ກອງປະຊຸມໂຕະມົນ ປະຈຳປີ ຫາລື ເພື່ອການພັດທະນາ


...

06.12.2018 10:00     

   ກອງປະຊຸມໂຕະມົນປະ ຈຳປີ 2018 ເພື່ອສະຫຼຸບກາງສະໄໝການຈັດຕັ້ງປະຕິບັດແຜນພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ VIII ຄວາມຄືບໜ້າໃນການຈັດຕັ້ງປະຕິບັດເປົ້າໝາຍການພັດ ທະນາແບບຍືນຍົງ ແລະ ວຽກງານການຮ່ວມມືເພື່ອການພັດ ທະນາ ທີ່ມີປະສິດທິຜົນໄດ້ຈັດຂຶ້ນໃນວັນທີ 5 ທັນວາ ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ໂດຍການເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ທ່ານ ນາງ ວາເລີຣິ ຄລິຟ ຮອງຜູ້ອຳນວຍການຮັບຜິດຊອບພາກພື້ນອາຊີປາຊີຟີກອົງການສະຫະປະຊາຊາດເພື່ອການ ພັດທະນາ, ພ້ອມດ້ວຍພາກ ສ່ວນທີ່ກ່ຽວຂ້ອງເຂົ້າຮ່ວມ. ໃນພິທີ ທ່ານ ສົມດີ ດວງດີ ໄດ້ກ່າວບາງຕອນສຳຄັນ ໃຫ້ຮູ້ວ່າ: ກອງປະຊຸມຄັ້ງນີ້ໄດ້ຮັບຟັງການລາຍງານຜົນຂອງການທົບທວນກາງສະໄໝຂອງການຈັດຕັ້ງປະຕິບັດແຜນພັດທະນາເສດຖະກິດສັງຄົມແຫ່ງຊາດຄັ້ງທີ VIII ແລະ ສຸມໃສ່ການປຶກສາຫາລືໃນຮູບແບບກຸ່ມສົນທະນາຊຶ່ງມີ 4 ຂົງເຂດຄື: 1) ແຜນພັດທະນາເສດຖະກິດສັງຄົມ 5 ປີຄັ້ງທີ VIII ດ້ານເສດຖະກິດ. 2) ແຜນພັດທະນາເສດຖະກິດສັງຄົມ 5 ປີຄັ້ງທີ VIII ດ້ານການພັດທະນາຊັບພະຍາກອນມະນຸດ ແລະ ສັງຄົມ. 3) ແຜນພັດທະນາເສດຖະກິດສັງຄົມ 5 ປີຄັ້ງທີ VIII ດ້ານການພັດທະນາຊັບພະຍາກອນທຳມະຊາດ ແລະ ສິ່ງແວດລ້ອມກຽມພ້ອມຮັບມືກັບໄພພິບັດທຳມະຊາດ ແລະ ການປ່ຽນແປງດິນຟ້າອາກາດ. 4) ດ້ານວຽກງານຈຸດສຸມປິ່ນອ້ອມທີ່ຕິດພັນກັບຫຼາຍຂະແໜງການຂອງແຜນພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ VIII. ທ່ານໄດ້ກ່າວໃຫ້ຮູ້ອີກວ່າ: ໃນປີ 2018 ສປປ ລາວໄດ້ຮັບຜົນກະທົບຈາກໄພພິບັດທຳມະຊາດຢ່າງຮ້າຍແຮງ, ເຮັດໃຫ້ນ້ຳຖ້ວມສົ່ງຜົນກະທົບໂດຍກົງເຖິງ 16 ແຂວງ, ນອກຈາກນີ້ຢູ່ເມືອງສະໜາມໄຊ, ແຂວງອັດຕະປືກໍ່ຍັງຖືກກະທົບຈາກເຂື່ອນສຳຮອງ ຫຼື ຄູກັ້ນນຳ້ໂຄງການເຂື່ອນໄຟຟ້າເຊປຽນເຊນໍ້ານ້ອຍແຕກຕາມບົດປະເມີນຄວາມຕ້ອງການຫຼັງໄພພິບັດຜົນເສຍຫາຍເບື້ອງຕົ້ນແມ່ນຫຼາຍກວ່າ 3.166 ຕື້ກີບ, ເຖິງວ່າຈະໄດ້ຮັບຜົນກະທົບໄພພິບັດທຳມະຊາດໃນຂອບເຂດທົ່ວປະເທດ ແຕ່ພວກເຮົາຍັງຮັກສາອັດຕາການເພີ່ມຂຶ້ນຂອງ GDP ຢູ່ໃນລະດັບ 6,5% ຊຶ່ງເປັນລະດັບທີ່ສູງສົມຄວນ. ສຳລັບການຈັດຕັ້ງປະ ຕິບັດນະໂຍບາຍການພັດທະ ນາສີຂຽວກອງປະຊຸມຄັ້ງນີ້ໄດ້ຊຸກຍູ້ໃຫ້ມີການຫຼຸດຜ່ອນການນຳໃຊ້ພລາສຕິກ ແລະ ເຈ້ຍ ຊຶ່ງຜູ້ເຂົ້າຮ່ວມຈະໄດ້ຮັບຈອກນໍ້າ ແລະ ກວດນໍ້າດື່ມທີ່ສາມາດນຳໃຊ້ຄືນໄດ້ ແລະ ຈະຫຼຸດຜ່ອນການພິມເອກະສານລົງ. (ຂ່າວພາບ : ສຸກສາຄອນ)