ຄະນະຜູ້ແທນ ເວເນຊູເອລາ ຢ້ຽມຢາມລາວ


...

06.12.2018 10:01     

   ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດໄດ້ຕ້ອນຮັບທ່ານ ຣູເບັນ ດາຣີໂອ ໂມລີນາ ຮອງລັດ ຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ໂບລີວາຣຽນ ເວເນຊູເອລາ, ຜູ້ຊີ້ນຳວຽກງານຂົງເຂດອາຊີ, ຕາເວັນອອກກາງ ແລະ ໂອເຊອານີ, ໃນໂອກາດທີ່ທ່ານພ້ອມຄະນະໄດ້ເດີນທາງມາຢ້ຽມຢາມ ສປປ ລາວ ແຕ່ວັນມີ 45 ທັນວານີ້. ໃນໂອກາດດັ່ງກ່າວ ທ່ານສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການເດີນ ທາງມາຢ້ຽມຢາມລາວ ຂອງທ່ານຮອງລັດຖະມົນຕີ ພ້ອມດ້ວຍຄະນະໃນຄັ້ງນີ້ ແລະ ໄດ້ສະແດງຄວາມຊົມເຊີຍຕໍ່ຜົນສຳເລັດໃນການຈັດກອງປະຊຸມ ປຶກສາຫາລືທາງດ້ານການເມືອງລາວເວເນຊູເອລາຄັ້ງປະຖົມມະລືກ ແນໃສ່ຊອກຫາຊ່ອງທາງເພື່ອເສີມ ຂະຫຍາຍສາຍພົວພັນມິດ ຕະພາບ ແລະ ການຮ່ວມມືລະຫວ່າງສອງກະຊວງການຕ່າງປະເທດໃຫ້ນັບມື້ນັບເຂັ້ມແຂງແຕກດອກອອກຜົນຍິ່ງໆຂຶ້ນ. ໃນໂອກາດນີ້ທ່ານຮອງລັດຖະມົນຕີກະຊວງການຕ່າງປະເທດເວເນຊູເອລາໄດ້ ສົ່ງຄຳເຊື້ອເຊີນຂອງທ່ານລັດ ຖະມົນຕີ ເວເນຊູເອລາໃຫ້ທ່ານ ລັດຖະມົນຕີກະຊວງການຕ່າງ ປະເທດແຫ່ງ ສປປ ລາວ ໄປຢ້ຽມຢາມເວເນຊູເອລາຕາມເວ ລາທີ່ເໝາະສົມ. ໃນຕອນເຊົ້າຂອງວັນດຽວກັນນີ້ ທີ່ກະຊວງການຕ່າງປະເທດ ໄດ້ຈັດກອງປະຊຸມປຶກສາຫາລືທາງດ້ານການເມືອງ ລະຫວ່າງລາວ ແລະ ເວເນຊູເອລາຄັ້ງປະຖົມມະລືກ ພາຍໃຕ້ການເປັນປະທານຮ່ວມຂອງທ່ານ ແສງເພັດ ຮຸ່ງບຸນຍວງ ຮອງລັດຖະມົນຕີກະຊວງການຕ່າງປະເທດ ສປປ ລາວ ແລະ ທ່ານ ຣູເບັນ ດາຣີໂອ ໂມຣິນາ. ກອງປະຊຸມດັ່ງກ່າວ, ສອງຝ່າຍໄດ້ມີການແລກປ່ຽນຄຳຄິດຄຳເຫັນນຳກັນກ່ຽວກັບສະພາບການພັດທະນາເສດຖະກິດສັງຄົມທີ່ພົ້ນເດັ່ນຂອງປະເທດຕົນໃຫ້ກັນຊາບ. ພ້ອມກັນນັ້ນສອງຝ່າຍຍັງໄດ້ປຶກສາຫາລືທິດທາງເສີມຂະຫຍາຍສາຍພົວພັນຮ່ວມມືລະຫວ່າງສອງປະເທດໃນອະນາຄົດ, ລວມທັງບັນຫາພາກພື້ນ ແລະ ສາກົນ ທີ່ຕ່າງຝ່າຍມີຄວາມສົນໃຈນຳກັນ. (ຂ່າວພາບ: ກະຊວງການຕ່າງປະເທດ)