ສານສະແດງຄວາມເຫັນໃຈຈາກຜູ້ນຳ ສ.ເກົາຫຼີ


03.08.2018 10:58      ພະນະທ່ານ ມູນ ແຈອິນ ປະທານາທິບໍດີ ແຫ່ງ ສາທາ ລະນະລັດ ເກົາຫຼີ ໄດ້ສົ່ງສານສະແດງຄວາມເຫັນໃຈ ເຖິງ ພະນະທ່ານ ບຸນຍັງ ວໍລະຈິດ ປະທານປະເທດເຮົາ ຊຶ່ງມີ ເນື້ອໃນວ່າ: ພະນະທ່ານປະທານປະເທດ ແຫ່ງ ສາທາລະ ນະລັດ ປະຊາທິປະໄຕ ປະຊາຊົນລາວ, ຂ້າພະເຈົ້າ ໄດ້ຮັບ ຂ່າວເສົ້າສະຫຼົດໃຈ ແລະ ໜ້າເສຍດາຍ ຢ່າງເຫຼືອລົ້ນ ກ່ຽວກັບເຫດສຸດວິໄສ ຄູກັ້ນນ້ຳຂອງ ເຂື່ອນໄຟຟ້າ ເຊປຽນ-ເຊນ້ຳນ້ອຍແຕກ ທີ່ແຂວງອັດຕະປື ໃນ ວັນທີ 23 ກໍລະກົດຜ່ານມາ ຊຶ່ງເຮັດໃຫ້ປະຊາຊົນຈຳນວນຫຼາຍໃນເຂດດັ່ງກ່າວ ເສຍຊີວິດ ແລະ ຫຼາຍພັນຄົນບໍ່ມີທີ່ຢູ່ອາໄສ. ໃນນາມຕາງໜ້າ ລັດຖະບານ ແລະ ປະຊາຊົນ ສາທາ ລະນະລັດເກົາຫຼີ, ຂ້າພະເຈົ້າ ຂໍສະແດງຄວາມໂສກເສົ້າເສຍ ໃຈ ແລະ ແບ່ງເບົາຄວາມທຸກໂສກ ມາຍັງປະຊາຊົນລາວ ໂດຍ ສະເພາະແມ່ນຄອບຄົວ ທີ່ໄດ້ຮັບຜົນເສຍຫາຍຢ່າງໜັກໜ່ວງ ໃນຄັ້ງນີ້. ລັດຖະບານເກົາຫຼີ ຈະພະຍາຍາມຢ່າງສຸດຄວາມສາມາດ ໃນການຊ່ວຍເຫຼືອແກ່ປະຊາຊົນລາວ ທີ່ໄດ້ຮັບຜົນກະທົບ ຈາກເຫດການນ້ຳຖ້ວມ ຈາກເຫດການເຂື່ອນໄຟຟ້າໃນຄັ້ງນີ້. ຂ້າພະເຈົ້າ ເຊື່ອແນ່ວ່າ ພາຍໃຕ້ການຊີ້ນຳ-ນຳພາ ຂອງ ພະນະທ່ານ, ຊີວິດການເປັນຢູ່ຂອງປະຊາຊົນທ້ອງຖິ່ນ ທີ່ໄດ້ ຮັບຜົນກະທົບ ຈະໄດ້ຮັບການຟື້ນຟູຄືນໃໝ່ ໄດ້ຢ່າງວ່ອງໄວ ແລະ ປະຊາຊົນລາວ ທີ່ໄດ້ຮັບຜົນກະທົບຈະສາມາດຜ່ານຜ່າ ຄວາມໂສກເສົ້າ-ເສຍໃຈ ແລະ ຄວາມທຸກທໍລະມານ ໃນຄັ້ງນີ້ ໄປດ້ວຍດີ. ໃນໂອກາດດຽວກັນ, ພະນະທ່ານ ກັງ ກຽງຮົວ ລັດຖະ ມົນຕີການຕ່າງປະເທດ ແຫ່ງ ສາທາລະນະລັດ ເກົາຫຼີ ກໍໄດ້ ສົ່ງສານສະແດງຄວາມເຫັນໃຈເຖິງ ພະນະທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ເຊັ່ນດຽວກັນ.