ຮອງນາຍົກ ເຄື່ອນໄຫວຊຸກຍູ້ການກະກຽມສະເຫຼີມສະຫຼອງວັນສ້າງຕັ້ງເມືອງວຽງໄຊ


...

09.11.2018 17:21     

   ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ໄປເຄື່ອນໄຫວຊຸກຍູ້, ຕິດຕາມ-ກວດກາ ຄວາມຄືບໜ້າ ໃນການກະກຽມວຽກງານດ້ານຕ່າງໆ ເພື່ອສະເຫຼີມສະຫຼອງວັນສ້າງຕັ້ງເມືອງວຽງໄຊ ແຂວງຫົວພັນ ຄົບຮອບ 50 ປີ ໃນທ້າຍເດືອນພະຈິກທີ່ຈະເຖິງນີ້ໂດຍມີທ່ານ ວັນໄຊ ແພງຊຸມມາ ເຈົ້າແຂວງຫົວພັນ ພ້ອມດ້ວຍຄະນະນຳຂອງແຂວງ ແລະ ເມືອງວຽງໄຊ ໃຫ້ການຕ້ອນຮັບຢ່າງອົບອຸ່ນໃນວັນທີ 6 ພະຈິກ ຜ່ານມາ. ກ່ອນອື່ນທ່ານຮອງນາຍົກໄດ້ໄປຢ້ຽມຢາມສູນເສຍອົງຄະ 11 (ນາແທ່ນ), ເມືອງວຽງໄຊໂດຍໄດ້ຮັບຟັງການລາຍງານ ກ່ຽວກັບການຈັດຕັ້ງ ແລະ ການ ເຄື່ອນໄຫວວຽກງານ ຂອງສູນດັ່ງກ່າວ ຈາກທ່ານ ພັນສີ ພິມພາວົງ ຫົວໜ້າສູນເສຍອົງຄະ 11 ຊຶ່ງເຫັນວ່າ: ສູນເສຍອົງຄະແຫ່ງນີ້ ມີ 78 ຄອບຄົວ, ພົນລະເມືອງ 247 ຄົນ, ຍິງ 126 ຄົນ. ໃນນັ້ນ ມີພະນັກງານເສຍອົງຄະ ຈຳນວນ 22 ທ່ານ, ເສຍອົງຄະພິເສດ 1 ທ່ານ, ພະນັກງານບຳນານ 6 ທ່ານ, ຍິງ 4 ທ່ານ, ພະນັກງານຮັບໃຊ້ 3 ທ່ານ, ຍິງ 2 ທ່ານ; ມີພາຫະນະຮັບໃຊ້ ລົດໃຫຍ່ 3 ຄັນ, ຫ້ອງການສູນ 1 ຫຼັງ, ສະໂມສອນ 1 ຫຼັງ, ໂຮງຮຽນ 4 ຫຼັງ; ມີເຮືອນຕອບບຸນແທນຄຸນໃຫ້ແກ່ພະນັກງານ, ນັກຮົບປະຕິວັດຈຳນວນ 27 ຫຼັງແລະ ເຮືອນອົງຄະພິເສດ 4 ຫຼັງ. ໃນໂອກາດດຽວກັນ, ທ່ານຮອງນາຍົກລັດຖະມົນຕີ ໄດ້ໃຫ້ກຽດໂອ້ລົມ ຕໍ່ພະນັກງານ ທີ່ປະຈຳຢູ່ສູນດັ່ງກ່າວ ໂດຍໄດ້ກ່າວຍ້ອງຍໍຊົມເຊີຍ ແລະ ສະແດງຄວາມຮູ້ບຸນຄຸນ ຕໍ່ຜົນງານການຕໍ່ສູ້ກູ້ຊາດ ກໍ່ຄື ການປະກອບສ່ວນ ປະຕິບັດພາລະກິດ ສ້າງສາພັດທະນາປະເທດຊາດ ໃນປັດຈຸບັນ. ພ້ອມທັງ ຍົກໃຫ້ເຫັນ ຜົນສຳເລັດ ແລະ ສິ່ງທ້າທາຍ ໃນການປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ໃນໄລຍະຜ່ານມາ ກໍ່ຄື ປັດຈຸບັນ ແລະ ອະນາຄົດ. ໃນໂອກາດນີ້, ທ່ານຮອງນາຍົກລັດຖະມົນຕີ ຍັງໄດ້ມອບລົດໃຫຍ່ ຈຳນວນ 1 ຄັນ ແລະ ເງິນສົດ ຈຳນວນ 20 ລ້ານກີບ ໃຫ້ສູນແຫ່ງນີ້ ເພື່ອປະກອບສ່ວນເຂົ້າໃນການປັບປຸງຊີວິດການເປັນຢູ່ ຂອງເຂົາເຈົ້າ ໃຫ້ນັບມື້ດີຂຶ້ນເປັນກ້າວໆ. ຫຼັງຈາກນັ້ນ, ຄະນະຂອງທ່ານຮອງນາຍົກລັດຖະມົນຕີ ກໍ່ໄດ້ໄປກວດກາເບິ່ງການກໍ່ສ້າງພື້ນຖານໂຄງລ່າງ ເພື່ອກະກຽມໃຫ້ແກ່ການສະເຫຼີມສະຫຼອງເມືອງວຽງໄຊຄົບຮອບ 50 ປີເປັນຕົ້ນ ສະໜາມຫຼວງ, ສະໂມສອນເມືອງ, ໜອງນໍ້າຜາຫ້າ, ເດີ່ນບິນ ແລະ ອື່ນໆໂດຍໄດ້ຮັບຟັງການລາຍງານສະພາບໂດຍຫຍໍ້ ຈາກທ່ານ ພູໂຊນ ທໍາມະວີໄຊ ຮອງເຈົ້າແຂວງໆຫົວພັນ ເຫັນວ່າ ມາຮອດປັດຈຸບັນການກະກຽມຄວາມພ້ອມໃນດ້ານຕ່າງໆ ໂດຍສະເພາະ ຈໍານວນ 9 ໂຄງການ ເປັນຕົ້ນໂຄງການກໍ່ສ້າງທາງປູຢາງ 2 ຊັ້ນແຕ່ 5 ແຍກບ້ານບັກ ຫາໂຮງຮຽນການເມືອງ-ການປົກຄອງ ແລະ ເຖິງ 3 ແຍກທາງເລກ 6,ໂຄງການກໍ່ສ້າງສວນສາທາລະນະ, ໂຄງການກໍ່ສ້າງສ້ອມແປງຫໍວັດທະນະທໍາ, ໂຄງການພັດທະນາໜອງນ້ຳຜາທ້າວ ແລະ ທາງປູແຮ່, ໂຄງການກໍ່ສ້າງທາງປູຢາງອ້ອມສະໜາມຫຼວງ, ໂຄງການສ້ອມແປງທາງປູຢາງເທດສະບານເມືອງວຽງໄຊ ແມ່ນສຳເລັດ 100%,ສຳລັບໂຄງການກໍ່ສ້າງສະໜາມຫຼວງ ສຳເລັດ 91%,ໂຄງການກໍ່ສ້າງປ້ອງກັນຕາຝັ່ງເຈື່ອນ ແລະ ຮ່ອງລະບາຍນ້ຳ ສຳເລັດ 98%, ໂຄງການກໍ່ສ້າງສ້ອມແປງສະໂມສອນເມືອງວຽງໄຊ ສຳເລັດ 99% ໂຄງການກໍ່ສ້າງວົງວຽນ 5 ແຍກ ສໍາເລັດ 93%, ໂຄງການກໍ່ສ້າງໂຕໜັງສືໃຫຍ່ ໃສ່ຜາຫີນ ສຳເລັດ 83%, ສັງລວມແລ້ວ, ມາຮອດປັດຈຸບັນທຸກໜ້າວຽກແມ່ນມີຄວາມຄືບໜ້າດີ ແລະ ຄາດວ່າໜ້າວຽກ ທັງໝົດ ຈະໃຫ້ສໍາເລັດກ່ອນວັນທີ 16 ພະຈິກ 2018. ໃນການລົງຢຽ້ມຢາມ ແລະ ກວດກາບັນດາໂຄງການດັ່ງກ່າວ ທ່ານຮອງນາຍົກ ໄດ້ສະແດງຄວາມຊົມເຊີຍຕໍ່ທຸກພາກສ່ວນທີ່ໄດ້ເອົາໃຈໃສ່ຈັດຕັ້ງປະຕິບັດວຽກງານມີຜົນສໍາເລັດເປັນຢ່າງດີ. ພ້ອມທັງໄດ້ຊີ້ນໍາໃຫ້ແກ່ຄະນະຮັບຜິດຊອບຈົ່ງເອົາໃຈໃສ່ເຂົ້າໃນການຈັດຕັ້ງປະຕິບັດວຽກງານ ໃນຄວາມຮັບຜິດຊອບຂອງຕົນ ໃຫ້ມີຜົນສຳເລັດຕາມຄາດໝາຍທີ່ວາງໄວ້ ໂດຍສະເພາະແມ່ນບັນດາໜ້າວຽກ ທີ່ຍັງບໍ່ທັນສໍາເລັດ. ນອກຈາກນັ້ນ ກໍ່ໃຫ້ເອົາໃຈໃສ່ຮັກສາຄວາມສະຫງົບ ແລະ ເປັນລະບຽບໃນສັງຄົມ ໃຫ້ມີຄວາມຮັບປະກັນ 100%. ສ່ວນດ້ານງົບປະມານ ທີ່ຍັງຄົງຄ້າງ ແມ່ນໃຫ້ພາກສ່ວນທີ່ກ່ຽວຂ້ອງຂອງແຂວງ ປະກອບເອກະສານ ແລ້ວນໍາສະເໜີຂັ້ນເທິງ ຕາມຂັ້ນຕອນ ແລະ ລະບຽບການ. ອັນສຳຄັນ ແມ່ນໃຫ້ແຕ່ລະອະນຸກໍາມະການ ປະສານສົມທົບກັບພາກສ່ວນທີ່ກ່ຽວຂ້ອງ ເພື່ອເຮັດໃຫ້ມີຄວາມເປັນເອກະພາບ ແລະ ຮັບປະກັນ ການສະເຫຼີມສະຫຼອງວັນສ້າງຕັ້ງເມືອງວຽງໄຊ ໃນຄັ້ງນີ້ ໃຫ້ໄດ້ຮັບຜົນສຳເລັດຢ່າງສະຫງ່າງາມ.