ກອງປະຊຸມຄົບຄະນະພັກເປີດກວ້າງ ຄັ້ງທີ 6 ສະໄໝທີ V ຂອງອົງຄະນະພັກ ຮສສ

29.11.2019 9:29     

  ກອງປະຊຸມຄົບຄະນະພັກເປີດກວ້າງຄັ້ງທີ 6 ສະໄໝທີ V ຂອງອົງຄະນະພັກ ກະຊວງ ແຮງງານ ແລະ ສະຫວັດດີການສັງຄົມ (ຮສສ) ໄດ້ເປີດຂຶ້ນໃນລະຫວ່າງວັນທີ 28-29 ພະຈິກ ນີ້ ທີ່ ຮສສ, ພາຍໃຕ້ການເປັນປະທານຂອງສະຫາຍ ຄຳແພງ ໄຊສົມແພງ ເລຂາຄະນະພັກ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ຊຶ່ງມີບັນດາສະຫາຍພະນັກງານການນຳເຂົ້າຮ່ວມ. ກອງປະຊຸມໃນຄັ້ງນີ້ ແມ່ນໄດ້ຜ່ານບົດສະຫຼຸບການຊີ້ນຳ ນຳພາວຽກງານຂອງອົງຄະນະພັກກະຊວງ ຮສສ ປະຈຳປີ 2019 ແລະ ທິດທາງແຜນການ 2020 ແລະ ປະກອບຄຳຄິດເຫັນໃສ່ບົດສະຫຼຸບ ແລະ ຜ່ານບົດສຳຫຼວດການຊີ້ນຳ ນຳພາລວມ ຂອງຄະນະບໍລິຫານງານພັກກະຊວງ ຮສສ ພ້ອມນັ້ນກອງປະຊຸມຍັງໄດ້ຜ່ານ ແລະ ປະກອບຄຳເຫັນໃສ່ຮ່າງບົດສຳຫຼວດບຸກຄົນຂອງບັນດາສະ ຫາຍຄະນະບໍລິຫານງານພັກ ກະຊວງຮສສປະຈຳປີ 2019. ເພື່ອເປັນການຮັບປະກັນໃຫ້ທິດທາງແຜນການ ປີ 2020 ໃຫ້ປະກົດຜົນເປັນຈິ່ງ .ທ່ານ ຄຳແພງ ໄຊສົມແພງ ຈຶ່ງໄດ້ຮຽກຮ້ອງໃຫ້ຄະນະພັກແຕ່ລະຂັ້ນຈົ່ງພ້ອມກັນເພີ່ມທະວີເອົາໃຈໃສ່ຕື່ມ ເຊັ່ນ: ເພີ່ມທະວີວຽກງານສຶກສາອົບຮົມການເມືອງ-ນຳພາແນວຄິດຂອງພະນັກງານສະມາຊິກພັກທາງດ້ານອຸດົມການ, ຄວາມຈົ່ງຮັກພັກດີ, ຄວາມມີນໍ້າໃຈຮັກຊາດ, ນໍ້າໃຈເສຍສະຫຼະ, ສະຕິຕໍ່ການຈັດຕັ້ງ, ປະຕິບັດລະບຽບວິໄນ, ມີຄວາມຮັບຜິດ ຊອບຕໍ່ໜ້າທີ່ການເມືອງ ທີ່ໄດ້ຮັບການມອບໝາຍ, ສືບຕໍ່ບຸກທະລຸທາງດ້ານແນວຄິດຈິນຕະນາການເກົ່າ, ເດັດດ່ຽວແກ້ໄຂບັນດາປະກົດການເສື່ອມຖອຍດ້ານຄຸນທາດການເມືອງ, ຄຸນສົມບັດສິນທຳປະຕິວັດ ແລະ ພະຍາດອາຍາສິດ ແລະ ຕ້ານການສໍ້ລາດບັງຫຼວງອື່ນໆຢູ່ໃນການຈັດຕັ້ງພັກ-ລັດ ແລະ ໃນຖັນແຖວພະນັກງານ ສະມາຊິກພັກ . (ຂ່າວ: ຕຸໄລເພັດ ພິມເມືອງ)