ຄະນະກວດກາສູນກາງພັກ ເຜີຍແຜ່ມະຕິ ກອງປະຊຸມຄົບຄະນະຂອງສູນກາງພັກ ແລະ ວັນສຳຄັນຂອງຊາດ

27.11.2019 10:05     

  ຄະນະກວດກາສູນກາງ ພັກ ໄດ້ຈັດກອງປະຊຸມ ເຜີຍແຜ່ເອກະສານ ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 9 ສະໄໝທີ X, ວັນຊາດທີ 2 ທັນວາ ແລະ ວັນເກີດປະທານ ໄກສອນ ພົມ ວິຫານ ໃນວັນທີ 26 ພະຈິກ ນີ້ທີ່ສະໂມສອນຂອງຄະນະກວດກາສູນກາງພັກ ໂດຍ ພາຍໃຕ້ການເປັນປະທານຂອງທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ ຄະ ນະເລຂາທິການສູນກາງພັກ ຮອງນາຍົກລັດຖະມົນຕີ ປະ ທານຄະນະກວດກາສູນກາງ ພັກ-ອົງການກວດກາລັດຖະ ບານ ທັງເປັນຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ.ທ່ານ ບຸນທອງ ຈິດມະນີ ກ່າວວ່າ: ເອກະສານທີ່ນໍາມາເຜີຍແຜ່ຄັ້ງນີ້ ແມ່ນມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 9 ສະໄໝ ທີ X ຊຶ່ງມີ 6 ຂໍ້ຄື: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະ ມານແລະແຜນເງິນຕາປະຈໍາປີ 2019 ແລະ ທິດທາງແຜນ ການ ປະຈໍາປີ 2020; ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ການຕ່າງປະເທດ; ວຽກງານແນວໂຮມແລະວຽກງານມະຫາຊົນຂອງພັກ; ການກະກຽມ ແລະດໍາເນີນກອງປະຊຸມໃຫຍ່ 3 ຂັ້ນຂອງພັກ; ຟັງການລາຍງານການປະກອບຄໍາເຫັນໃສ່ຮ່າງລາຍງານການເມືອງ ສະບັບທໍາອິດ ຕໍ່ກອງປະຊຸມໃຫຍ່ຄັ້ງທີ XI ຂອງພັກ ແລະ ຮັບຟັງການດໍາເນີນຊີວິດການເມືອງ,ສໍາຫຼວດການນໍາພາລວມໝູ່ ແລະ ຄວາມຮັບຜິດຊອບຂອງກໍາມະການສູນກາງແຕ່ລະສະຫາຍ ປະຈໍາປີ 2019. ຊຶ່ງກອງປະຊຸມໄດ້ເປັນເອກະພາບຕີລາຄາ ໃນໜຶ່ງປີຜ່ານມາດ້ວຍຄວາມບຸກບືນ ສູ້ຊົນ ຂອງທົ່ວພັກ,ທົ່ວລັດ ແລະ ທົ່ວປວງຊົນ ໄດ້ເຮັດໃຫ້ແຜນພັດທະນາເສດຖະກິດ-ສັງຄົມ, ແຜນງົບປະມານ ແລະແຜນເງິນຕາ ສ່ວນໃຫຍ່ບັນລຸໝາກຜົນ ຕາມຄາດໝາຍທີ່ວາງໄວ້, ເສດຖະກິດຍັງສືບຕໍ່ຂະຫຍາຍຕົວໃນລະດັບ 6,4% (ຄາດໝາຍກອງປະຊຸມໃຫຍ່ ຄັ້ງທີ X ວາງອອກ 7,5%), ຂະແໜງກະສິກໍາ, ຂະແໜງອຸດສາຫະກໍາ, ຂະແໜງການບໍລິການ, ການລົງທຶນ ສືບຕໍ່ຂະຫຍາຍຕົວຕໍ່ເນື່ອງ, ການນໍາເຂົ້າ-ສົ່ງອອກ ໃນປີນີ້ ເກີນດູນ ແຕ່ກໍຍັງເຫັນວ່າ ໃນການແກ້ໄຂບັນດາບັນຫາພື້ນຖານທາງດ້ານເສດຖະກິດ ແມ່ນຍັງບໍ່ທັນຫັນປ່ຽນຈະແຈ້ງ, ກົນໄກການເຄື່ອນໄຫວບໍ່ທັນຊັດເຈນ, ຫຼາຍບັນຫາສືບຕໍ່ຫຍຸ້ງຍາກ ເຊັ່ນ: ບັນຫາໜີ້ສິນ ບໍ່ໄດ້ຮັບການແກ້ໄຂໃຫ້ຫຼຸດລົງ, ບັນຫາການຜະລິດກະສິກໍາ-ປ່າໄມ້ ບໍ່ທັນມີທາງອອກຈະແຈ້ງ,ບັນຫາການຊຸກຍູ້ສົ່ງເສີມ ການດໍາເນີນການຜະລິດ-ທຸລະກິດ ໂດຍສະເພາະທຸລະກິດຂະໜາດນ້ອຍ ແລະ ກາງ ບໍ່ທັນໄດ້ຮັບການຊຸກຍູ້ສົ່ງເສີມ, ບັນຫາການປັບປຸງຂັ້ນຂອດ ການບໍລິການຕໍ່ການລົງທຶນ ຍັງບໍ່ທັນໂລ່ງລ່ຽນ, ຊັກຊ້າ, ແກ່ຍາວ ແລະບັນຫາອື່ນໆ. ນອກຈາກນັ້ນ, ກອງປະຊຸມ ຍັງໄດ້ຮັບຟັງ ການຫວນຄືນມູນເຊື້ອວັນຊາດທີ 2 ທັນວາ 1975 -2 ທັນວາ 2019 ຄົບຮອບ 44 ປີ ແລະ ວັນເກີດປະທານ ໄກສອນ ພົມວິຫານ 13/12/1920-13/12/2019 ຄົບຮອບ 99 ປີ. (ຂ່າວ-ພາບ: ແສງຈັນ)