ນາຍົກລັດຖະມົນຕີ ຕ້ອນຮັບຄະນະຜູ້ແທນ ສ.ຕວກກີ


...

09.11.2018 14:35     

   ໃນວັນທີ 8 ພະຈິກ 2018, ທີ່ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ເມຣຸດ ຄາວູໂຊລູ (Mevlut Cavusoglu), ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ຕວກກີ ໃນໂອກາດທີ່ທ່ານລັດຖະມົນຕີ ແລະ ຄະນະເດີນທາງມາຢ້ຽມຢາມ ສປປ ລາວ ຢ່າງເປັນທາງການ, ໃນລະຫວ່າງວັນທີ 7-8 ພະຈິກ 2018. ໃນໂອກາດນີ້, ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ຕໍ່ການເດີນທາງມາຢ້ຽມຢາມ ສປປ ລາວ ຢ່າງເປັນທາງການ ຂອງຄະນະຜູ້ແທນ ສ.ຕວກກີ ໃນຄັ້ງນີ້, ໃນໂອກາດດັ່ງກ່າວ ທ່ານນາຍົກລັດຖະມົນຕີ ໄດ້ຕີລາຄາສູງຕໍ່ການພົວພັນຮ່ວມມື ລະຫວ່າງ ສປປ ລາວ ແລະ ສ.ຕວກກີ ທີ່ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 26 ມິຖຸນາ 1958, ສອງປະເທດ ກໍໄດ້ມີການພົວພັນທີ່ດີນໍາກັນຕະຫຼອດມາ ຊຶ່ງເຫັນໄດ້ຈາກການແລກປ່ຽນການສະ ໜັບສະໜູນຊຶ່ງກັນ ແລະ ກັນ ໃນເວທີສາກົນ, ການແລກປ່ຽນການຢ້ຽມຢາມລະຫວ່າງຄະນະຜູ້ແທນຂອງສອງປະເທດ ແລະ ຍັງໄດ້ສະແດງຄວາມຊົມເຊີຍວັນສ້າງຕັ້ງສາຍພົວພັນການທູດ ລາວ-ຕວກກີ ຊຶ່ງໃນປີ 2018 ນີ້ ຄົບຮອບ 60 ປີ ເປັນໂອກາດດີທີ່ ຕວກກີ ໄດ້ເປີດສະຖານທູດຂອງຕົນ ປະຈຳ ສປປ ລາວ ໃນວັນທີ 7 ພະຈິກຜ່ານມາ ເພື່ອເປັນນິມິດໝາຍອັນສໍາຄັນໃນການຊຸກຍູ້ການພົວພັນຮ່ວມມືສອງປະເທດ ໃຫ້ກ້າວຂຶ້ນສູ່ລະດັບໃໝ່. ໃນໂອກາດດັ່ງກ່າວນີ້, ທ່ານນາຍົກລັດຖະມົນຕີ ກໍໄດ້ສະແດງຄວາມຂອບໃຈ ຕໍ່ລັດຖະບານຕວກກີ ທີ່ໄດ້ໃຫ້ການຊ່ວຍເຫຼືອ ແລະ ສະໜັບສະໜູນແກ່ ສປປ ລາວ ໃນໄລຍະຜ່ານມາ ແລະ ຊີ້ແຈງໃຫ້ເຫັນວ່າ ສປປ ລາວ ມີຄວາມຕ້ອງການຄວາມຊ່ວຍເຫຼືອ ຈາກລັດຖະບານປະເທດເພື່ອນມິດຕ່າງໆ ເພື່ອນຳເອົາປະເທດຊາດອອກຈາກສະຖານະພາບປະເທດດ້ອຍພັດທະນາໃນປີ 2024. ນອກຈາກນັ້ນ, ທ່ານນາຍົກລັດຖະມົນຕີ ຍັງສະເໜີໃຫ້ພາກສ່ວນກ່ຽວຂ້ອງຂອງທັງສອງຝ່າຍຊຸກຍູ້ສົ່ງ ເສີມການພົວພັນ ແລະ ການຮ່ວມມືສອງຝ່າຍ ແລະ ຫຼາຍຝ່າຍ ໃນຂະແໜງການຕ່າງໆ ລະຫວ່າງສອງປະເທດໃນຕໍ່ ໜ້າໃຫ້ນັບມື້ນັບເພີ່ມຂຶ້ນ ແລະ ສະເໜີໃຫ້ທ່ານລັດຖະມົນຕີ ຊ່ວຍໂຄສະນາຊຸກຍູ້ ແລະ ຂົນ ຂວາຍນັກລົງທຶນ, ນັກທຸລະກິດ ມາລົງທຶນ ຢູ່ ສປປ ລາວ ຕາມທ່າແຮງ ແລະ ຄວາມອາດສາມາດ, ພ້ອມທັງເຊີນຊວນນັກທ່ອງທ່ຽວ ຕວກກີ ໃຫ້ເຂົ້າມາທ່ອງທ່ຽວ ສປປ ລາວ ໃຫ້ຫຼາຍຂຶ້ນ ໂດຍສະເພາະໃນໂອກາດປີທ່ອງທ່ຽວລາວ 2018 ນີ້. ໃນຕອນທ້າຍ ທ່ານ ທອງລຸນ ສີສຸລິດ ກໍ່ໄດ້ອວຍພອນໃຫ້ ທ່ານລັດຖະມົນຕີ ພ້ອມດ້ວຍຄະນະ ເດີນທາງກັບຄືນປະເທດດ້ວຍຄວາມສະຫວັດດີພາບ. ໃນໂອກາດນີ້, ທ່ານ ເມຣຸດ ຄາວູໂຊລູ ກໍໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ແລະ ເປັນກຽດຢ່າງສູງ ທີ່ໄດ້ເຂົ້າຢ້ຽມຂໍ່ານັບ ທ່ານນາຍົກລັດຖະມົນຕີ. (ຂ່າວ-ພາບ: ກົມຂ່າວ)