ປະທານປະເທດ ຕ້ອນຮັບທູດ ສປ ຈີນ ຍື່ນສານຕາຕັ້ງ


...

02.11.2018 11:01     

   ທ່ານ ບຸນຍັງ ວໍລະຈິດ ປະທານປະເທດ ໄດ້ຕ້ອນຮັບ ທ່ານ ຈຽງ ຈາຍຕົງ (Jiag Zaidong) ເຂົ້າຍື່ນສານຕາຕັ້ງ ໃນຕອນເຊົ້າວັນທີ 1 ພະຈິກນີ້ ທີ່ທຳນຽບປະທານປະເທດ ເພື່ອດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາຊົນຈີນ ຄົນໃໝ່ ປະຈຳ ສປປ ລາວ ຊຶ່ງມີສຳນັກງານຕັ້ງຢູ່ນະຄອນຫຼວງວຽງຈັນ. ໃນໂອກາດນີ້ ທ່ານປະທານປະເທດເຮົາໄດ້ກ່າວສະແດງຄວາມຕ້ອນຮັບ ແລະ ຊົມເຊີຍຕໍ່ທ່ານທູດທີ່ໄດ້ຖືກແຕ່ງຕັ້ງໃຫ້ມາດຳລົງຕຳແໜ່ງເປັນເອກອັກຄະລັດຖະທູດຄົນໃໝ່ ປະຈຳລາວ ເພື່ອສືບຕໍ່ເຂົ້າໃນການເສີມຂະຫຍາຍສາຍພົວພັນຮ່ວມມືທີ່ດີລະຫວ່າງລາວ-ຈີນ, ຊຶ່ງແມ່ນເພື່ອນມິດ ແລະ ສະຫາຍອ້າຍນ້ອງທີ່ຮ່ວມອຸດົມການດຽວກັນ, ເປັນ ຄູ່ຮ່ວມຊາຕາກຳທີ່ມີຄວາມໝາຍຍຸດທະສາດ ທັງເປັນຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານຕາມທິດ 4 ດີ (ເພື່ອນບ້ານໃກ້ຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ) ລາວ-ຈີນເປັນປະ ເທດບ້ານໃກ້ເຮືອນຄຽງທີ່ມີພູຜາປ່າໄມ້ ແລະ ແມ່ນຳ້ລຳເຊຕິດຈອດກັນ, ປະຊາຊົນສອງຊາດລາວ-ຈີນມີມູນເຊື້ອໄປມາຫາສູ່ກັນ, ຮ່ວມມືຊ່ວຍ ເຫຼືອຊຶ່ງກັນ ແລະ ກັນມາແຕ່ບູຮານນະການ, ສອງປະເທດໄດ້ສ້າງຕັ້ງສາຍພົວພັນໃນວັນທີ 25 ເມສາ 1961, ດ້ວຍຄວາມພະຍາຍາມຮ່ວມກັນທັງສອງຝ່າຍສາຍພົວພັນທີ່ເປັນມູນເຊື້ອອັນດີງາມດັ່ງກ່າວໄດ້ຮັບການເສີມຂະຫຍາຍໃຫ້ເຕີບໃຫຍ່ຂະຫຍາຍຕົວ ແລະ ນັບມື້ນັບເລິກເຊິ່ງແໜ້ນແຟ້ນຍິ່ງຂຶ້ນ. (ຂ່າວ-ພາບ: ພູວຽງຄຳ)