ຄຳປາໄສ ຂອງທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ໃນໂອກາດເຂົ້າຮ່ວມກອງປະຊຸມ ໂຕະມົນບັນດາຜູ້ນຳເວທີປຶກສາຫາລືຂັ້ນສູງ ວ່າດ້ວຍການຮ່ວມມືສາກົນ " ໜຶ່ງແລວທາງ ໜຶ່ງເສັ້ນທາງ " ໃນວັນທີ 15 ພຶດສະພາ 2017 ທີ່ນະຄອນຫຼວງປັກກິ່ງ ສປ ຈີນ


    ໃນຍຸກສະໄໝການເຊື່ອມໂຍງພາກພື້ນ ແລະ ສາກົນ ໃນປັດຈຸບັນນີ້, ການຮ່ວມມືດ້ານການພັດທະນາ ເປັນສິ່ງຈຳ ເປັນ ເພາະທຸກປະເທດ ບໍ່ວ່າໃນລະດັບພາກພື້ນ ຫຼື ໃນລະດັບ ສາກົນ ກໍລ້ວນແລ້ວແຕ່ໄດ້ມີການເພິ່ງພາອາໄສຊຶ່ງກັນ ແລະ ກັນ. ດ້ວຍເຫດນີ້ ການເຊື່ອມຈອດຈຶ່ງມີບົດບາດສຳຄັນ ໃນ ການສ້າງເງື່ອນໄຂທີ່ເອື້ອອຳນວຍ ໃຫ້ແກ່ການພັດທະນາທີ່ຕິດ ຈອດກັນ, ການພັດທະນາທີ່ມີຄວາມຍືນຍົງ ແລະ ຮັບປະກັນ ຜົນປະໂຫຍດດ້ານເສດຖະກິດ-ສັງຄົມ. ການຈັດຕັ້ງປະຕິບັດຂໍ້ລິເລີ່ມ ໜຶ່ງແລວທາງ ໜຶ່ງເສັ້ນທາງ ທີ່ລວມທັງການສົ່ງເສີມການພັດທະນາ, ສັນຕິພາບ ແລະ ການເຊື່ອມຈອດດ້ານພື້ນຖານໂຄງລ່າງ ແລະ ການໄປມາຫາ ສູ່ກັນຂອງປະຊາຊົນ ມີຄວາມສຳຄັນຍິ່ງ ແລະ ຈະເປັນການ ປະກອບສ່ວນສຳຄັນ ເຂົ້າໃນຄວາມພະຍາຍາມຂອງບັນດາ ປະເທດ, ພາກພື້ນ ແລະ ສາກົນ ໃນການພັດທະນາການ ເຊື່ອມຈອດໂຄງລ່າງເຊັ່ນ: ການຄົມມະນາຄົມ ໃນຮູບແບບ ຕ່າງໆ ເປັນຕົ້ນທາງບົກ, ທາງອາກາດ ແລະ ທາງນ້ຳ, ການ ເຊື່ອມຈອດທາງດ້ານສະຖາບັນການເງິນ ແລະ ລະບົບກົນໄກ ການເຊື່ອມຈອດຕ່າງໆ ລວມທັງການສົ່ງເສີມການແລກປ່ຽນ ການໄປມາຫາສູ່ຊຶ່ງກັນ ແລະ ກັນລະຫວ່າງປະຊາຊົນ ອັນຈະເປັນການສ້າງເງື່ອນ ໄຂອັນສະດວກ ໃຫ້ແກ່ການພັດທະນາເສດຖະກິດ-ສັງຄົມ, ການຄ້າ, ການລົງທຶນ ກໍຄືການຍົກລະດັບຊີວິດການເປັນຢູ່ ຂອງປະຊາຊົນໃຫ້ດີຂຶ້ນ. ເພື່ອບັນລຸເປົ້າໝາຍດັ່ງກ່າວ, ໃນກອບອາຊຽນ ພວກເຮົາ ໄດ້ຮັບຮອງເອົາຍຸດທະສາດ ແລະ ມາດຕະການຫຼາຍຢ່າງຄື: ແຜນແມ່ບົດການເຊື່ອມຈອດອາຊຽນ 2025, ແຜນປະຕິບັດ ງານການເຊື່ອມໂຍງອາຊຽນ ສະບັບທີ 3 ແລະ ອື່ນໆ. ສຳລັບ ສປປ ລາວ ຊຶ່ງເປັນປະເທດບໍ່ມີຊາຍແດນຕິດທະ ເລ ແລະ ອ້ອມຮອບດ້ວຍ 5 ປະເທດໃກ້ຄຽງນັ້ນ ໄດ້ຖືເອົາ ການເຊື່ອມຈອດ ເປັນບຸລິມະສິດໜຶ່ງ ໃນການພັດທະນາປະ ເທດຂອງຕົນ ໂດຍໄດ້ດຳເນີນນະໂຍບາຍຫັນຈາກປະເທດ ທີ່ບໍ່ມີຊາຍແດນຕິດທະເລ ໄປເປັນປະເທດເຊື່ອມຈອດ ໂດຍ ສຸມໃສ່ພັດທະນາລະບົບພື້ນຖານໂຄງລ່າງ ເພື່ອເຊື່ອມຈອດ ພາຍໃນປະເທດໃຫ້ທົ່ວເຖິງ ແລະ ລະຫວ່າງ ສປປ ລາວ ກັບ ປະເທດເພື່ອນບ້ານເຊັ່ນ: ສ້າງ ແລະ ປັບປຸງຖະໜົນຫົນທາງ, ຂະຫຍາຍຕາໜ່າງການບິນ, ພັດທະນາການເດີນເຮືອຕາມ ລຳແມ່ນ້ຳຂອງ, ກໍ່ສ້າງເສັ້ນທາງລົດໄຟຈາກຊາຍແດນ ສປ ຈີນ ຫານະຄອນຫຼວງວຽງຈັນ ເພື່ອເຊື່ອມຈອດກັບເສັ້ນທາງ ລົດໄຟປະເທດເພື່ອນບ້ານ, ພ້ອມທັງມີການສຶກສາການຂະ ຫຍາຍຕາໜ່າງເສັ້ນທາງລົດໄຟ ໃຫ້ກວ້າງຂວາງຂຶ້ນກວ່າເກົ່າ. ນອກຈາກນັ້ນ ສປປ ລາວ ກໍໄດ້ມີການຮ່ວມກັບປະເທດ ເພື່ອນບ້ານ ໃນການສ້າງແລວເສດຖະກິດຕາເວັນອອກ-ຕາ ເວັນຕົກ, ແລວເສດຖະກິດເໜືອ-ໃຕ້ ເພື່ອຕິດຈອດກັບປະເທດ ໃກ້ຄຽງ ແນໃສ່ພັດທະນາລະບົບຄົມມະນາຄົມ ໃຫ້ສະດວກດີ, ທັງມີການຂະຫຍາຍລະບົບຕາຂ່າຍໄຟຟ້າ ເພື່ອສະໜອງພະ ລັງງານໄຟຟ້າ ໃຫ້ແກ່ປະເທດໃນອະນຸພາກພື້ນ. ໂດຍລວມແລ້ວ, ການຮ່ວມມືການເຊື່ອມຈອດ ຈະພາ ໄປສູ່ການພັດທະນາ ທີ່ຕິດພັນກັນ ແລະ ຈະກາຍເປັນລະບົບ ທີ່ກົມກຽວກັນ ອັນຈະເປັນການຮັບປະກັນໃຫ້ແກ່ການພັດທະ ນາແບບຍືນຍົງ, ບົນຈິດໃຈດັ່ງກ່າວ, ສປປ ລາວ ຕີລາຄາສູງ ຕໍ່ຄວາມສຳຄັນ ແລະ ສະໜັບສະໜູນຍຸດທະສາດ ໜຶ່ງແລວ ທາງ ໜຶ່ງເສັ້ນທາງ, ພ້ອມທັງກຽມພ້ອມເຂົ້າຮ່ວມການຈັດຕັ້ງ ປະຕິບັດບັນດາກິດຈະກຳ ແລະ ໂຄງການຕ່າງໆ ຕາມຄວາມ ສາມາດຂອງຕົນ ເພື່ອນຳຜົນປະໂຫຍດມາສູ່ພາກພື້ນ ແລະ ສົ່ງເສີມການເຊື່ອມຈອດກັນ ຂອງບັນດາປະເທດຕາມແລວ ທາງ. ອັນນີ້ຈະເປັນການປະກອບສ່ວນສຳຄັນ ເຂົ້າໃນການ ເຮັດໃຫ້ນະໂຍບາຍຫັນຈາກປະເທດ ທີ່ບໍ່ມີຊາຍແດນຕິດກັບ ທະເລ ໄປເປັນປະເທດເຊື່ອມຈອດກັບພາກພື້ນຂອງ ສປປ ລາວ ຂອງພວກຂ້າພະເຈົ້າ ໃຫ້ປະກົດຜົນເປັນຈິງ. ຂ້າພະເຈົ້າ ຫວັງຢ່າງຍິ່ງວ່າ ໃນການຈັດຕັ້ງປະຕິບັດຂໍ້ລິເລີ່ມນີ້ ບັນດາປະ ເທດດ້ອຍພັດທະນາ ກໍຄືປະເທດທີ່ບໍ່ມີຊາຍແດນຕິດກັບທະ ເລ ຈະໄດ້ຮັບການສະໜັບສະໜູນ ແລະ ການຮ່ວມມືຈາກບັນ ດາປະເທດທີ່ມີທ່າແຮງ ກໍຄືອົງການຈັດຕັ້ງສາກົນຕ່າງໆຫຼາຍ ຂຶ້ນຕື່ມ ໃນການພັດທະນາລະບົບເຊື່ອມຈອດຕ່າງໆ. ໂອກາດນີ້, ຂ້າພະເຈົ້າ ຂໍສະໜັບສະໜູນບັນດາຂໍ້ລິເລີ່ມ ທີ່ທ່ານປະທານ ສີຈິ້ນຜິງ ໄດ້ນຳສະເໜີຕໍ່ກອງປະຊຸມໂຕະມົນ ຂັ້ນສູງຂອງພວກເຮົາໃນຄັ້ງນີ້.