ທ່ານ ທອງລຸນ ສີສຸລິດ ຕ້ອນຮັບ ລມຕ ກະຊວງ ການຕ່າງປະເທດ ແລະ ວຽກງານເອີຣົບລຸກຊຳບວກ


...

14.06.2018 9:24     

   ໃນວັນທີ 13 ມິຖຸນາ ທີ່ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ນາຍົກລັດ ຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງທ່ານ ຊັງ ອາແຊນບອນ (Jean ASSELBOEN) ລັດຖະມົນຕີ ກະຊວງການຕ່າງປະເທດ ແລະ ວຽກງານເອີຣົບ ແຫ່ງ ຣາຊະ ອານາຈັກລຸກຊຳບວກ ພ້ອມ ຄະນະ, ໂອກາດທີ່ເດີນທາງ ມາຢ້ຽມຢາມ ສປປ ລາວ ຢ່າງ ເປັນທາງການ, ໃນລະຫວ່າງ ວັນທີ 12-13 ມິຖຸນາ 2018. ໃນໂອກາດນີ້, ທ່ານນາຍົກ ລັດຖະມົນຕີ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນ ຮັບຕໍ່ການເດີນທາງມາຢ້ຽມ ຢາມ ສປປ ລາວ ຢ່າງເປັນທາງ ການຂອງຄະນະຜູ້ແທນລຸກຊຳ ບວກ ໃນຄັ້ງນີ້, ພ້ອມທັງຕີລາ ລາສູງຕໍ່ການພົວພັນຮ່ວມມື ລະຫວ່າງ ສປປ ລາວ ແລະ ຣາຊະອານາຈັກ ລຸກຊຳບວກ ທີ່ມີລັກສະນະຕັ້ງໜ້າ, ມີຈຸດສຸມ ແລະ ມີລະດັບເປົ້າໝາຍໃນ ການຈັດຕັ້ງປະຕິບັດຢ່າງເປັນ ລະບົບ ແລະ ໄດ້ຮັບການເສີມ ຂະຫຍາຍຂຶ້ນໄປເລື້ອຍໆ ນັບ ຕັ້ງແຕ່ໄດ້ສ້າງຕັ້ງສາຍພົວພັນ ການທູດນຳກັນໃນວັນທີ 25 ກັນຍາ 1997 ເປັນຕົ້ນມາ. ໃນ ໂອກາດດັ່ງກ່າວນີ້, ທ່ານນາຍົກ ລັດຖະມົນຕີ ກໍໄດ້ສະແດງ ຄວາມຂອບໃຈຕໍ່ການຊ່ວຍ ເຫຼືອອັນລ້ຳຄ່າຂອງລັດຖະ ບານ ແລະ ປະຊາຊົນ ລຸກຊຳ ບວກ ໃຫ້ແກ່ ສປປ ລາວ ໃນ ໄລຍະຜ່ານມາ ທັງໃນຂອບ ສອງຝ່າຍ ແລະ ຫຼາຍຝ່າຍ, ຊຶ່ງໃນປີ 2017 ລັດຖະບານ ລຸກຊຳບວກ ໄດ້ລົງນາມເພີ່ມ ການຊ່ວຍເຫຼືອໃຫ່ແກ່ ສປປ ລາວ ຈາກ 60 ລ້ານເອີໂຣ ມາ ເປັນ 75 ລ້ານເອີໂຣ ເພື່ອຊ່ວຍ ເຫຼືອໃນຂະແໜງສາທາລະນະ ສຸກ, ການພັດທະນາຊົນນະ ບົດ, ການພັດທະນາພື້ນຖານ ໂຄງລ່າງ, ການທ່ອງທ່ຽວ ແລະ ການໂຮງແຮມ, ອາຊີວະສຶກ ສາ, ການປົກຄອງ ແລະ ໂຄງ ການຮ່ວມມືອື່ນໆທີ່ລາວ ແລະ ລຸກຊຳບວກ ພວມຈັດຕັ້ງປະຕິ ບັດໃຫ້ປະກົດຜົນເປັນຈິງ. ການ ຊ່ວຍເຫຼືອດັ່ງກ່າວ ໄດ້ປະກອບ ສ່ວນຢ່າງຕັ້ງໜ້າໃນການຈັດຕັ້ງ ປະຕິບັດແຜນພັດທະນາເສດ ຖະກິດ-ສັງຄົມ 5 ປີ ຄັ້ງທີ 8 (2016-2020) ຂອງ ສປປ ລາວ ກໍຄືການລຶບລ້າງຄວາມທຸກ ຍາກຢູ່ ສປປ ລາວ. ພ້ອມດຽວ ກັນນີ້, ທ່ານນາຍົກລັດຖະມົນຕີ ທອງລຸນ ສີສຸລິດ ຍັງສະເໜີໃຫ້ ພາກສ່ວນກ່ຽວຂ້ອງຂອງທັງ ສອງຝ່າຍສືບຕໍ່ປຶກສາຫາລື ເພື່ອຊຸກຍູ້ ແລະ ຊອກຫາທ່າ ແຮງໃນການຮ່ວມມືດ້ານການ ຄ້າ-ການລົງທຶນລະຫວ່າງສອງ ປະເທດ, ພ້ອມທັງສະໜັບສະ ໜູນຮ່ວມມືດ້ານທຸລະກິດ ແລະ ການຮ່ວມມືລະຫວ່າງພາກລັດ ແລະ ເອກະຊົນ. ໃນຕອນທ້າຍ ທ່ານ ທອງລຸນ ສີສຸລິດ ກໍໄດ້ ອວຍພອນໃຫ້ທ່ານລັດຖະມົນ ຕີ ພ້ອມດ້ວຍຄະນະ ຈົ່ງປະສົບ ຜົນສຳເລັດ ໃນການເດີນທາງ ມາຢ້ຽມຢາມທາງການ ແລະ ເຮັດວຽກຢູ່ ສປປ ລາວ ໃນຄັ້ງນີ້. ໃນໂອກາດດຽວກັນ, ທ່ານລັດຖະມົນຕີ ຊັງ ອາແຊນ ບອນ ກໍໄດ້ສະແດງຄວາມ ຂອບໃຈຕໍ່ການຕ້ອນຮັບອັນ ອົບອຸ່ນ ແລະ ສະແດງຄວາມ ຂອບໃຈລັດຖະບານ ສປປ ລາວ ຕໍ່ການສະໜັບສະໜູນ ລຸກຊຳບວກ ໃນການສະໝັກ ເຂົ້າເປັນສະມາຊິກຂອງອົງ ການຈັດຕັ້ງສາກົນໃນໄລຍະ ຜ່ານມາ. (ຂ່າວ: ກົມເສດຖະກິດ ກະຊວງການຕ່າງປະເທດ, ພາບ: ພູວຽງຄຳ)