໃນຕໍ່ໜ້າ, ຄະນະໜ່ວຍພັກໄດ້ຊີ້ນໍາ-ນໍາພາສະມາຊິກພັກ ແລະພະນັກງານ ກຕນ ສຸມໃສ່ວຽກງານວິຊາສະເພາະຢ່າງຕັ້ງໜ້າ ໂດຍສະເພາະ ສຸມໃສ່ການສ້າງນະໂຍບາຍ,ນິຕິກໍາ,ໂຄສະນາເຜີຍແຜ່ ບົດບາດຄວາມສໍາຄັນວຽກງານ ກຕນ, ລົງຊຸກຍູ້ຮາກຖານການຜະລິດ ຮ່ວມກັບພະແນກວິທະຍາສາດ ແລະ ເຕັກໂນໂລຊີ ນວ,ແຂວງວຽງຈັນ, ສະຫວັນນະເຂດ, ຊຽງຂວາງ ແລະແຂວງບໍ່ແກ້ວ, ຈັດຕັ້ງປະຕິບັດບັນດາໂຄງການການນໍາໃຊ້ວິ ທະຍາສາດ ແລະ ເຕັກໂນໂລຊີ ເພື່ອຍົກສູງສະມັດຖະພາບການຜະລິດເປັນສິນຄ້າ ເປັນຕົ້ນ: ການຜະລິດກະສິກໍາ, ການປູກເຂົ້າ ແລະ ຜະລິດຕະພັນອື່ນໆ. ໄດ້ສໍາເລັດການສ້າງກົດໝາຍວ່າດ້ວຍການຖ່າຍທອດເຕັກໂນ ໂລຊີ ຊຶ່ງໄດ້ຮັບຮອງ ແລະ ປະ ກາດໃຊ້ ຕົ້ນປີ 2018; ຄົ້ນ ຄວ້າສ້າງຮ່າງກົດໝາຍວ່າດ້ວຍເຕັກໂນໂລຊີລະດັບສູງ; ສໍາເລັດຮ່າງດໍາລັດ ວ່າດ້ວຍການຮັບຮອງບັນຊີປະເພດເຕັກໂນໂລຊີ; ສໍາເລັດຮ່າງຂໍ້ຕົກລົງວ່າດ້ວຍມາດຕະຖານຄອບຄົວ, ບ້ານ, ເມືອງ, ນະຄອນ ທີ່ນໍາໃຊ້ວິທະຍາສາດ ແລະ ເຕັກໂນໂລຊີເຂົ້າໃນການຜະລິດເປັນສິນຄ້າ; ຄົ້ນຄວ້າສ້າງຮ່າງຂໍ້ຕົກລົງວ່າດ້ວຍ ການກວດສອບ,ຕີລາຄາແລະ ປະເມີນເຕັກໂນໂລຊີ; ຄົ້ນຄວ້າສ້າງຮ່າງແຜນແມ່ບົດ ການພັດທະນາເຕັກໂນໂລຊີແລະ ນະວັດຕະກໍາແຫ່ງຊາດ; ຄົ້ນຄວ້າຄູ່ມື, ບົດແນະນໍາກ່ຽວກັບວຽກງານເຕັກໂນໂລຊີນະວັດຕະກໍາ ຈໍານວນ 4 ສະບັບ. ສ່ວນວຽກງານຄຸ້ມຄອງເຕັກໂນໂລຊີ ເປັນວຽກງານໃໝ່ທີ່ພົ້ນເດັ່ນໃນຊຸມປີຜ່ານມາໄດ້ຄົ້ນຄວ້າພິຈາລະນາ ຈໍານວນ 10 ໂຄງການ ທີ່ຂໍອະນຸຍາດການລົງທຶນ ຄື: ການສ້າງເຂື່ອນໄຟຟ້າ, ການສ້າງໂຮງງານກັ່ນນໍ້າມັນ, ການຜະລິດນໍາໃຊ້ຄືນສິ່ງເສດເຫຼືອເຄື່ອງໃຊ້ໄຟຟ້າເອເລັກໂຕຣນິກ,ດ້ານການຜະລິດກະສິກໍາ ແລະ ວຽກງານອື່ນໆ. ກອງປະຊຸມ, ໄດ້ປ່ອນບັດ ເລືອກເອົາຄະນະພັກຊຸດໃໝ່ ຊຶ່ງໄດ້ເລືອກເອົາ ສະຫາຍ ສຸມານະ ຈຸລາມະນີ ເປັນເລຂາໜ່ວຍພັກ ກຕນ, ເລືອກເອົາ ສະຫາຍ ວິໄລສອນ ບຸບຜາລັດ ເປັນຮອງເລຂາ ແລະ ເລືອກເອົາ ສະຫາຍ ນາງ ຄຳຍອງ ສີຈັນທະວົງ ເປັນຄະນະ ທັງເປັນປະທານກວດກາ. ( ຂ່າວ: ແສງຈັນ)