ກອງປະຊຸມຄັ້ງທີ 2 ຄະນະຊີ້ນຳລະດັບຊາດການສຳຫຼວດສະຖິຕິກະສິກຳທົ່ວປະເທດ


...

09.11.2018 17:21     

   ກອງປະຊຸມຄະນະຊີ້ນໍາລະດັບຊາດ ຄັ້ງທີ 2 ຂອງການສໍາຫຼວດສະຖິຕິກະສິກໍາທົ່ວປະເທດ ຄັ້ງທີ 3 ປີ 2019 ໄດ້ຈັດຂຶ້ນ ໃນວັນທີ 6 ພະຈິກຜ່ານມາ ທີ່ຫ້ອງວ່າການສໍານັກງານນາ ຍົກລັດຖະມົນຕີ, ພາຍໃຕ້ການເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ຫົວໜ້າຄະນະຊີ້ນໍາລະດັບຊາດການສໍາຫຼວດສະຖິຕິກະສິກໍາທົ່ວປະເທດ ຄັ້ງທີ 3 ປີ 2019, ມີທ່ານ ສະໄໝຈັນ ບຸບຜາ ຫົວ ໜ້າສູນສະຖິຕິແຫ່ງຊາດ, ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ. ຈຸດປະສົງຂອງກອງປະ ຊຸມ ເພື່ອຮັບຟັງຄວາມຄືບໜ້າຂອງການກະກຽມການສໍາຫຼວດ, ພິຈາລະນາແກ້ໄຂບັນຫາ ແລະ ຂໍ້ຄົງຄ້າງ ເພື່ອໃຫ້ການສໍາຫຼວດສະຖິຕິກະສິກໍາທົ່ວປະເທດ ຄັ້ງທີ 3 ຖືກຈັດຕັ້ງປະຕິບັດ ຢ່າງມີປະສິດທິພາບແລະ ປະສິດທິຜົນຕາມແຜນທີ່ວາງໄວ້ ເປັນຕົ້ນແມ່ນພິຈາ ລະນາ ເລື່ອນໄລຍະການລົງສໍາຫຼວດພາກສະໜາມ ຈາກເດືອນ 3/2019 ມາເປັນເດືອນ10-11/2019 ສາເຫດຍ້ອນ ສປປ ລາວ ປະສົບກັບໄພພິບັດທາງທໍາມະຊາດ ໂດຍສະເພາະໃນຂະແໜງການຜະລິດກະສິກໍາມີຜົນກະທົບຢ່າງຫຼວງຫຼາຍ; ການສໍາຫຼວດຈະໄດ້ພິຈາລະນາ ດ້ານເນື້ອໃນ ໂດຍສະເພາະການສໍາຫຼວດເນື້ອທີ່ກະສິກໍາ ໂດຍນໍາໃຊ້ ພາບຖ່າຍດາວທຽມ. ນອກຈາກນັ້ນ ຍັງໄດ້ຄົ້ນຄວ້າພິຈາລະນາຮັບຮອງ ເອົາແຜນດໍາເນີນການສໍາຫຼວດ ເພື່ອໃຫ້ການສໍາຫຼວດ ໄດ້ຖືກຈັດຕັ້ງປະຕິບັດຕາມແຜນການ. ປະທານກອງປະຊຸມ ຍັງໄດ້ເນັ້ນ ຕື່ມວ່າ: ຕໍ່ກັບສະພາບການ ຂອງປະເທດປັດຈຸບັນ ທີ່ໄດ້ປະສົບໄພພິບັດທໍາມະຊາດ ທົ່ວພັກ-ລັດ ໄດ້ເອົາໃຈໃສ່ ຟື້ນຟູເສດຖະກິດ-ສັງຄົມ ເພື່ອເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນ ສະນັ້ນ ໃນນາມຄະນະຊີ້ນໍາລະດັບຊາດ ຈະເອົາໃຈໃສ່ ຮັບປະກັນໃຫ້ການສໍາຫຼວດຄັ້ງນີ້ ດໍາເນີນໄປຢ່າງມີຜົນສໍາເລັດ ແລະ ຕອບສະໜອງໃຫ້ໄດ້ຕໍ່ຄໍາຊັກຖາມຂອງລັດຖະບານ ກ່ຽວກັບການປະກອບສ່ວນຂອງຂະແໜງກະສິກໍາ, ດ້ານການຄໍ້າປະກັນສະບຽງອາຫານ, ການຟື້ນຟູຈາກສະພາບໄພພິບັດ, ເວົ້າລວມ ແມ່ນເພື່ອຮັບໃຊ້ການພັດທະນາເສດຖະກິດ-ສັງຄົມ ກໍຄື ການພັດທະນາຊົນນະບົດ ແລະ ລຶບລ້າງຄວາມທຸກຍາກ ແລະ ການປະເມີນການຈັດຕັ້ງປະຕິບັດເປົ້າໝາຍແບບຍືນຍົງ. (ຂ່າວ: ແສງຈັນ)