ປະທານປະເທດ ອວຍພອນວັນຊາດປາແລັດສະຕິນ


16.11.2018 9:43     

    ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ໄດ້ສົ່ງສານ ອວຍພອນ ເຖິງ ທ່ານ ມາມູດ ອັບບາດ ປະທານາທິບໍດີ ແຫ່ງ ລັດປາແລັດສະຕິນ ປະທານຄະນະກຳມະການອົງການປົດປ່ອຍ ປາແລັດສະຕິນ ເມື່ອວັນທີ 9 ພະຈິກຜ່ານມານີ້ ທີ່ ຣາມາລາ ເນື້ອໃນສານລະບຸວ່າ: ເນື່ອງໃນໂອກາດວັນຊາດ ແຫ່ງ ລັດປາແລັດສະຕິນ ຄົບຮອບ 30 ປີ, ໃນນາມປະຊາຊົນລາວທຸກຖ້ວນໜ້າ ກໍຄືໃນນາມສ່ວນຕົວ, ຂ້າພະເຈົ້າ ມີຄວາມປິຕິຍິນດີເປັນຢ່າງຍິ່ງ ສົ່ງຄຳຊົມເຊີຍອັນອົບອຸ່ນ ແລະ ພອນໄຊອັນປະເສີດມາຍັງ ທ່ານ ແລະ ປະຊາຊົນປາແລັດສະຕິນ ທຸກຖ້ວນໜ້າ. ສາທາລະນະລັດ ປະຊາທິປະໄຕ ປະຊາຊົນລາວ ແລະ ລັດປາແລັດສະຕິນ ມີສາຍພົວພັນມິດຕະພາບ ແລະ ໃຫ້ການສະໜັບສະໜູນຊຶ່ງກັນ ແລະ ກັນ ໃນເວທີພາກພື້ນ ແລະ ສາກົນ ຕະຫຼອດໄລຍະທີ່ຜ່ານມາ. ຂ້າພະເຈົ້າ ເຊື່ອໝັ້ນວ່າ ສາຍພົວພັນທີ່ດີດັ່ງກ່າວນີ້ ຈະສືບຕໍ່ໄດ້ຮັບການເສີມຂະຫຍາຍໃນຊຸມປີຕໍ່ໜ້າ ຊຶ່ງຈະນຳເອົາຜົນປະໂຫຍດ ມາສູ່ປະຊາຊົນສອງຊາດພວກເຮົາ. ຂ້າພະເຈົ້າ ຂໍອວຍພອນໃຫ້ທ່ານ ຈົ່ງມີພະລານາໄມສົມບູນ, ມີຄວາມຜາສຸກ ແລະ ປະຊາຊົນປາແລັດສະຕິນ ຈົ່ງມີຄວາມຈະເລີນວັດທະນາຍິ່ງຂຶ້ນ.