ສຳເລັດການຝຶກອົບຮົມທິດສະດີການເມືອງ ແລະ ການປົກຄອງ ໃຫ້ເລຂາພັກເມືອງຊຸດທີ II

26.11.2019 10:49     

  ຊຸດຝຶກອົບຮົມທິດສະດີການເມືອງ ແລະ ການປົກຄອງ ຕາມຫົວຂໍ້ສະເພາະໃຫ້ແກ່ເລ ຂາພັກເມືອງ, ຄະນະປະຈໍາພັກເມືອງ ຊຸດທີ II, ທີ່ດຳເນີນແຕ່ວັນທີ 11 - 22 ພະຈິກ ນີ້ ທີ່ສະຖາບັນການເມືອງ ແລະ ການປົກຄອງແຫ່ງຊາດ ໄດ້ສຳເລັດ ແລະ ຈັດພິທີຢ່າງ ເປັນ ທາງການ ໃນວັນທີ 22 ພະ ຈິກຜ່ານມາ ໂດຍມີ ສະຫາຍ ສະໝຸດທອງ ສົມພານິດ ຄະນະບໍລິຫານພັກ ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດເຂົ້າຮ່ວມມອບໃບຢັ້ງຢືນສຳເລັດການຝຶກອົບຮົມດັ່ງກ່າວ. ຫຼັກສູດຝຶກອົບຮົມທິດສະດີການເມືອງ - ການປົກຄອງ ຕາມຫົວຂໍ້ສະເພາະໃຫ້ແກ່ເລ ຂາພັກເມືອງ, ຄະນະປະຈຳ ພັກເມືອງ ແມ່ນເພື່ອຍົກສູງຂີດຄວາມສາມາດການຊີ້ນຳ - ນໍາພາບັນດາວຽກງານຕ່າງໆ ໃນຂັ້ນເມືອງໂດຍນໍາໃຊ້ ຫຼັກ ມູນທິດສະດີມາກ - ເລນິນ, ແນວທາງຂອງພັກ, ແຜນພັດທະນາເສດຖະກິດ - ສັງຄົມແຫ່ງຊາດ ແລະ ລະບຽບກົດ ໝາຍຂອງລັດ ເຂົ້າໃນການປັບປຸງແຜນການເຄື່ອນໄຫວແຕ່ລະໄລຍະສອດຄ່ອງກັບແຜນພັດທະນາເສດຖະກິດ - ສັງຄົມທີ່ໄດ້ກໍານົດໄວ້, ນໍາໃຊ້ຫຼັກມູນທິດສະດີທີ່ໄດ້ຮຽນມາຢ່າງເປັນລະບົບເຂົ້າໃນການບໍລິຫານ, ການຄຸ້ມຄອງ, ການພັດທະນາ, ການປະສານງານ, ການຕິດຕາມກວດກາວຽກງານຢູ່ຂັ້ນຄວາມຮັບຜິດຊອບຂອງຕົນ ແລະ ການແກ້ໄຂຂໍ້ຄັດແຍ່ງຕ່າງໆຕາມລະບົບຫຼັກການທີ່ເໝາະສົມ. ບັນດາສະຫາຍຜູ້ເຂົ້າຮ່ວມຝຶກອົບຮົມດັ່ງກ່າວມີ 50 ສະຫາຍ, ຍິງ 3 ສະຫາຍ ຊຶ່ງຜ່ານການຝຶກອົບຮົມ ຄະນະຮັບຜິດຊອບຈັດຕັ້ງປະຕິບັດຊຸດຝຶກອົບຮົມຄັ້ງນີ້ ໄດ້ປະເມີນຜົນຄວາມຮັບຮູ້ຂອງຜູ້ເຂົ້າຝຶກອົບຮົມແມ່ນຢູ່ໃນລະດັບດີ ຫາ ດີຫຼາຍ, ໂດຍລວມແລ້ວບັນດາສະຫາຍຜູ້ເຂົ້າຮ່ວມຝຶກອົບຮົມມີທັດສະນະຫຼັກໝັ້ນການເມືອງໜັກແໜ້ນ, ມີຄວາມອຸ່ນອ່ຽນທຸ່ນທ່ຽງ ສາມາດເຊື່ອມຊຶມກຳແໜ້ນແນວທາງນະໂຍບາຍຂອງພັກ - ລັດ, ມີຄວາມບຸກບືນຫ້າວຫັນປະຕິບັດໜ້າທີ່ວຽກງານການເມືອງຂອງຕົນ ກໍຄືການຍາດແຍ່ງເອົາຄວາມຮູ້ນໍາຄູ - ອາຈານ, ເຊື່ອໝັ້ນຕໍ່ກຳລັງແຮງ ແລະ ສະຕິປັນຍາຂອງອາຈານສອນ, ກ້າຄິດ, ກ້າຕັ້ງບັນຫາ ແລະ ກ້າຮັບຜິດຊອບຕໍ່ການແລກປ່ຽນບົດຮຽນຊຶ່ງກັນ ແລະ ກັນ. (ພາບ-ຂ່າວ:ສຸກສະຫວັນ)