ຈະສະຫຼອງວັນອາຫານໂລກ ແລະ ສັບປະດາ ແຫ່ງຊາດ ເພື່ອລຶບລ້າງຄວາມທຸກຍາກ


...

11.10.2018 9:04     

   ທ່ານ ລຽນ ທີແກ້ວ ລັດ ຖະມົນຕີກະຊວງກະສິກຳ ແລະ ປ່າໄມ້ ໄດ້ກ່າວເຖິງການສະເຫຼີມສະຫຼອງວັນອາຫານ ໂລກ, ວັນສາກົນ ແລະ ສັບປະ ດາແຫ່ງຊາດ ເພື່ອລຶບລ້າງຄວາມທຸກຍາກປະຈຳປີ 2018 ໃນວັນທີ 10 ຕຸລານີ້, ທີ່ກະຊວງກະສິກຳ ແລະ ປ່າໄມ້ ໃຫ້ຮູ້ວ່າ: ພິທີສະເຫຼີມສະຫຼອງວັນອາຫານໂລກ, ວັນສາກົນ ແລະ ສັບປະດາແຫ່ງຊາດເພື່ອລຶບລ້າງຄວາມທຸກຍາກຈະໄດ້ຈັດຂຶ້ນໃນວັນທີ 16 ຕຸລາ 2018 ທີ່ຈະມາເຖິງນີ້, ທີ່ນະຄອນຫຼວງວຽງຈັນ, ວັນອາຫານໂລກປີນີ້ແມ່ນໄດ້ໝູນວຽນມາບັນຈົບຄົບຮອບ 38 ປີພາຍໃຕ້ຄຳຂວັນ "ການກະທຳຂອງພວກເຮົາຄືອະນາຄົດຂອງພວກເຮົາ ໂລກທີ່ປາສະຈາກຄວາມອຶດຫິວພາຍໃນປີ 2030 ແມ່ນມີຄວາມເປັນໄປໄດ້", ວັນສາກົນເພື່ອລຶບລ້າງຄວາມທຸກຍາກແມ່ນຄົບຮອບ 32 ປີ ແລະ ສັບປະດາແຫ່ງຊາດເພື່ອລຶບລ້າງຄວາມທຸກຍາກ ປີນີ້ຄົບຮອບ 15 ປີພາຍໃຕ້ຄຳ ຂວັນ "ມາຮ່ວມມືກັນຊ່ວຍເຫຼືອ ກຸ່ມຄົນທີ່ດ້ອຍໂອກາດທີ່ສຸດ ເພື່ອພ້ອມກັນສ້າງໂລກທີ່ມີ ການເຄົາລົບກຽດສັກສີ ແລະ ສິດທິມະນຸດຢ່າງທົ່ວເຖິງ". ທ່ານໄດ້ກ່າວຕື່ມອີກວ່າ: ຈາກສະພາບດິນຟ້າອາກາດໃນປີນີ້ມີການປ່ຽນແປງໃຫຍ່ຫຼວງໄດ້ເກີດໄພພິບັດນໍ້າຖ້ວມ, ດິນເຊາະເຈື່ອນສ້າງຄວາມເສຍຫາຍໃຫ້ແກ່ຊີວິດ ແລະ ຊັບສິນ, ເນື້ອທີ່ທຳການຜະລິດຂອງປະຊາຊົນຖືກເສຍຫາຍ ລວມທັງມີການລະບາດຂອງພະຍາດສັດ, ສັດຕູພືດຊຶ່ງປະກົດການດັ່ງກ່າວໄດ້ເປັນການເພີ່ມທະວີໃຫ້ມີຄວາມທຸກຍາກ ແລະ ໄພອຶດຫິວຫຼາຍຂຶ້ນ.ທ່ານລັດຖະມົນຕີ ກະຊວງກະສິກຳ ຍັງຮຽກຮ້ອງມາຍັງທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ ຕະຫຼອດຮອດອົງການຈັດຕັ້ງສາກົນຕ່າງໆຢູ່ ສປປ ລາວ ຈົ່ງພ້ອມກັນເປັນເຈົ້າພາບສະເຫຼີມສະຫຼອງວັນອາຫານໂລກ, ວັນສາກົນ ແລະ ສັບປະດາແຫ່ງຊາດເພື່ອລຶບລ້າງຄວາມທຸກຍາກປີນີ້ໃຫ້ເປັນຂະບວນການຟົດຟື້ນມີຄວາມເປັນລະບຽບຮຽບຮ້ອຍ, ມີເນື້ອໃນດ້ວຍການເຂົ້າຮ່ວມການຜະລິດກະສິກຳ, ປູກຝັງ-ລ້ຽງສັດ ເພື່ອຄໍ້າປະກັນຄວາມໝັ້ນຄົງດ້ານສະບຽງອາຫານ, ເຮັດໃຫ້ກະສິກຳສະອາດຕາມທິດສີຂຽວຍືນຍົງ, ຊຸກຍູ້ການຜະລິດເປັນສິນຄ້າສ້າງລາຍຮັບໃຫ້ແກ່ຄອບຄົວກໍ່ຄືການຮ່ວມກັນເຮັດວຽກເພື່ອຫຼຸດພົ້ນອອກຈາກຄວາມທຸກຍາກ, ທຸກຄົນສາມາດເຂົ້າເຖິງອາຫານທີ່ມີໂພຊະນາການຕະຫຼອດປີ, ຕັ້ງໜ້າເຂົ້າຮ່ວມປະຕິບັດສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະ ນາປະເທດຊາດ. (ຂ່າວ: ສຸກສາຄອນ-ພາບ: ພູວຽງຄຳ)