ນາຍົກ ລົງຕິດຕາມສະພາບນ້ຳຖ້ວມຢູ່ແຂວງວຽງຈັນ


...

12.09.2018 8:26     

   ນາຍົກລັດຖະມົນຕີ ເນັ້ນໃຫ້ການນຳແຂວງວຽງຈັນ ຮ່ວມກັບພາກສ່ວນກ່ຽວຂ້ອງເລັ່ງຊ່ວຍ ເຫຼືອປະຊາຊົນຜູ້ປະສົບໄພ ພ້ອມທັງຮັບປະກັນຄວາມປອດໄພດ້ານຊີວິດ ແລະ ຊັບສິນ ຂອງປະຊາ ຊົນ ພ້ອມທັງສະເໜີໃຫ້ເຂື່ອນນ້ຳງື່ມສ້າງຕັ້ງກອງທຶນໃດໜຶ່ງຂຶ້ນມາ ເພື່ອຊ່ວຍເຫຼືອປະຊາຊົນຜູ້ ປະສົບໄພນ້ຳຖ້ວມ. ນອກຈາກນີ້, ຍັງແນະນຳໃຫ້ເຂື່ອນນ້ຳງື່ມ 1 ບໍລິຫານຈັດການນ້ຳໃຫ້ເປັນລະ ບົບ ເພື່ອບໍ່ໃຫ້ສົ່ງຜົນກະທົບຕໍ່ປະຊາຊົນຢູ່ລຸ່ມເຂື່ອນ. ຂະນະທີ່ລະດັບນ້ຳງື່ມໄດ້ຫຼຸດລົງເລື້ອຍໆ. ຫຼັງຈາກທີ່ເຂື່ອນນ້ຳງື່ມ 1 ຫຼຸດການປ່ອຍນ້ຳຈາກ 4,5 ແມັດ ໃນຄືນວັນທີ 4 ກັນຍາຜ່ານມາ ມາເປັນ 3,5 ແມັດ ໃນວັນທີ 6 ກັນຍາ. ເມື່ອວັນທີ 6 ກັນຍານີ້ ທ່ານ ທອງລຸນ ສີສຸລິດ ນາຍົກລັດຖະມົນຕີພ້ອມຄະນະ ໄດ້ລົງຕິດຕາມສະພາບນຳ້ຖ້ວມຢູ່ເມືອງທຸ ລະຄົມ ແຂວງວຽງຈັນ, ທ່ານ ວິດົງ ໄຊຍະສອນ ເຈົ້າແຂວງໆວຽງຈັນ ໄດ້ລາຍງາຍວ່າ: ຫຼັງຈາກທີ່ເຂື່ອນນຳ້ງື່ມໄດ້ເປີດປະຕູນຳ້ລົ້ນ ເຮັດໃຫ້ນຳ້ງື່ມໄດ້ໄຫຼເຂົ້າຖ້ວມບ້ານເຮືອນ ຂອງປະຊາຊົນຕັ້ງແຕ່ວັນທີ 18 ສິງຫາເປັນຕົ້ນມາ, ມາຮອດວັນທີ 5 ກັນຍານຳ້ງື່ມໄດ້ຍື່ງຂຶ້ນຖ້ວມບ້ານເຮືອນປະຊາຊົນຈຳນວນ 16 ບ້ານ ປະກອບມີ ບ້ານຫາດສວນ, ຕານປ່ຽວ, ບ້ານຈຸ້ມ, ບ້ານສຸກສາລາ, ບ້ານແຈ້ງ, ລິ່ງຊັນ, ຫາດສ້ຽວ, ໂພນແພງ, ບຸ່ງພ້າວ, ຫາດໄຊ, ນາຄອງ, ຖິ່ນຄຳ, ໂພນແຮ່, ບ້ານເກິນໃຕ້ - ກາງ ແລະ ບ້ານ ເກິນເໜືອ. ທ່ານກ່າວອີກວ່າ: ເຫດ ການນຳ້ຖ້ວມຄັ້ງນີ້ ສົ່ງຜົນໃຫ້ເນື້ອທີ່ນາປີເສຍຫາຍຈຳນວນ 1.750 ເຮັກຕາ, ສວນສາລີແຂງ 350 ເຮັກຕາ, ສວນຫຍ້າ ເພື່ອເປັນອາຫານສັດເສຍຫາຍ 268 ເຮັກຕາ, ສາລີຫວານ 152 ເຮັກຕາ. ນອກຈາກນີ້ ຍັງມີ ສວນກ້ວຍ ແລະ ສວນປູກພືດຜັກອື່ນໆຕື່ມອີກ. ທ່ານ ຄຳມະນີ ອິນທິ ລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ລາຍງານວ່າ: ຈາກເຫດການພາຍຸຫຼາຍລູກໄດ້ພັດຜ່ານປະເທດເຮົາ ເຮັດໃຫ້ເກີດມີຝົນຕົກໜັກແຕ່ເໜືອເຖິງໃຕ້ ໄດ້ເຮັດໃຫ້ເຂື່ອນນຳ້ງື່ມ 1 ຕ້ອງໄດ້ເປີດປະຕູລະບາຍນຳ້ອອກຈາກໜ້າເຂື່ອນຕັ້ງແຕ່ວັນທີ 14 ສິງຫາເປັນຕົ້ນມາ ແຕ່ທີ່ໜັກກວ່າໝູ່ແມ່ນໃນທ້າຍເດືອນສິງຫາເປັນຕົ້ນມາ ເກີດມີຝົນຕົກໜັກຕິດຕໍ່ກັນຫຼາຍວັນເຮັດໃຫ້ມວນນຳ້ໄຫຼລົງເຂົ້າອ່າງເຂື່ອນນຳ້ ງື່ມ 1 ເກືອບ 4 ພັນແມັດກ້ອນ ຕໍ່ວິນາທີ ບວກໃສ່ກັບເຂື່ອນນຳ້ງື່ມ 2 ກໍໄດ້ເປີດປະຕູເພື່ອປ່ອຍນຳ້ອອກເກືອບ 3 ພັນກວ່າແມັດກ້ອນຕໍ່ວິນາທີ ໄຫຼເຂົ້າມາຫາອ່າງນຳ້ງື່ມ 1. ນອກຈາກນີ້ ຍັງມີມວນນຳ້ຈາກເຂື່ອນນຳ້ຊອງ, ນຳ້ລີກ 1 ແລະ 2 ແລະ ແຫຼ່ງນຳ້ອື່ນໆອີກ ເຮັດໃຫ້ເຂື່ອນນຳ້ງື່ມ 1 ຈຳເປັນຕ້ອງໄດ້ປ່ອຍນຳ້ອອກຈາກເຂື່ອນ ເພື່ອຄວາມປອດໄພ, ນັບແຕ່ວັນທີ 4-5 ກັນຍາ ມວນນ້ຳໄດ້ໄຫຼທະລຸ ເຂົ້າສູ່ນຳ້ງື່ມ 2 ອີກຮອບໃໝ່, ເຮັດໃຫ້ເຂື່ອນດັ່ງກ່າວຕ້ອງໄດ້ເປີດປະຕູເພື່ອປ່ອຍນຳ້ອອກສູງປະມານ 4 ແມັດ ເຮັດໃຫ້ມວນນຳ້ໄຫຼສູ່ເຂື່ອນນຳ້ງື່ມ 1 ປະມານ 4 ພັນກວ່າແມັດກ້ອນຕໍ່ວິນາທີ ດັ່ງນັ້ນເຂື່ອນນຳ້ງື່ມ 1 ຈຳເປັນຕ້ອງເປີດປະຕູ ເພື່ອປ່ອຍນຳ້ອອກຈາກ 4 ແມັດ ມາເປັນ 4,50 ແມັດ ໃນກາງຄືນຂອງ ວັນທີ 4 ກັນຍາ. ແນວໃດກໍຕາມຈາກການເປີດປະຕູລະບາຍນຳ້ດັ່ງກ່າວ ໄດ້ເຮັດໃຫ້ລະດັບນຳ້ຢູ່ເຂື່ອນນຳ້ງື່ມ 1 ເລີ່ມຫຼຸດລົງ ຈຶ່ງໄດ້ປັບການເປີດປະຕູຫຼຸດລົງຈາກ 4,50 ແມັດມາເປັນ 4 ແມັດໃນຕອນເຊົ້າຂອງວັນທີ 6 ກັນຍານີ້, ສ່ວນລະດັບນ້ຳຢູ່ລຸ່ມເຂື່ອນກໍໄດ້ເລີ່ມຫຼຸດລົງຕາມລຳດັບ. ທ່ານ ລຽນ ທີແກ້ວ ລັດຖະມົນຕີ ກະຊວງກະສິກຳ ແລະ ປ່າໄມ້ ລາຍງານວ່າ:ຈາກ ເຫດການນຳ້ຖ້ວມປີນີ້ ທົ່ວ ປະເທດ ມີເນື້ອທີ່ນາເສຍຫາຍ ປະມານ 1 ແສນກວ່າເຮັກຕາ ກວມເອົາ 13% ຂອງເນື້ອທີ່ນາ ທັງໝົດ. ນອກຈາກນີ້ ເນື້ອທີ່ ປູກພືດຜັກ 10 ພັນກວ່າເຮັກ ຕາ ຊຶ່ງກະຊວງກະສິກຳ ແລະ ປ່າໄມ້ໄດ້ກະກຽມແນວພັນເຂົ້າ ປະມານ 1 ແສນກວ່າເຮັກຕາ ເພື່ອສະໜອງໃຫ້ຊາວກະສິ ກອນໄດ້ເຮັດນາແຊງ ຫາກທ້ອງຖິ່ນໃດຕ້ອງການແນວພັນ ກະຊວງກະສິກຳ ແລະ ປ່າໄມ້ກໍພ້ອມສະໜອງໃຫ້, ສຳລັບຢູ່ເຂດເມືອງທຸລະຄົມ ຊຶ່ງເປັນເຂດປູກພືດຜັກ ແລະ ລ້ຽງສັດໃຫຍ່ ຊຶ່ງກະຊວງກະສິກຳ ແລະ ປ່າໄມ້ ໄດ້ມີແນວພັນຜັກຈຳ ນວນໜຶ່ງ, ນອກຈາກນີ້ ແນວພັນຫຍ້າກໍສາມາດຕອບສະໜອງໃຫ້ປະຊາຊົນໄດ້. ທ່ານນາຍົກລັດຖະມົນ ຕີ ໄດ້ສະແດງຄວາມເປັນຫ່ວງເປັນໄຍຕໍ່ປະຊາຊົນຜູ້ປະສົບ ໄພ ພ້ອມທັງເນັ້ນໃຫ້ການນຳແຂວງຮ່ວມກັບພາກສ່ວນກ່ຽວ ຂ້ອງຕ້ອງເລັ່ງຊ່ວຍເຫຼືອປະຊາ ຊົນ ເພື່ອໃຫ້ເຂົາເຈົ້າປອດໄພທັງຊີວິດ ແລະ ຊັບສິນ, ຊ່ວຍປະຊາຊົນຜູ້ທີ່ຂາດອາຫານການກິນ, ນອກຈາກນີ້ ຫຼັງຈາກນຳ້ບົກແຫ້ງແລ້ວ ຕ້ອງເລັ່ງຟື້ນ ຟູຊີວິດການເປັນຢູ່ຂອງປະຊາ ຊົນໃຫ້ກັບຄືນສູ່ສະພາບປົກ ກະຕິໂດຍໄວ ພ້ອມທັງສະເໜີ ໃຫ້ພາກສ່ວນກ່ຽວຂ້ອງເບິ່ງ ແຍງຢ່າງໃກ້ຊິດ ເພາະອາດມີພະຍາດລະບາດຂຶ້ນຫຼັງນຳ້ບົກແຫ້ງ. ຫຼັງຈາກນັ້ນ ທ່ານນາຍົກໄດ້ຂຶ້ນເຮືອລ່ອງໄປຕາມສາຍນຳ້ງື່ມ ເພື່ອຕິດຕາມສະພາບຄວາມເສຍຫາຍກ່ອນຈະເດີນ ທາງໄປຢ້ຽມຢາມເຂື່ອນຳ້ງື່ມໜຶ່ງ, ທ່ານ ບົວວັນ ຈັນສະຫວັດ ຜູ້ອຳນວຍການບໍລິສັດນຳ ້ງື່ມ 1 ລາຍງານວ່າ:ໃນເວລາ 22:00 ໂມງ ຂອງວັນທີ 4 ກັນຍາ ເຂື່ອນນຳ້ງື່ມ 1 ໄດ້ເປີດປະຕູ ນຳ້ລົ້ນຂຶ້ນສູງສຸດ 4,50 ແມັດ ເຮັດ ໃຫ້ນຳ້ໄຫຼລົງປະມານ 2,2 ພັນ ແມັດກ້ອນຕໍ່ວິນາທີ, ແນວ ໃດກໍ ຕາມ ຫຼັງຈາກປ່ອຍລະດັບດັ່ງກ່າວ ໄດ້ເຮັດໃຫ້ນຳ້ໃນໜ້າເຂື່ອນຫຼຸດລົງ ລວມທັງລະດັບນຳ້ຢູ່ລຸ່ມເຂື່ອກໍຫຼຸດລົງ ຊຶ່ງລະດັບນຳ້ຢູ່ປາກກະຍຸງ ໃນຕອນເຊົ້າວັນທີ 6 ກັນຍາ ຢູ່ທີ່ 12,28 ແມັດ ແລະ ຄາດວ່າຈະຫຼຸດລົງເລື້ອຍໆ. ໃນໂອກາດດັ່ງກ່າວ ທ່ານ ນາຍົກລັດຖະມົນຕີ ໄດ້ສະ ເໜີ ໃຫ້ເຂື່ອນນຳ້ງື່ມ 1 ຕັ້ງກອງ ທຶນໃດໜຶ່ງຂຶ້ນມາ ເພື່ອແຮໄວ້ບັນເທົາທຸກໃຫ້ປະຊາຊົນຜູ້ປະສົບໄພທີ່ອາດຈະເກີດຂຶ້ນໃນຕໍ່ໜ້າ, ພ້ອມທັງສະເຫນີໃຫ້ບໍລິຫານຈັດການນຳ້ໃຫ້ເປັນລະບົບ ເພື່ອເຮັດແນວໃດບໍ່ ໃຫ້ສົ່ງຜົນກະທົບຕໍ່ປະຊາຊົນຜູ້ ຢູ່ລຸ່ມເຂື່ອນ ຫຼື ຫາກຈຳເປັນກໍ ໃຫ້ມີຜົນກະທົບໜ້ອຍທີ່ສຸດ. (ຂ່າວ: ຄຳເຮືອງ)