ຮອງນາຍົກ ເນັ້ນໃຫ້ອັດຕະປືເລັ່ງສ້າງທີ່ພັກ ພ້ອມຕິດຕາມການດຳລົງຊີວິດຂອງຜູ້ປະສົບໄພ


...

11.10.2018 9:03     

   ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະ ທານຄະນະກຳມະການສະ ເພາະກິດແກ້ໄຂໄພພິບັດລະ ດັບຊາດ ໄດ້ເນັ້ນໃຫ້ເອົາໃຈ ໃສ່ເລັ່ງກໍ່ສ້າງທີ່ພັກຂອງຜູ້ປະ ສົບໄພນຳ້ຖ້ວມ, ລວມທັງຕິດ ຕາມການດຳລົງຊີວິດຂອງປະ ຊາຊົນຢ່າງໃກ້ຊິດ. ໃນວັນທີ 9 ຕຸລາຜ່ານມາ ທີ່ແຂວງອັດຕະປື ທ່ານ ສອນໄຊ ສີພັນດອນ ໄດ້ໂອ້ລົມຕໍ່ອຳນາດການປົກຄອງແຂວງອັດຕະປື ໂດຍເນັ້ນໜັກເອົາ ໃຈໃສ່ ສືບຕໍ່ກໍ່ສ້າງທີ່ຢູ່ອາໄສຊົ່ວຄາວຂອງປະຊາຊົນໃຫ້ສໍາເລັດໂດຍໄວ ໃນນີ້ໃຫ້ມີການຄຸ້ມຄອງ ແລະ ເສີມກໍາລັງເຂົ້າໃນການປຸກສ້າງພື້ນຖານໂຄງລ່າງຕ່າງໆ ໃຫ້ສໍາເລັດໂດຍໄວ; ເອົາໃຈໃສ່ບຸກເບີກເນື້ອທີ່ການຜະລິດຂອງປະຊາຊົນ; ເກັບກໍາ, ຈັດສັນ ແລະ ເກັບມ້ຽນເຄື່ອງຊ່ວຍເຫຼືອບັນເທົາທຸກໃຫ້ດີ; ໃຫ້ຄະນະຈັດຕັ້ງຮັບຜິດຊອບສູນ ຕິດຕາມສະພາບການດໍາລົງຊີວິດຂອງປະຊາຊົນພາຍໃນສູນ ຢ່າງເປັນປົກກະຕິ ໂດຍສະເພາະ ສະພາບທາງດ້ານແນວຄິດຈິດໃຈຂອງປະຊາຊົນ; ເອົາໃຈໃສ່ວຽກງານຄຸ້ມຄອງສູນພັກເຊົາຊົ່ວຄາວ ເປັນຕົ້ນ ການຮັກສາຄວາມສະອາດ, ການແກ້ໄຂລະບົບລະບາຍນໍ້າເປື້ອນພາຍໃນສູນ ເພື່ອຮັບປະກັນສຸຂະພາບ, ຊີວິດ ແລະ ຫຼີກລ່ຽງບໍ່ໃຫ້ເກີດມີພະຍາດລະບາດ; ເອົາໃຈໃສ່ວຽກງານການສຶກສາ ໂດຍມອບໃຫ້ຂະແໜງການສຶກສາແຂວງ, ເມືອງກໍານົດແຜນການແກ້ໄຂໃຫ້ລະອຽດ ອັນໃດຈະມອບໃຫ້ສູນກາງຊ່ວຍເຫຼືອ ແລະ ອັນໃດຈະແມ່ນທ້ອງຖິ່ນແກ້ໄຂ. ສືບຕໍ່ຕິດຕາມ ແລະ ປະຕິບັດນະໂຍບາຍໃຫ້ປະຊາ ຊົນຢ່າງເປັນປົກກະຕິ ໃນນີ້ ຕ້ອງໄດ້ມີການສຶກສາອົບຮົມ, ອະທິບາຍໃຫ້ປະຊາຊົນ ມີຄວາມເຂົ້າໃຈໃນການໄດ້ຮັບນະໂຍບາຍຈາກລັດ. ພ້ອມດຽວກັນນີ້, ໃຫ້ເອົາໃຈໃສ່ຈັດສັນເຂດຜະລິດ ແລະ ສະໜອງແນວພັນ, ກວດກາ ແລະ ຟື້ນຟູລະບົບຊົນລະປະທານ ເພື່ອຊຸກຍູ້ຊ່ວຍເຫຼືອການຜະລິດຂອງປະຊາຊົນ. ນອກນັ້ນ, ໃຫ້ສືບຕໍ່ຈັດກິດຈະກໍາຢູ່ພາຍໃນສູນໃຫ້ເປັນປົກກະຕິ; ສືບຕໍ່ຮັບເອົາການຊ່ວຍເຫຼືອ, ການບໍລິຈາກ ທັງພາຍໃນ ແລະ ຕ່າງປະເທດ ໂດຍມີການລາຍງານຕໍ່ສູນກາງຢ່າງເປັນປົກກະຕິ, ເອົາໃຈ ໃສ່ກວດກາ ແລະ ຄຸ້ມຄອງສາງເກັບເຄື່ອງຊ່ວຍເຫຼືອໃຫ້ດີ ເພື່ອໃຫ້ມີຄວາມສະອາດ ແລະ ເປັນລະບຽບຮຽບຮ້ອຍ; ຄົ້ນ ຄວ້າ ແລະ ເກັບກໍາຄວາມຕ້ອງການຕົວຈິງຂອງປະຊາຊົນ ໃນໄລຍະຮີບດ່ວນ, ໄລຍະສັ້ນ ແລະ ໄລຍະຍາວ ເພື່ອວາງແຜນການແກ້ໄຂ ແລະ ສະໜອງການຊ່ວຍເຫຼືອ ໃຫ້ຖືກຕ້ອງ ແລະ ທັນການ. ສໍາລັບຜົນຂອງການ ຈັດຕັ້ງປະຕິບັດວຽກງານປະເມີນຜົນເສຍຫາຍ ທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງອັດ ຕະປື ໄດ້ລາຍງານໃຫ້ຊາບຕື່ມ ວ່າ: ປັດຈຸບັນ ໄດ້ສໍາເລັດການສໍາຫຼວດເກັບກໍາຂໍ້ມູນຕາມແບບຟອມການສໍາຫຼວດໃນ 19 ບ້ານ ແລະ ໄດ້ເກັບໄວ້ໃນລະບົບຄອມພິວເຕີ ສໍາເລັດ 91%; ສໍາເລັດການລົງຖ່າຍພາບສະມາຊິກຄອບຄົວຜູ້ທີ່ຖືກຜົນກະທົບໜັກ ໃນ 8 ບ້ານ ມີ 1.127 ຄອບຄົວ, 4.560 ຄົນ; ສຳເລັດການເກັບກໍາ ແລະ ຖ່າຍພາບຂໍ້ມູນຫຼັກຖານຄວາມເສຍຫາຍດ້ານເສດຖະກິດຄົວເຮືອນຂອງປະຊາຊົນ. ພ້ອມດຽວກັນນີ້, ຄະນະຮັບຜິດຊອບ ຍັງໄດ້ມີການຈັດກອງປະຊຸມປຶກສາຫາລື ຮ່ວມກັບບໍລິສັດຜູ້ຮ່ວມທຶນຂອງເຂື່ອນ ເຊປຽນ-ເຊນໍ້ານ້ອຍ ແລະ ພາກສ່ວນທີ່ກ່ຽວຂ້ອງຫຼາຍຄັ້ງ ເພື່ອໃຫ້ມີຄວາມເປັນເອກະພາບ ແລະ ມີຄວາມເຂົ້າໃຈ ໃນການຈັດຕັ້ງປະຕິບັດວຽກງານດັ່ງກ່າວ. (ຂາວ: ກົມປະຊາສຳພັນ)