ນາຍົກ ເຂົ້າຮ່ວມງານວາງສະແດງສິນຄ້າ ນຳເຂົ້າສາກົນຈີນ ຄັ້ງທີ 1


...

07.11.2018 10:18     

   ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ນຳພາຄະນະຜູ້ແທນຂັ້ນສູງ ແຫ່ງ ສປປ ລາວ ເຂົ້າຮ່ວມພິທີເປີດງານວາງສະແດງສິນຄ້ານຳເຂົ້າສາກົນຈີນ ຄັ້ງທີ 1 (China International Import - Expo) ຊຶ່ງໄດ້ຈັດຂຶ້ນໃນວັນທີ 5 ພະຈິກນີ້ ທີ່ນະຄອນຊຽງໄຮ້ ສປ ຈີນ ພາຍໃຕ້ການເປັນປະທານຂອງທ່ານ ສີ ຈິ້ນຜິງ ປະທານປະເທດ ແຫ່ງ ສປ ຈີນ ຮ່ວມກັບ 12 ປະເທດທີ່ຖືກເຊີນມາຮ່ວມງານດັ່ງກ່າວ ໃນຖານະປະເທດປະທານຮ່ວມ. ເຂົ້າຮ່ວມງານວາງສະແດງຄັ້ງນີ້ມີຄະນະຜູ້ແທນທາງພາກລັດ ແລະ ເອກະຊົນເຂົ້າຮ່ວມຈາກ 130 ກ່ວາປະເທດ ໃນນີ້ມີລະດັບປະມຸກລັດ ແລະ ລັດຖະບານ 18 ປະເທດ ລວມທັງ ສປປ ລາວ. ງານວາງສະແດງສິນຄ້ານຳເຂົ້າສາກົນຈີນຄັ້ງນີ້ ໄດ້ຈັດຂຶ້ນເປັນຄັ້ງທຳອິດ ພາຍໃຕ້ຫົວຂໍ້ "ຍຸກສະໄໝໃໝ່, ຊົມໃຊ້ອະນາຄົດຮ່ວມກັນ" ໂດຍມີຈຸດປະສົ່ງ ແລະ ເປົ້າໝາຍສຳຄັນແມ່ນເປັນການວາງສະແດງສິນຄ້າລະດັບສາກົນຈາກບັນ ດາປະເທດທີ່ເປັນຄູ່ຄ້າກັບ ສປ ຈີນ ໂດຍສະເພາະປະເທດກຳລັງ ພັດທະນາ ຊຶ່ງສະແດງໃຫ້ເຫັນ ເຖິງຄວາມຕັ້ງໃຈຂອງ ສປ ຈີນ ໃນການສືບຕໍ່ເປີດປະຕູສູ່ໂລກ ພາຍນອກ ທັງເປັນການເອື້ອອຳນວຍໂອກາດອັນດີໃຫ້ຫຼາຍປະເທດຈາກທົ່ວມູມໂລກ ໃນພາກພື້ນ ແລະ ຂົງເຂດໄດ້ມາເຜີຍແຜ່ໂຄສະນາສິນຄ້າ, ພົບປະແລກປ່ຽນຮ່ວມມືດ້ານການຄ້າ ແລະ ການລົງທຶນ ແນໃສ່ຮັກສາລະບຽບການຄ້າສາກົນໃນການເປີດກ້ວາງການຮ່ວມມື ແລະ ເຊື່ອມໂຍງເສດຖະກິດຂອງຕົນກັບສາກົນ ແລະ ສົ່ງເສີມກົນໄກການຄ້າຫຼາຍຝ່າຍ ເພື່ອແນໃສ່ສ້າງເສດຖະກິດໂລກໃຫ້ ສືບຕໍ່ພັດທະນາໄປຕາມທິດ ທາງທີ່ເປີດກ້ວາງ ແລະ ຕ່າງຝ່າຍຕ່າງມີຜົນປະໂຫຍດຫຼາຍຂຶ້ນກວ່າເກົ່າ. ນອກຈາກງານວາງສະ ແດງສິນຄ້າແລ້ວ ຍັງມີກອງປະ ຊຸມສຳມະນາ ໃນຫົວຂໍ້ຍ່ອຍປິ່ນອ້ອມ ຊຶ່ງເປັນກອງປະຊຸມປຶກສາຫາລື ແລະ ແລກປ່ຽນນະໂຍບາຍດ້ານການຄ້າ-ການລົງທຶນຂອງບັນດາປະເທດທີ່ມາຮ່ວມງານ ໂດຍແບ່ງອອກເປັນ 3 ກອງປະຊຸມຄື: 1. ກອງປະຊຸມກ່ຽວກັບການຄ້າ ແລະ ການເປີດປະຕູ (Trade and Opening); 2. ກອງປະຊູມກ່ຽວກັບການຄ້າ ແລະ ນະວັດຕະກຳໃໝ່ (Trade and Innovation); 3. ກອງປະຊູມກ່ຽວກັບການຄ້າ ແລະ ການລົງທຶນ (Trade and Investment). ໃນໂອກາດເປີດງານວາງ ສະແດງສິນຄ້າສາກົນຈີນ ໃນຄັ້ງນີ້ ສປປ ລາວ ກໍໄດ້ສ້າງຫ້ອງວາງສະແດງແຫ່ງຊາດ National Pavilion ທີ່ມີລັກສະນະຂອງລາວ ໂດຍເອົາຮູບແບບຂອງວັດຊຽງທອງທີ່ເປັນວັດຄູ່ບ້ານຄູ່ເມືອງຂອງນະຄອນຫຼວງພະບາງ ແລະ ເປັນທີ່ຮູ້ຈັກກັນ ດີໃນຖານະເປັນເມືອງມໍລະດົກ ໂລກທີ່ຕິດພັນກັບແຫຼ່ງທ່ອງ ທ່ຽວອັນດັບຕົ້ນໆຂອງສາກົນ, ໃນຫ້ອງວາງສະແດງໄດ້ມີການ ວາງສະແດງເຜີຍແຜ່ຂໍ້ມູນຂ່າວ ສານກ່ຽວກັບນະໂຍບາຍສົ່ງ ເສີມການຄ້າ ແລະ ການລົງທຶນ ພາຍໃນ ແລະ ຕ່າງປະເທດ. ນອກຈາກນັ້ນ, ກະຊວງກ່ຽວ ຂ້ອງຍັງໄດ້ລະດົມຫົວໜ່ວຍທຸ ລະກິດລະດັບແນວຫນ້າຂອງ ປະເທດ 10 ບໍລິສັດເຂົ້າຮ່ວມວາງສະແດງສິນຄ້າຂອງຕົນ ຊຶ່ງສິນຄ້າທີ່ບັນດາບໍລິສັດໄດ້ນຳມາວາງສະແດງລ້ວນແຕ່ເປັນສິນຄ້າທີ່ມີຄຸນນະພາບ ແລະ ໄດ້ມາດຕະຖານສາກົນ ເປັນຕົ້ນແມ່ນເຄື່ອງດື່ມ, ເຄື່ອງຫັດຖະກຳ, ຜະລິດຕະພັນກະ ສິກຳປຸງແຕ່ງ, ກະສິກຳສະອາດ ແລະ ອື່ນໆ. (ຂ່າວ-ພາບ: ກະຊວງການຕ່າງປະເທດ)