ສສຂ ສະຫວັນນະເຂດຮັບຮອງເອົາຫຼາຍບັນຫາ

19.11.2019 8:46     

  ທ່ານ ຄຳເຜີຍ ຜັນທະຈອນ ສະມາຊິກສະພາແຫ່ງຊາດເຂດເລືອກຕັ້ງທີ 13 ແຂວງສະຫວັນນະເຂດໃຫ້ສຳພາດໃນໂອກາດເຂົ້າຮ່ວມກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດຊຸດທີ VIII ວ່າ: ໄລຍະແຕ່ກອງປະຊຸມສະໄໝສາມັນ ເທື່ອທີ 7 ຫາ ເທື່ອທີ 8 ຂອງສະພາປະຊາຊົນແຂວງ ຊຸດທີ I ສາມາດຍາດໄດ້ຜົນງານພົ້ນເດັ່ນດັ່ງນີ້: ໄດ້ພິຈາລະນາ ແລະ ຮັບຮອງເອົາບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດຂອງແຂວງ ໄລຍະ 5 ເດືອນ, ຄາດຄະເນ 6 ເດືອນ ແລະ ທິດທາງ 6 ເດືອນທ້າຍປີ 2019 ຊຶ່ງໄດ້ຮັບຮອງເອົາແຜນດັດແກ້,ແຜນລາຍຮັບວິຊາການ 6 ເດືອນ ທ້າຍປີ 2019 ຂອງອົງການປົກຄອງແຂວງ, ພິຈາລະນາຮັບຮອງເອົາມາດຕະການໃນການຄຸ້ມຄອງການຜະລິດຖ່ານດໍາ ແລະ ມາດຕະການໃນການອະນຸຍາດ ແລະ ຄຸ້ມຄອງໂຮງງານຜະລິດຖ່ານຂາວ,ກອງປະຊຸມສະໄໝສາມັນເທື່ອທີ 7 ສາມາດຮັບຮອງນິຕິກໍາໃຕ້ກົດໝາຍ 1 ສະບັບຄື: ຂໍ້ຕົກລົງຂອງທ່ານເຈົ້າແຂວງສະຫວັນນະເຂດວ່າດ້ວຍການຄຸ້ມຄອງເຂດສະຫງວນທາງຫຼວງພາຍໃນແຂວງສະຫວັນນະເຂດ,ກອງປະຊຸມສະໄໝສາມັນ ເທື່ອທີ 8 ແມ່ນມີ 3 ນິຕິກໍາທີ່ຈະນໍາເຂົ້າພິຈາລະນາຄືີ: ຮ່າງຂໍ້ຕົກລົງຂອງທ່ານເຈົ້າແຂວງໆສະຫວັນນະເຂດວ່າດ້ວຍການຄຸ້ມຄອງຮ້ານອາຫານ, ບັນເທີງພາຍໃນແຂວງ, ຮ່າງຂໍ້ຕົກລົງຂອງທ່ານເຈົ້າແຂວງວ່າດ້ວຍການຄຸ້ມຄອງການຂຸດຄົ້ນດິນດໍາ-ດິນແດງ ພາຍໃນແຂວງ ແລະ ຮ່າງຂໍ້ຕົກລົງວ່າດ້ວຍການຄຸ້ມຄອງຫົວໜ່ວຍທຸລະກິດຂະໜາດນ້ອຍ-ຂະໜາດກາງພາຍໃນແຂວງ, ດ້ານການຕົກລົງບັນຫາສໍາຄັນພື້ນຖານຂອງແຂວງ; ກອງປະຊຸມສະ ໄໝສາມັນ ເທື່ອທີ 7 ໄດ້ຮັບ ຮອງເອົາການຍົກຍ້າຍ ຫົວໜ້າອົງການໄອຍະການປະຊາຊົນແຂວງ, ປະທານສານປະຊາຊົນແຂວງ, ຫົວໜ້າພະແນກໂຍ ທາທິການ ແລະ ຂົນສົ່ງແຂວງ ແລະ ຫົວໜ້າພະແນກຍຸຕິທໍາແຂວງ; ພິຈາລະນາໄດ້ຮັບຮອງເອົາການແຕ່ງຕັ້ງປະທານສານປະຊາຊົນແຂວງ, ຫົວໜ້າພະແນກໂຍທາທິການ ແລະ ຂົນສົ່ງແຂວງ, ຫົວໜ້າພະແນກຍຸຕິທໍາແຂວງ ຄົນໃໝ່. ໃນໄລຍະການປະຕິບັດພາລະບົດບາດ, ສິດ ແລະ ໜ້າທີ່ ໄດ້ຕິດຕາມຊຸກຍູ້ ການຍົກຍ້າຍປະຊາຊົນ ທີ່ຖືກຜົນກະທົບຈາກໂຄງການສ້າງເຂື່ອນໄຟຟ້າ ເຊລະນອງ 1. ຕິດຕາມກວດ ແລະ ເຂົ້າຮ່ວມກອງປະຊຸມປຶກສາຫາລືຂັ້ນແຂວງ-ສູນກາງ ເພື່ອຜ່ານບົດລາຍງານປະເມີນຜົນກະທົບຕໍ່ສິ່ງແວດລ້ອມ ແລະ ທໍາມະຊາດ, ແຜນການຈັດສັນຍົກຍ້າຍປະຊາຊົນ ສໍາລັບເຂື່ອນໄຟຟ້ານໍ້າຕົກເຊລະນອງ 3 (ເຊລະນອງຕັງເອີນ) ຂອງບໍລິສັດສີເມືອງກຣຸບ ຈໍາກັດ, ຕິດຕາມກວດກາການເອົາໄຟຟ້າເຂົ້າເຮືອນປະຊາຊົນ, ສໍາ ຫຼວດແລວທາງໄປບ້ານຕະປ໋ອງຄືນໃໝ່ ແລະ ການກໍ່ສ້າງຫ້ອງການເຂດພັດທະນາຈຽງຕູບ ເມືອງເຊໂປນ. ສໍາລັບທິດທາງຂອງກອງປະຊຸມສະໄໝສາມັນເທື່ອ ທີ 8 ແມ່ນຈະໄດ້ຕິດຕາມກວດ ກາການອະນຸຍາດໃຫ້ນັກລົງທຶນສໍາປະທານທີ່ດິນ, ການນໍາໃຊ້ສານເຄມີເກີນຄ່າມາດຕະຖານ, ການຍົກຍ້າຍຂອງປະ ຊາຊົນທີ່ຖືກຜົນກະທົບຈາກການສ້າງເຂື່ອນໄຟຟ້າເຊລະນອງ 1, ການຄຸ້ມຄອງ- ນໍາໃຊ້ ຊົນລະປະທານ, ການພັດ ທະ ນາຊົນນະບົດ ແລະ ລຶບລ້າງຄວາມທຸກຍາກ ຕົ້ນຕໍແມ່ນສຸມໃສ່ການສ້າງເງື່ອນໄຂໃຫ້ເມືອງນອງມີເງື່ອນໄຂບັນລຸມາດຖານເມືອງພົ້ນທຸກ, ບັນຫາການພັດທະນາສີມືແຮງງານ ຕາມຄວາມຕ້ອງການຂອງຕະ ຫຼາດແຮງງານຢູ່ເຂດເສດຖະ ກິດສະຫວັນນະເຂດ. ຜ່ານການລົງພົບປະປະ ຊາຊົນ ແລະ ຜູ້ທີ່ມີສິດເລືອກຕັ້ງທີ່ສະເໜີຫຼາຍທີ່ສຸດໃນການລົົງເຜີຍແຜ່ຜົນສໍາເລັດຂອງກອງປະຊຸມສະໄໝສາມັນ ເທື່ອທີ 7 ຊຶ່ງສາມາດສັງລວມຄໍາສະເໜີໄດ້ທັງໝົດ 95 ຄໍາສະເໜີ, ບັນ ຫາທີ່ຜູ້ມີສິດເລືອກຕັ້ງສະເໜີຫຼາຍທີ່ສຸດແມ່ນຂົງເຂດໂຍທາທິການ ແລະ ຂົນສົ່ງ ມີ 17 ຄໍາສະເໜີ, ຂົງເຂດກະສິກໍາ-ປ່າໄມ້ 15 ຄໍາສະເໜີ, ຂົງເຂດ ປກຊ-ປກສ 13 ຄໍາສະເໜີ, ກ່ຽວກັບອົງການປົກຄອງແຂວງ 10 ຄໍາສະເໜີ, ບັນຫາການຊອກວຽກເຮັດງານທໍາ ແລະ ບັນຫາອື່ນໆ. (ພາບ-ຂ່າວ: ບຸນອູ້ມ)