​ປະ​ທານ​ປະ​ເທດ​ເຮົາ ອວຍ​ພອນ​ວັນ​ຊາດ ສະ​ຫະ​ລັດ ອາ​ຣັບ ເອ​ມີ​ເຣດ


30.11.2018 9:27     

   ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ໄດ້ສົ່ງສານອວຍພອນ ເຖິງ ສົມເດັດ ຄາລີຟາ ບິນ ຊາຢິດ ອາລ ນາຢັນ ປະທານາທິບໍດີ ແຫ່ງ ສະຫະລັດອາຣັບ ເອມີເຣດ ທີ່ ອາບູ ດາບີ ເນື້ອໃນສານລະບຸວ່າ: ເນື່ອງໃນໂອກາດວັນຊາດ ແຫ່ງ ສະຫະລັດອາຣັບ ເອມີເຣດ ຄົບຮອບ 47 ປີ, ໃນນາມປະຊາຊົນລາວທຸກຖ້ວນໜ້າ ກໍ່ຄືໃນນາມສ່ວນຕົວ, ຂ້າພະເຈົ້າ ມີຄວາມປິຕິຍິນດີເປັນຢ່າງຍິ່ງ ສົ່ງຄຳຊົມເຊີຍອັນອົບອຸ່ນ ແລະ ພອນໄຊອັນປະເສີດມາຍັງ ສົມເດັດ ແລະ ປະຊາຊົນ ສະຫະລັດອາຣັບ ເອມີເຣດ ທຸກຖ້ວນໜ້າ. ສາທາລະນະລັດ ປະຊາທິປະໄຕ ປະຊາຊົນລາວ ແລະ ສະຫະລັດອາຣັບ ເອມີເຣດ ມີສາຍພົວພັນມິດຕະພາບ, ການຮ່ວມມືທີ່ດີ ແລະ ໃຫ້ການສະໜັບສະໜູນຊຶ່ງກັນແລະກັນ ໃນເວທີພາກພື້ນ ແລະ ສາກົນ ຕະຫຼອດໄລຍະທີ່ຜ່ານມາ. ຂ້າພະເຈົ້າ ເຊື່ອໝັ້ນວ່າ ສາຍພົວພັນມິດຕະພາບ ແລະ ການຮ່ວມມືທີ່ດີດັ່ງກ່າວນີ້ ຈະສືບຕໍ່ໄດ້ຮັບການພັດທະນາໃນຊຸມປີຕໍ່ໜ້າ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດພວກເຮົາ. ຂ້າພະເຈົ້າ ຂໍຖືໂອກາດນີ້ ອວຍພອນໄຊໃຫ້ ສົມເດັດ ຈົ່ງມີພະລານາໄມສົມບູນ, ມີຄວາມຜາສຸກ ແລະ ປະຊາຊົນ ສະຫະລັດ ອາຣັບ ເອມີເຣດ ຈົ່ງສືບຕໍ່ມີຄວາມວັດທະນາຖາວອນ.