ນາຍົກລັດຖະມົນຕີ ເຂົ້າຢ້ຽມຂໍ່ານັບເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ


...

14.09.2018 9:05     

   ໃນໂອກາດທີ່ເດີນທາງເຂົ້າຮ່ວມກອງປະຊຸມເວທີປຶກສາຫາລືເສດຖະກິດໂລກ ກ່ຽວກັບອາ ຊຽນ ຄັ້ງທີ 27 ທີ່ຮ່າໂນ້ຍ, ສສ ຫວຽດນາມ ໃນຕອນເຊົ້າວັນທີ 13 ກັນຍານີ້, ສະຫາຍ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ນຳພາຄະນະຜູ້ແທນເຂົ້າຢ້ຽມຂ່ຳນັບ ສະຫາຍ ຫງວຽນ ຟູ ຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ທີ່ຫ້ອງ ວ່າການສູນກາງພັກກອມມູນິດຫວຽດນາມ. ໃນໂອກາດດັ່ງກ່າວນີ້ ສະຫາຍ ຫງວຽນ ຟູ ຈ້ອງ ກໍໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ, ຊົມເຊີຍ ແລະ ຕີລາຄາສູງຕໍ່ສະຫາຍນາຍົກລັດຖະມົນຕີ ແຫ່ງ ສປປ ລາວ ແລະ ຄະນະ ທີ່ໄດ້ເດີນທາງມາເຂົ້າຮ່ວມກອງປະຊຸມ ແລະ ຢ້ຽມຢາມເຮັດວຽກຢູ່ ສສ.ຫວຽດນາມ ໃນຄັ້ງນີ້, ເຊິ່ງເປັນຂີດໝາຍອັນສຳຄັນປະກອບສ່ວນເຂົ້າໃນການຮັດແໜ້ນສາຍພົວພັນອັນພິເສດ ແລະ ການພົວພັນຮ່ວມມືຮອບດ້ານ, ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ ທີ່ມີມາແຕ່ດົນນານນັ້ນ, ໂດຍສະເພາະແມ່ນການແລກປ່ຽນບົດຮຽນ, ການຊ່ວຍເຫຼືອເຊິ່ງກັນ ແລະ ກັນ ໃນວຽກງານຕ່າງໆໃຫ້ແຕກດອກອອກຜົນ ຍິ່ງໆຂຶ້ນ. ໃນໂອກາດນີ້, ສະ ຫາຍ ທອງລຸນ ສີສຸລິດ ກໍໄດ້ສະ ແດງຄວາມຂອບໃຈຢ່າງຈິງໃຈ ມາຍັງສະຫາຍ ຫງວຽນ ຟູ ຈ້ອງ, ທີ່ໄດ້ສະລະເວລາອັນມີຄ່າໃຫ້ການຕ້ອນຮັບຢ່າງອົບອຸ່ນ, ພ້ອມທັງສະແດງຄວາມຂອບໃຈຢ່າງສູງມາຍັງ ພັກ-ລັດ ແລະ ປະຊາຊົນຫວຽດນາມ ທີ່ໄດ້ໃຫ້ການຊ່ວຍເຫຼືອອັນລໍ້າຄ່າແກ່ປະຊາຊົນລາວ ໂດຍສະ ເພາະປະຊາຊົນເມືອງສະໜາມໄຊ, ແຂວງອັດຕະປື ທີ່ໄດ້ຮັບຜົນກະທົບຈາກຄູກັ້ນນໍ້າເຂື່ອນໄຟຟ້າ ເຊປຽນ-ເຊນໍ້ານ້ອຍ ແຕກໃນທ້າຍເດືອນ ກໍລະກົດ ທີ່ຜ່ານມາ. ໃນຕອນເຊົ້າຂອງວັນດຽວກັນສະຫາຍ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ກໍໄດ້ນຳພາຄະນະຜູ້ແທນພົບປະສອງຝ່າຍກັບ ສະຫາຍ ຫງວຽນ ຊັວນ ຟຸກ, ນາຍົກລັດຖະມົນຕີ ແຫ່ງ ສສ. ຫວຽດນາມ. ສະຫາຍ ທອງລຸນ ສີສຸລິດ ໄດ້ສະແດງຄວາມ ຊົມເຊີຍຕໍ່ຜົນສຳເລັດອັນຈົບງາມໃນການເປັນເຈົ້າ ພາບຈັດກອງປະຊຸມເວທີປຶກ ສາຫາລືເສດຖະກິດໂລກວ່າດ້ວຍອາຊຽນ ທີ່ຮ່າໂນ້ຍ, ຊຶ່ງເປັນການປະກອບສ່ວນຍົກສູງຖານະບົດບາດ, ຊື່ສຽງຂອງ ສສ ຫວຽດນາມ ຢູ່ໃນເວທີສາກົນ ຂື້ນອີກບາດກ້າວໜື່ງ. ການພົບປະສອງຝ່າຍໃນຄັ້ງນີ້, ສະຫາຍ ນາຍົກລັດຖະມົນຕີ ທອງລຸນ ສີສຸລິດ ກໍໄດ້ສະແດງຄວາມຊົມເຊີຍຕໍ່ການຕ້ອນຮັບອັນອົບອຸ່ນມາຍັງສະຫາຍ ຫງວຽນ ຊັວນ ຟຸກ ແລະ ໄດ້ພົບປະກັນ ເປັນປົກກະຕິໃນທຸກໆກອງປະ ຊຸມທີ່ສຳຄັນໃນພາກພື້ນ ແລະ ສາກົນ, ຊຶ່ງສະແດງເຖິງມູນ ເຊື້ອສາຍພົວພັນພິເສດເພື່ອເສີມຂະຫຍາຍສາຍພົວພັນຮ່ວມ ມືລະຫວ່າງສອງຊາດລາວ-ຫວຽດນາມ ໃຫ້ນັບມື້ນັບມີປະ ສິດທິຜົນຍິ່ງໆຂື້ນ ແລະ ໄດ້ຕີລາຄາສູງຕໍ່ຄວາມພະຍາຍາມຂອງສະຫາຍນາຍົກລັດຖະ ມົນຕີ ແລະ ພັກ-ລັດຖະບານຫວຽດນາມ ທີ່ໄດ້ເອົາໃຈໃສ່ ສ້າງເງື່ອນໄຂອຳນວຍຄວາມສະດວກ ແລະ ໃຫ້ການຊ່ວຍ ເຫຼືອເພື່ອການພັດທະນາແກ່ ສປປ ລາວ ມາຕະຫຼອດ, ພ້ອມທັງເຊື່ອໝັ້ນວ່າສອງນາຍົກພວກເຮົາຈະພ້ອມກັນເຮັດວຽກຮ່ວມກັນບົນຈິດໃຈການຕົກລົງຂອງສອງພັກສອງລັດ ແລະ ສັນຍາຕ່າງໆທີ່ສອງຝ່າຍໄດ້ລົງນາມຮ່ວມກັນ. ໃນໂອກາດດັ່ງກ່າວນີ້, ສະຫາຍ ທອງລຸນ ສີສຸລິດ ໄດ້ຕາງໜ້າໃຫ້ພັກ, ລັດຖະບານ ແລະ ປະຊາຊົນລາວສະແດງ ຄວາມຮູ້ບຸນຄຸນ ແລະ ສະແດງຄວາມຂອບໃຈຢ່າງຈິງໃຈມາ ຍັງພັກ, ລັດຖະບານ ແລະ ປະຊາຊົນ ຫວຽດນາມ ອ້າຍ ນ້ອງ, ໂດຍສະເພາະມາຍັງສະຫາຍ ນາຍົກລັດຖະມົນຕີ ຫງວຽນ ຊັວນ ຟຸກ, ທີ່ໄດ້ສົ່ງຄວາມເຫັນອົກເຫັນໃຈ ແລະ ການຊ່ວຍເຫຼືອເປັນເງິນ, ວັດຖຸສິ່ງຂອງບັນເທົາທຸກ, ທີມກູ້ໄພ, ແພດໝໍ ແລະ ອຸປະກອນຕ່າງໆ ໄປຊ່ວຍເຫຼືອຕໍ່ເຫດການໄພພິ ບັດຢູ່ແຂວງອັດຕະປື ໄດ້ທັນ ການ, ໃນຂະນະທີ່ປະຊາຊົນຫວຽດນາມ ໄດ້ປະສົບໄພທໍາ ມະຊາດອັນຮ້າຍແຮງ, ມີຝົນ ຕົກໜັກຢູ່ຫຼາຍແຂວງພາກເໜືອຂອງຫວຽດນາມເຊັ່ນດຽວກັນ, ສະຫາຍ ທອງລຸນ ສີສຸລິດ ກໍໄດ້ຕາງໜ້າພັກ, ລັດຖະບານ ແລະ ປະຊາຊົນລາວ ສະແດງຄວາມເຫັນອົກເຫັນໃຈມາຍັງ ພັກ, ລັດຖະບານ ແລະ ປະຊາ ຊົນຫວຽດນາມອ້າຍນ້ອງມານະໂອກາດນີ້ດ້ວຍ.