ຫາລືການຮ່ວມມືດ້ານການທ່ອງທ່ຽວອະນຸພາກພື້ນແມ່ນ້ຳຂອງ


...

    ກອງປະຊຸມປຶກສາຫາລື ກ່ຽວກັບການຮ່ວມມືດ້ານການ ທ່ອງທ່ຽວອະນຸພາກພື້ນແມ່ນ້ຳ ຂອງໄດ້ຈັດຂຶ້ນໃນວັນທີ 7 ມີ ຖຸນາຜ່ານມານີ້ ທີ່ແຂວງຫຼວງ ພະບາງ ໂດຍການເຂົ້າຮ່ວມ ຂອງທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫຼງ ຂ່າວ, ວັດທະນະທຳ ແລະ ທ່ອງ ທ່ຽວ, ມີຜູ້ຕາງໜ້າຈາກຄະນະ ກຳມາທິການພາກພື້ນອາຊີ- ປາຊີຟິກ, ອົງການທ່ອງທ່ຽວ ໂລກ, ຫ້ອງການທະນາຄານ ພັດທະນາອາຊີປະຈຳລາວ, ຫ້ອງການປະສານງານອະນຸ ພາກພື້ນແມ່ນ້ຳຂອງ, ຮອງລັດ ຖະມົນຕີກະຊວງທ່ອງທ່ຽວປະ ເທດກຳປູເຈຍ ແລະ ສະມາ ຊິກອົງການທ່ອງທ່ຽວພາກພື້ນ ແມ່ນ້ຳຂອງ 6 ປະເທດເຂົ້າ ຮ່ວມ. ທ່ານ ບໍ່ແສງຄຳ ວົງດາລາ ໃຫ້ຮູ້ວ່າ: ກອງປະຊຸມຄັ້ງນີ້ຈັດ ຂຶ້ນ ພາຍໃຕ້ຫົວຂໍ້ "ຄວາມມຸ່ງ ຫວັງໄປສູ່ຄວາມຈະເລີນຮຸ່ງ ເຮືອງ" ຊຶ່ງເປັນໂອກາດທີ່ເໝາະສົມ ສຳລັບຂົງເຂດອະນຸພາກພື້ນ ແມ່ນ້ຳຂອງພວກເຮົາທີ່ຈະໄດ້ ຮ່ວມມືຢ່າງໃກ້ຊິດ ເພື່ອໃຫ້ ບັນລຸວິໄສທັດໃໝ່ ສຳລັບປີ 2025 ແລະ ແຜນຍຸດທະສາດ ການທ່ອງທ່ຽວ 2016-2025 ແລະ ຮອດປີ 2025 ຈະເສີມສ້າງ ການຮ່ວມມືດ້ານການທ່ອງ ທ່ຽວອະນຸພາກພື້ນແມ່ນ້ຳຂອງ ໃຫ້ແໜ້ນແຟ້ນ, ມີຄວາມສະ ເໝີພາບກັນ, ມີຄວາມຈະເລີນ ຮຸ່ງເຮືອງຕ່າງຝ່າຍຕ່າງມີຜົນ ປະໂຫຍດ ແລະ ຮ່ວມກັນພັດ ທະນາຢ່າງມີປະສິດທິພາບ, ກ້າວໄປສູ່ການຄຸ້ມຄອງຄວາມຮູ້ ໃຫ້ກ້າວສູ່ລະບົບເທື່ອລະກ້າວ. ສຳລັບການຫາລືຄັ້ງນີ້ຈະ ໄດ້ພິຈາລະນາບັນຫາການທ່ອງ ທ່ຽວທີ່ມີຜົນກະທົບຕໍ່ສິ່ງແວດ ລ້ອມ, ສັງຄົມ, ເສດຖະກິດໃນ ປັດຈຸບັນ ແລະ ອະນາຄົດຢ່າງ ຮອບດ້ານ ໂດຍຄຳນຶງເຖິງຄວາມ ຕ້ອງການຂອງນັກທ່ອງທ່ຽວ, ອຸດສາຫະກຳ, ສິ່ງແວດລ້ອມ ແລະ ບັນດາຊຸມຊົນທີ່ຢູ່ໃນສະ ຖານທີ່ທ່ອງທ່ຽວດັ່ງກ່າວ ແລະ ເວທີການປຶກສາຫາລືກ່ຽວກັບ ການຮ່ວມມືດ້ານການທ່ອງ ທ່ຽວອະນຸພາກພື້ນແມ່ນ້ຳຂອງ 2017 ຄັ້ງນີ້ຈະໄດ້ກຳນົດເອົາ ບັນດາກິດຈະກຳທີ່ສຳຄັນ ເພື່ອ ໃຫ້ຄະນະຜູ້ແທນໄດ້ຮູ້ຈັກແລກ ປ່ຽນຄວາມຄິດຄວາມເຫັນ ແລະ ແບ່ງປັນປະສົບການຕົວ ຈິງ ໃນການພັດທະນາ ເພື່ອ ເປັນການສົ່ງເສີມອຸດສາຫະກຳ ການທ່ອງທ່ຽວ. ນອກນີ້ຍັງມີ ກອງປະຊຸມປິ່ນອ້ອມຕ່າງໆ ເຊັ່ນ: ປຶກສາຫາລືຂອບເຂດ ການຮ່ວມປະເທດອະນຸພາກ ພື້ນແຜນຍຸດທະສາດການທ່ອງ ທ່ຽວອະນຸພາກພື້ນແມ່ນ້ຳຂອງ ສຳລັບປີ 2016-2025, ກອງ ປະຊຸມສົ່ງເສີມການດຳເນີນທຸ ລະກິດການທ່ອງທ່ຽວຂອງອະ ນຸພາກພື້ນແມ່ນ້ຳຂອງ ແລະ ກອງປະຊຸມອື່ນໆທີ່ປິ່ນອ້ອມ ໂດຍຈະມີການເຜີຍແຜ່ຂໍ້ມູນ ກ່ຽວກັບແຫຼ່ງທ່ອງທ່ຽວ ແລະ ການບໍລິການ, ລາຍການທັດ ສະນະສຶກສາແຫຼ່ງທ່ອງທ່ຽວທີ່ ໂດດເດັ່ນຂອງແຂວງຫຼວງພະ ບາງ ລວມທັງລາຍການພັດທະ ນາສຶກສາທີ່ພາກທຸລະກິດໃຫ້ ການສະໜັບສະໜູນ ແລະ ອີກ ວຽກງານອື່ນໆ.