ຮອງປະທານປະເທດ ແນະນຳການກະກຽມ ກອງປະຊຸມໃຫຍ່ 3 ຂັ້ນຂອງພັກ

26.11.2019 10:45     

  ທ່ານ ພັນຄໍາ ວິພາວັນ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ ແຫ່ງ ສປປ ລາວ ພ້ອມດ້ວຍຄະນະ ໄດ້ເປັນກຽດໂອ້ລົມ ແລະ ໃຫ້ທິດຊີ້ນຳຕໍ່ຄະນະພັກ, ອຳນາດການປົກຄອງຂອງແຂວງຫົວ ພັນ ໃນວັນທີ 23 ພະຈິກ ຜ່ານມາ ທີ່ຫໍວັດທະນະທຳຂອງແຂວງ ຊຶ່ງກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ຜົນສຳເລັດທີ່ຄະນະພັກ-ອຳນາດການປົກຄອງແລະ ປະຊາຊົນແຂວງຫົວພັນ ຍາດມາໄດ້ໃນໄລຍະຜ່ານມາ ເປັນຕົ້ນແມ່ນ ພື້ນຖານໂຄງລ່າງໄດ້ຮັບການພັດທະນາ, ມີສະຖຽນລະພາບທາງດ້ານການເມືອງ ມີຄວາມສະຫງົບເປັນລະບຽບຮຽບຮ້ອຍໃນທົ່ວສັງຄົມ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ປະຊາຊົນມີຊີວິດການເປັນຢູ່ດີຂຶ້ນ, ມີຄວາມສາມັກຄີປອງດອງ, ບັນດາປະກົດການຫຍໍ້ທໍ້ໃນສັງຄົມ ໄດ້ຮັບການແກ້ໄຂເທື່ອລະກ້າວ. ສຳລັບການກະກຽມດຳ ເນີນກອງປະຊຸມໃຫຍ່ 3 ຂັ້ນ ທ່ານ ພັນຄຳ ວິພາວັນ ໄດ້ເນັ້ນໜັກໃຫ້ອົງຄະນະພັກແຂວງ-ອຳນາດການປົກຄອງທຸກຂັ້ນ ຕ້ອງກຳແໜ້ນຄວາມສຳຄັນ ແລະ ທັດສະນະການຊີ້ນຳຂອງກົມການເມືອງ ສູນກາງພັກ ນຳເອົາເນື້ອໃນຈິດໃຈດັ່ງກ່າວ ໄປສົມທົບກັບການກະກຽມດຳເນີນກອງປະຊຸມ 3 ຂັ້ນຂອງອົງຄະນະພັກຕົນ ໂດຍສະເພາະກອງປະຊຸມໃຫຍ່ຄັ້ງທີ X ຂອງອົງ ຄະນະພັກແຂວງຫົວພັນ ທີ່ຈະໄດ້ເປີດຂຶ້ນໃນທ້າຍປີ 2020. ດັ່ງນັ້ນ, ບົດລາຍງານການເມືອງຂອງຄະນະພັກແຕ່ລະຂັ້ນ ຕ້ອງກຳນົດໃຫ້ມີຄວາມແທດເໝາະກັບສະພາບຄວາມເປັນຈິງຂອງແຕ່ລະໄລຍະ ສິ່ງໃດທີ່ເຫັນວ່າຈະສາມາດຈັດຕັ້ງປະຕິບັດໄດ້ໃຫ້ມີການວິເຄາະ, ວິໄຈເນື້ອໃນບັນຫາຄັກແນ່, ນຳເອົາບົດຮຽນໃນດ້ານຕ່າງໆ ເພື່ອມາປຽບທຽບກັບໜ້າທີ່ວຽກງານ ທີ່ໄດ້ປະຕິບັດຜ່ານມາ, ສ່ວນໂຄງປະກອບດ້ານບຸກຄະລາກອນ ຕ້ອງມີການຄັດເລືອກ ຊຶ່ງໃນນັ້ນໄດ້ແບ່ງອອກເປັນ 3 ຮຸ່ນ ຄື: ຮຸ່ນອາວຸໂສ, ຮຸ່ນກາງ ແລະ ຮຸ່ນໜຸ່ມ, ສຳລັບຊັດສ່ວນໃນແຕ່ລະຮຸ່ນ ກໍຕ້ອງເບິ່ງວ່າ ຮຸ່ນກາງ ແລະ ຮຸ່ນໜຸ່ມ ຄວນຈະມີອັດຕາສ່ວນຫຼາຍກວ່າຮຸ່ນອາວຸໂສ, ໃນນັ້ນໃຫ້ເບິ່ງທັງຄວາມຮູ້, ຄວາມສາມາດ ແລະ ປະສົບການ ຫຼີກລ່ຽງຄົນເຈົ້າຄົນຂ້ອຍ, ຍາດຕິ ພີ່ນ້ອງ, ຄົນໃກ້ຊິດ ຊຶ່ງຈະກໍ່ ໃຫ້ເກີດຂໍ້ຂັດແຍ່ງທີ່ຕາມມາ ເຮັດໃຫ້ການຊີ້ນຳ-ນຳພາພົບຂໍ້ຫຍຸ້ງຍາກ. ສະນັ້ນ, ຄະນະພັກທຸກຂັ້ນ ຕ້ອງມີຄວາມໂປ່ງໃສ ແລະ ເອົາໃຈໃສ່ເປັນພິເສດ ເພື່ອໃຫ້ໄດ້ບຸກຄະລາກອນທີ່ມີຄຸນນະພາບ. ເຂົ້າຮ່ວມຮັບຟັງການຊີ້ນຳຂອງທ່ານຮອງປະທານປະເທດໃນຄັ້ງນີ້ ມີທ່ານ ວັນໄຊ ແພງຊຸມມາ ກຳມະການສູນກາງພັກ, ເລຂາພັກແຂວງ, ເຈົ້າແຂວງຫົວພັນ, ມີບັນດາທ່ານໃນຄະນະບໍລິຫານງານພັກແຂວງ, ເລຂາພັກເມືອງ, ຄະນະພັກກອງບັນຊາການທະຫານ, ກອງບັນຊາການຕໍາຫຼວດ, ພະແນກການ ແລະ ພາກສ່ວນຕ່າງໆອ້ອມຂ້າງແຂວງເຂົ້າຮ່ວມ. (ຂ່າວ: ອາລຸນໄຊ)