ກະຊວງ ກປ ເປີດຊຸດຝຶກອົບຮົມທິດສະດີການເມືອງ ການປົກຄອງ ຊຸດທີ XVIII

27.11.2019 10:18     

  ພິທີເປີດຊຸດຝຶກອົບຮົມທິດສະດີການເມືອງ - ການປົກຄອງ ໄລຍະສັ້ນ 45 ວັນ ຊຸດທີ XVIII ໃຫ້ສະມາຊິກພັກ, ພະນັກງານຫຼັກແຫຼ່ງ ຂອງກະຊວງ ກປ, ຈຳນວນ 50 ສະ ຫາຍ, ຍິງ 17 ສະຫາຍ ໄດ້ຈັດຂຶ້ນໃນວັນທີ 25 ພະຈິກຜ່ານ ມາທີ່ສະໂມສອນຂອງກະຊວງດັ່ງກ່າວ ໂດຍມີ ສະຫາຍ ລຽນ ທີແກ້ວ ເລຂາຄະນະພັກກະຊວງ ລັດຖະມົນຕີກະຊວງ ກປ ເຂົ້າຮ່ວມເປັນປະທານ ແລະ ກ່າວເປີດຊຸດຝຶກອົບຮົມ, ມີ ສະຫາຍນາງ ໄກສອນ ຈັນສີນາ ເລຂາໜ່ວຍພັກ ວ່າການຫົວໜ້າກົມຄຸ້ມຄອງການຮຽນ - ການສອນ ສະຖາບັນການເມືອງ - ການປົກຄອງແຫ່ງຊາດ ພ້ອມດ້ວຍບັນດາສະຫາຍນັກຝຶກອົບຮົມເຂົ້າຮ່ວມຢ່າງພ້ອມພຽງ. ສະຫາຍ ລຽນ ທີແກ້ວ ກ່າວໃນໂອກາດເປີດຊຸດຝຶກອົບຮົມຄັ້ງນີ້ວ່າ: ສະມາຊິກພັກ, ພະນັກງານຫຼັກແຫຼ່ງ ແມ່ນຜູ້ນຳເອົາແນວທາງ, ແຜນນະໂຍ ບາຍຂອງພັກ ແລະ ລະບຽບກົດໝາຍຂອງລັດ ໃຫ້ກາຍເປັນແຜນການ, ແຜນງານລະອຽດເຂົ້າສູ່ການປະຕິບັດຕົວຈິງ, ທິດສະດີມາກ - ເລນິນ ແມ່ນທິດສະດີຂອງຊົນຊັ້ນກຳມະກອນຊາວຜູ້ອອກແຮງງານ ແມ່ນທິດສະດີສັດຈະວິພາກເບິ່ງໂລກແບບພາວະວິໄສ, ເປັນທິດສະດີທີ່ມີວິທະຍາສາດ ທີ່ຊ່ວຍໃຫ້ເຂົ້າໃຈແນວທາງນະໂຍບາຍຂອງພັກ - ລັດ ເປັນເຂັມຊີ້ທິດເຍືອງທາງໃຫ້ພວກເຮົາເດີນໄປຢ່າງຖືກຕ້ອງ ແລະ ເປັນບ່ອນອີງໃນການຈັດຕັ້ງຜັນຂະຫຍາຍເຂົ້າສູ່ການປະຕິບັດຕົວຈິງ ໃນຂະແໜງກະສິກຳ - ປ່າໄມ້ ແລະ ພັດທະນາຊົນນະບົດ ໃຫ້ບັນລຸຕາມຈຸດປະສົງເປົ້າໝາຍຂອງພັກເຮົາ ທີ່ໄດ້ກຳນົດໄວ້. (ພາບ - ຂ່າວ: ສຸກສະຫວັນ)