ການນຳຂັ້ນສູງ ສປ ຈີນ ອວຍພອນ ວັນຊາດ ສປປ ລາວ


05.12.2018 10:28     

   ສະຫາຍ ສີ ຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດ ແຫ່ງ ສປ ຈີນ ໄດ້ສົ່ງສານອວຍພອນ ເຖິງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ປະທານປະເທດ ແຫ່ງ ສປປ ລາວ ທີ່ນະຄອນຫຼວງວຽງຈັນ ເນື້ອໃນສານມີດັ່ງນີ້: ເນື່ອງໃນໂອກາດ ວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 43 ປີ, ຂ້າພະເຈົ້າ ຂໍຕາງໜ້າໃຫ້ພັກກອມມູນິດຈີນ ແລະ ປະຊາຊົນຈີນ ກໍຄືໃນນາມສ່ວນຕົວ ຂໍສະແດງຄວາມຊົມເຊີຍຢ່າງສຸດອົກສຸດໃຈ ມາຍັງ ສະຫາຍ ແລະ ຜ່ານສະຫາຍ ມາຍັງພັກປະຊາຊົນປະຕິວັດລາວ ແລະ ປະຊາຊົນລາວອ້າຍນ້ອງທຸກຖ້ວນໜ້າ. ໜຶ່ງປີຜ່ານມາ, ສປປ ລາວ ມີສະຖຽນລະພາບທາງດ້ານການເມືອງ, ສັງຄົມມີຄວາມປອງດອງ, ເສດຖະກິດມີການພັດທະນາຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນນັບມື້ນັບດີຂື້ນ. ໃນຖານະເພື່ອນມິດ ແລະ ສະຫາຍ, ຂ້າພະເຈົ້າ ຮູ້ສຶກປິຕິຊົມຊື່ນເປັນຢ່າງຍິ່ງ ແລະ ເຊືື່ອໝັ້ນວ່າ ພາຍໃຕ້ການຊີ້ນຳນຳພາຂອງສູນກາງພັກປະຊາຊົນປະຕິວັດລາວ ໂດຍມີ ສະຫາຍ ເລຂາທິການໃຫຍ່ ບຸນຍັງ ວໍລະຈິດເປັນແກນນຳ ປະຊາຊົນລາວຈະສາມາດບັນລຸເປົ້າໝາຍສູ້ຊົນ ທີ່ກອງປະຊຸມໃຫຍ່ຄັ້ງທີ X ຂອງພັກປະຊາຊົນ ປະຕິວັດລາວໄດ້ວາງອອກ ແລະ ປະສົບຜົນສຳເລັດໃໝ່ທີ່ໃຫຍ່ຫຼວງກວ່າເກົ່າ ໃນພາລະກິດສ້າງສາພັດທະນາປະເທດຊາດ. ໃນປີນີ້, ສາຍພົວພັນຈີນ-ລາວສືບຕໍ່ຮັກສາທ່ວງທ່າພັດທະນາທີ່ດີ, ການແລກປ່ຽນການຢ້ຽມຢາມລະຫວ່າງຜູ້ນຳຂັ້ນສູງນຳກັນເປັນປົກກະຕິ, ຍຸດທະສາດການເຊື່ອມໂຍງເຊື່ອມຈອດ ລະຫວ່າງ ຈີນ-ລາວມີຄວາມຄືບໜ້າຕາມແຜນການ, ການຮ່ວມມືໃນໂຄງການໃຫຍ່ດຳເນີນໄປດ້ວຍດີ, ການໄປມາຫາສູ່ກັນ ແລະ ການແລກປ່ຽນທາງດ້ານວັດທະນະທຳເຂົ້າສູ່ລວງເລິກຢ່າງບໍ່ຢຸດຢັ້ງ ອັນໄດ້ນຳເອົາຜົນປະໂຫຍດຕົວຈິງມາສູ່ສອງປະເທດ ແລະ ປະຊາຊົນສອງຊາດຈີນ ແລະ ລາວ. ຂ້າພະເຈົ້າ ໃຫ້ຄວາມສຳຄັນສູງຕໍ່ການພັດທະນາສາຍພົວພັນມິດຕະພາບຈີນ-ລາວ, ຍິນດີພະຍາຍາມຮ່ວມກັບສະຫາຍ ເພື່ອຮ່ວມກັນຊຸກຍູ້ການສ້າງຄູ່ຮ່ວມຊາຕາກຳຈີນ-ລາວ ທີ່ມີຄວາມໝາຍຍຸດທະສາດ. ຂໍອວຍພອນໃຫ້ ສປປ ລາວ ຈົ່ງມີຄວາມຈະເລີນຮຸ່ງເຮືອງ, ປະຊາຊົນມີຄວາມຜາສຸກ. ຂໍອວຍພອນໃຫ້ສາຍພົວພັນຄູ່ຮ່ວມມືຍຸດທະສາດຮອບດ້ານ ລະຫວ່າງ ຈີນ-ລາວ ຈົ່ງມີຄວາມໝັ້ນຄົງ ແລະ ພັດທະນາຍິ່ງໆຂື້ນຢ່າງບໍ່ຢຸດຢັ້ງ. ໃນໂອກາດດັ່ງກ່າວນີ້ ສະຫາຍ ຫຼີ ເຄີ້ສຽງ ນາຍົກ ລັດຖະມົນຕີ ແຫ່ງ ສປ ຈີນ, ສະຫາຍ ຫຼີ້ ຈັ້ນສູ່ ປະທານຄະນະກຳມະການປະຈຳ ສະພາຜູ້ແທນປະຊາຊົນທົວປະເທດ ແຫ່ງ ສປ ຈີນ ແລະ ສະຫາຍ ຫວັງ ອີ້ ທີ່ປຶກສາແຫ່ງລັດ, ລັດຖະມົນຕີກະຊວງການຕ່າງປະເທດ ແຫ່ງ ສປ ຈີນ ກໍໄດ້ສົ່ງສານອວຍພອນ ເຖິງ ສະຫາຍ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ, ສະຫາຍ ນາງປານີ ຢາທໍ່ຕູ້ ປະທານສະພາແຫ່ງຊາດ ແຫ່ງ ສປປ ລາວ ແລະ ສະຫາຍ ສະເຫຼີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ຕາມລຳດັບ ເຊັ່ນດຽວກັນ.