ຍທຂ ປະກາດການອອກພັກການ ແລະ ຮັບອຸດໜູນບຳນານໃຫ້ການນຳຂັ້ນສູງ

27.11.2019 10:11     

  ກະຊວງໂຍທາທິການ ແລະ ຂົນສົ່ງ (ຍທຂ) ໄດ້ຈັດພິທີ ປະກາດການອອກພັກການ ແລະ ຮັບອຸດໜູນບຳນານໃຫ້ແກ່ ທ່ານ ລັດຕະນະມະນີ ຄູນນີວົງ ຮອງເລຂາຄະນະພັກ ຮອງລັດ ຖະມົນຕີກະຊວງ ຍທຂ ຂຶ້ນທີ່ກະຊວງ ຍທຂ ເມື່ອບໍ່ດົນຜ່ານ ມາ ໂດຍເປັນກຽດເຂົ້າຮ່ວມຂອງ ທ່ານ ບຸນຈັນ ສິນທະວົງ ລັດຖະ ມົນຕີກະຊວງ ຍທຂ ພ້ອມດ້ວຍພະນັກງານກ່ຽວຂ້ອງເຂົ້າຮ່ວມ. ໃນພິທີຕາງໜ້າກົມຈັດຕັ້ງ ແລະ ພະນັກງານກະຊວງ ຍທຂ ໃຫ້ກຽດອ່ານດຳລັດຂອງນາຍົກ ລັດຖະມົນຕີ ສະບັບ ເລກທີ 376/ນຍ, ລົງວັນທີ 31 ຕຸລາ 2019 ວ່າດ້ວຍການອະນຸມັດໃຫ້ ພະນັກງານອອກພັກການຮັບອຸດໜູນບຳນານ ແລະ ປະຕິບັດ ຕາມແຈ້ງການຂອງຄະນະຈັດຕັ້ງສູນກາງພັກສະບັບເລກທີ 294/ຄຈສພ, ລົງວັນທີ 6 ພະ ຈິກ 2019 ເລື່ອງການລຸລ່ວງໃຫ້ ພະນັກງານການນຳຂັ້ນສູນກາງຄຸ້ມຄອງອອກພັກການຮັບອຸດໜູນບຳນານ ດັ່ງນັ້ນ, ໃນມື້ນີ້ກະຊວງ ຍທຂ ຈຶ່ງໄດ້ຈັດພິທີປະ ກາດນີ້ຂຶ້ນ ເພື່ອແຈ້ງການໃຫ້ພະ ນັກງານທົ່ວກະຊວງໄດ້ຮັບຮູ້. ພາຍຫຼັງ ທ່ານ ລັດຕະນະມະນີ ຄູນນີວົງ ໄດ້ໃຫ້ກຽດຂຶ້ນ ກ່າວມີຄຳເຫັນຕໍ່ການປະຕິບັດໜ້າທີ່ໃນໄລຍະທີ່ຜ່ານມາ ຊຶ່ງມີຄວາມໝາຍສຳຄັນ ແລະ ເປັນບົດຮຽນອັນຍິ່ງໃຫຍ່ໃຫ້ພະນັກ ງານຮຸ່ນສືບທອດສືບຕໍ່ ປະຕິບັດໜ້າທີ່ຢ່າງມີປະສິດທິຜົນ, ຈາກນັ້ນທ່ານ ບຸນຈັນ ສິນທະວົງ ໄດ້ໃຫ້ກຽດມີຄຳເຫັນ ຊຶ່ງກ່ອນອື່ນ ທ່ານໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານອັນຍິ່ງໃຫຍ່ຂອງທ່ານ ລັດຕະນະມະນີ ຄູນນີວົງ ທີ່ໄດ້ປະກອບສ່ວນເຂົ້າໃນການພັດທະນາປະເທດຊາດ ຊຶ່ງທ່ານໄດ້ເລີ່ມຈາກການເປັນນັກວິຊາການປະຕິບັດ ໜ້າທີ່ດ້ວຍຄວາມຮັບຜິດຊອບໃນການນຳພາສ້າງພະນັກງານ ກໍ່ສ້າງເສັ້ນທາງ ເຮັດໃຫ້ການນຳພັກ-ລັດມີຄວາມໄວ້ເນື້ອເຊື່ອ ໃຈກ້າວຂຶ້ນດຳລົງຕຳແໜ່ງເປັນ ການນຳຂັ້ນສູງ, ຕໍ່ຜົນງານດັ່ງ ກ່າວພວກເຮົາຕ້ອງໄດ້ບັນທຶກ ໄວ້ ເພື່ອນຳໄປຜັນຂະຫຍາຍ ໃຫ້ຮຸ່ນສືບທອດໄດ້ຮໍ່າຮຽນ ເອົາເປັນແບບຢ່າງໃນການປະຕິບັດໜ້າທີ່ວຽກງານວິຊາສະເພາະໃນຂັ້ນຕໍ່ໄປ. (ຂ່າວ: ພູວັນ, ພາບ: ຍຸພິນທອງ)