ປະທານປະເທດ ຕ້ອນຮັບທູດປະເທດເພື່ອນມິດ ເຂົ້າຍື່ນສານຕາຕັ້ງ ແລະ ແຕ່ງຕັ້ງທູດລາວ ໄປປະຈຳຕ່າງປະເທດ


...


...


...


...


...


...


...


...


...


...

07.11.2018 10:18     

   ຕອນເຊົ້າວັນທີ 6 ພະຈິກ 2018 ທີ່ທຳນຽບປະທານປະ ເທດ, ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວ ໄດ້ຕ້ອນຮັບບັນດາທ່ານ ທູດປະເທດເພື່ອນມິດເຂົ້າຍື່ນສານຕາຕັ້ງເພື່ອດຳລົງຕຳແໜ່ງເປັນເອກອັກຄະລັດຖະທູດ ຄົນໃໝ່ ປະຈຳ ສປປ ລາວ ແລະ ມອບສານແຕ່ງຕັ້ງໃຫ້ທູດລາວ ໄປປະຈຳຢູ່ຕ່າງປະເທດຕາມລຳດັບດັ່ງນີ້: ເວລາ 8:00 ໂມງ ທ່ານ ປະທານປະເທດ ໄດ້ຕ້ອນຮັບທ່ານ ໄຄເມະ ແອນເດຣດ ໂຈມາລີ ກາຣິບ (Jaime Andres Chomali Garib) ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ຊີເລ ຄົນໃໝ່ ປະຈຳ ສປປ ລາວ ໂດຍມີສຳນັກງານການທູດຕັ້ງຢູ່ ນະຄອນຫຼວງ ຮ່າໂນ້ຍ, ສສ ຫວຽດນາມ, ກ່ອນມາດໍາລົງຕໍາແໜ່ງເປັນເອກອັກຄະລັດຖະທູດ ປະຈໍາລາວ ທ່ານໄດ້ດໍາລົງຕໍາແໜ່ງເປັນເອກອັກຄະລັດຖະທູດ ຊີເລ ປະຈຳ ສສ ຫວຽດນາມ. ສປປ ລາວ ແລະ ສາທາ ລະນະລັດ ຊີເລ ໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 6 ທັນວາ 1991. ເວລາ 8:30 ທ່ານ ປະທານປະເທດ ໄດ້ຕ້ອນຮັບທ່ານ ຊີເວັດສເຕີ ບູສ (Szilveszter Bus) ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ຮົງກາລີ ຄົນໃໝ່ ປະຈຳ ສປປ ລາວ ໂດຍມີສຳນັກງານການທູດຕັ້ງຢູ່ ບາງກອກ ປະເທດໄທ. ກ່ອນມາດໍາລົງຕໍາແໜ່ງເປັນເອກອັກຄະລັດຖະທູດປະຈໍາລາວ ທ່ານໄດ້ດໍາລົງຕໍາແໜ່ງເປັນຮອງລັດຖະມົນຕີກະຊວງການຕ່າງປະເທດ ແລະ ການຄ້າ ຮົງກາລີ. ສປປ ລາວ ແລະ ຮົງກາລີ ໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 12 ກັນຍາ 1962. ເວລາ 9:00 ທ່ານປະທານປະເທດ ໄດ້ຕ້ອນຮັບ ທ່ານ ອິວານິສ ຣັບຕາກິສ (Ivannis E. Raptakis) ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງສາທາລະນະລັດ ເກຣັກ ຄົນໃໝ່ ປະຈຳ ສປປ ລາວ ໂດຍມີສຳນັກງານການທູດຕັ້ງຢູ່ນະຄອນຫຼວງ ຮ່າໂນ້ຍ ສສ ຫວຽດນາມ. ກ່ອນມາດໍາລົງຕໍາແໜ່ງເປັນເອກອັກຄະລັດຖະທູດປະຈໍາລາວ ທ່ານໄດ້ດໍາລົງຕໍາແໜ່ງເປັນຫົວໜ້າກົມ ການຕ່າງປະເທດ ແລະ ນະໂຍ ບາຍຄວາມໝັ້ນຄົງ ແລະ ການຮ່ວມມືດ້ານການເມືອງຂອງ ສະຫະພາບເອີຣົບ. ສປປ ລາວ ແລະ ເກຣັກ ໄດ້ສ້າງຕັ້ງສາຍພົວພັນການທູດນໍາກັນໃນວັນທີ 15 ມິຖຸນາ 1989. ເວລາ 9:30 ທ່ານ ປະທານປະເທດ ໄດ້ຕ້ອນຮັບທ່ານ ນາງ ຊາມິນາ ນາດສ (Samina Naz) ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາຊົນ ບັງກາລາເທດ ຄົນໃໝ່ ປະຈຳ ສປປ ລາວ ໂດຍມີສຳນັກງານການທູດຕັ້ງຢູ່ນະຄອນຫຼວງ ຮ່າໂນ້ຍ ສສ ຫວຽດນາມ. ກ່ອນມາ ດໍາລົງຕໍາແໜ່ງເປັນເອກອັກຄະລັດຖະທູດປະຈໍາລາວ ທ່ານເຄີຍດໍາລົງຕໍາແໜ່ງເປັນ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາຊົນ ບັງກາລາເທດ ປະຈຳ ສສ. ຫວຽດນາມ. ສປປ ລາວ ແລະ ບັງກາລາເທດ ໄດ້ສ້າງຕັ້ງສາຍພົວພັນການທູດນໍາກັນ ໃນປີ 1988. ເວລາ 10:00 ທ່ານປະ ທານປະເທດ ໄດ້ຕ້ອນຮັບທ່ານ ອີມາ ມູສຕາຟາ (Imad Moustapha) ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ອາຣັບ ຊີຣີ ຄົນໃໝ່ ປະຈຳ ສປປ ລາວ ໂດຍມີສຳນັກງານການທູດຕັ້ງຢູ່ ນະຄອນຫຼວງ ປັກກິ່ງ ສປ ຈີນ. ກ່ອນມາດໍາລົງຕໍາແໜ່ງເປັນເອກອັກຄະລັດຖະທູດປະຈໍາລາວ ທ່ານໄດ້ດໍາລົງຕໍາແໜ່ງເປັນເອກອັກຄະລັດຖະທູດ ອາຣັບ ຊີຣີ ປະຈຳ ສປ ຈີນ. ສປປ ລາວ ແລະ ສາທາ ລະນະລັດ ອາຣັບຊີຣີ ໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 22 ທັນວາ 2004. ເວລາ 10:30 ທ່ານປະທານປະເທດ ໄດ້ຕ້ອນຮັບທ່ານ ຣາມາດານີ ກິດວານາ ດາວ (Ramadhani Kitwana Dau) ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ຕັງ ຊາເນ ຄົນໃຫມ່ ປະຈຳ ສປປ ລາວ ໂດຍມີສຳນັກງານການທູດຕັ້ງຢູ່ ນະຄອນຫຼວງ ກົວລາລໍາເປີ ປະເທດມາເລເຊຍ. ກ່ອນມາດໍາລົງຕໍາແໜ່ງເປັນເອກອັກຄະລັດຖະທູດປະຈໍາລາວ ທ່ານໄດ້ດໍາລົງຕໍາແໜ່ງເປັນປະທານໜ່ວຍງານພິເສດແນວທາງຍຸດທະສາດໃນການລົງທຶນ ແລະ ການປະຕິບັດໃນແຜນພັດທະນາ 5 ປີ ສົກປີ 2011-2012 ແລະ 2015-2016. ສປປ ລາວ ແລະ ຕັງຊາເນ ໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 15 ພຶດສະພາ 1978. ໃນໂອກາດດັ່ງກ່າວ, ທ່ານ ບຸນຍັງ ວໍລະຈິດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ບັນດາທູດປະເທດເພື່ອນມິດທີ່ໄດ້ຖືກແຕ່ງຕັ້ງມາດຳລົງຕຳແໜ່ງເປັນເອກອັກຄະລັດຖະທູດປະຈຳ ລາວ ຊຶ່ງຈະເປັນການປະກອບສ່ວນອັນສຳຄັນເຂົ້າໃນການເສີມສ້າງສາຍພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ບັນດາປະເທດເພື່ອນມິດໃຫ້ແໜ້ນແຟ້ນຍິ່ງຂຶ້ນ. ໃນວັນດຽວກັນ, ທ່ານ ປະທານປະເທດເຮົາຍັງໄດ້ມອບສານແຕ່ງຕັ້ງໃຫ້ເອກອັກຄະລັດຖະທູດ ແຫ່ງ ສປປ ລາວ 4 ທ່ານ ໄປປະຈຳຢູ່ຕ່າງປະເທດຕາມລຳດັບດັ່ງນີ້: ເວລາ 11.00 ໂມງ ໄດ້ມອບສານແຕ່ງຕັ້ງໃຫ້ທ່ານ ສີທົງ ຈິດໂຍທິນ ເພື່ອດຳລົງຕຳແໜ່ງເປັນເອກອັກຄະລັດຖະທູດ ແຫ່ງ ສປປ ລາວ ປະຈຳປະເທດໂອຕຣິດ. ກ່ອນໜ້ານີ້ ທ່ານໄດ້ດຳລົງຕຳແໜ່ງເປັນເອກອັກຄະລັດຖະທູດລາວ ປະຈຳປະເທດ ເຢຍລະມັນ. ຕໍ່ມາໄດ້ມອບສານແຕ່ງ ຕັ້ງໃຫ້ ທ່ານ ພົງສະຫວັນ ສີສຸ ລາດ ເພື່ອດໍາລົງຕໍາແໜ່ງເປັນເອກອັກຄະລັດຖະທູດ ແຫ່ງ ສປປ ລາວ ປະຈຳ ຣາຊະອານາ ຈັກ ອັງກິດ. ກ່ອນໜ້ານີ້ ທ່ານໄດ້ຮັບຕຳແໜ່ງເປັນຫົວໜ້າກົມອາຊຽນ ກະຊວງການຕ່າງປະເທດ. ຕໍ່ມາໄດ້ມອບສານແຕ່ງ ຕັ້ງໃຫ້ ທ່ານ ສົງການ ຫຼວງມຸນິນທອນ ເພື່ອດຳລົງຕຳແໜ່ງເປັນເອກອັກຄະລັດຖະທູດ ແຫ່ງ ສປປ ລາວ ປະຈຳ ຟີລິບປິນ. ກ່ອນໜ້ານີ້ ທ່ານໄດ້ຮັບຕຳແໜ່ງເປັນຫົວໜ້າກົມເສດຖະກິດ ກະຊວງການຕ່າງປະເທດ ແລະ ຕໍ່ມາໄດ້ມອບສານແຕ່ງຕັ້ງໃຫ້ ທ່ານ ບຸນແນມ ຈວງຫອມ ໄດ້ຮັບການແຕ່ງຕັ້ງດຳລົງຕຳແໜ່ງເປັນເອກອັກະລັດຖະທູດ ແຫ່ງ ສປປ ລາວ ປະຈຳ ສາທາລະນະລັດ ອິນເດຍ. ກ່ອນໜ້ານີ້ ທ່ານໄດ້ຮັບຕຳແໜ່ງເປັນຮອງຫົວໜ້າກົມການຂ່າວ ກະຊວງການຕ່າງປະເທດ. ໂອກາດນີ້, ທ່ານປະທານປະເທດ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ບັນດາທ່ານທູດທີ່ຈະໄປປະຕິບັດໜ້າທີ່ການທູດ ປະຈຳຢູ່ປະເທດຕ່າງໆ ຈົ່ງປະຕິບັດໜ້າທີ່ຢ່າງຕັ້ງໜ້າ ເພື່ອປະກອບສ່ວນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນການທູດ ກໍຄືການຮ່ວມມືດ້ານອື່ນໆລະຫວ່າງສອງປະ ເທດໃຫ້ເກີດດອກອອກຜົນ ແລະ ຂະຫຍາຍຕົວຍິ່ງໆຂຶ້ນ. (ຂ່າວ-ພາບ: ພູວຽງຄຳ ພົນອາສາ)