ກອງປະຊຸມພົບປະຜູ້ຊົງຄຸນວຸດທິບັນດາຊົນເຜົ່າທົ່ວປະເທດ ຄັ້ງທີ III ຈະຈັດຂຶ້ນໃນໄວໆນີ້


...

06.12.2018 10:09     

   ທ່ານນາງ ຄຳຈັນ ພົມແສງສະຫວັນ ຮອງປະທານສູນກາງແນວລາວສ້າງຊາດ (ສນຊ) ໄດ້ໃຫ້ກຽດຖະແຫຼງຂ່າວການຈັດກອງປະຊຸມພົບປະຜູ້ຊົງຄຸນວຸດທິບັນດາຊົນເຜົ່າທົ່ວປະເທດຄັ້ງທີ III ປີ 2018 ເມື່ອວັນທີ 5 ທັນວານີ້, ທີ່ສູນກາງແນວລາວສ້າງຊາດ, ທ່ານກ່າວວ່າ: ຄະນະເລຂາທິການສູນກາງພັກໄດ້ມີມະຕິຕົກລົງ ສະບັບເລກທີ 60/ຄລສພ, ລົງວັນທີ 6 ມິຖຸນາ 2018 ວ່າດ້ວຍການອະນຸມັດຈັດຕັ້ງກອງປະຊຸມພົບປະຜູ້ຊົງຄຸນວຸດທິບັນດາຊົນເຜົ່າທົ່ວປະເທດໃນປີ 2018ທີ່ນະຄອນຫຼວງວຽງຈັນ ໂດຍມອບໃຫ້ສູນກາງແນວລາວສ້າງຊາດຮ່ວມກັບຄະນະຊີ້ ນໍາລະດັບຊາດ ເປັນເຈົ້າການ ຈັດຕັ້ງກອງປະຊຸມພົບປະຜູ້ຊົງຄຸນວຸດທິບັນດາຊົນເຜົ່າທົ່ວປະເທດ ຄັ້ງທີ III ຕາມແຜນການ ແລະ ໄດ້ມີການແຈ້ງຂ່າວໃນເບື້ອງຕົ້ນກອງປະຊຸມຈະຈັດໃສ່ວັນທີ 13 ສິງຫາ 2018 ທີ່ຜ່ານມາ ແຕ່ເນື່ອງຈາກສະພາບດິນຟ້າອາກາດບໍ່ອໍານວຍມີເຫດການທີ່ບໍ່ເພີ່ງປາຖະໜາໄດ້ເກີດຂຶ້ນໃນທ້າຍເດືອນກໍລະກົດ 2018 ທີ່ເມືອງສະໜາມໄຊ ແຂວງອັດຕະປື. ດັ່ງນັ້ນ, ກອງປະຊຸມພົບປະຜູ້ຊົງຄຸນວຸດທິບັນດາຊົນເຜົ່າທົ່ວປະເທດ ຄັ້ງທີ III ປີ 2018 ຈະໄດ້ຈັດຂຶ້ນ ໃນວັນທີ 13 ທັນວາ 2018 ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ. ທ່ານ ນາງ ຄຳຈັນ ພົມແສງສະຫວັນ ກ່າວໃຫ້ຮູ້ອີກວ່າ: ຈຸດປະສົງຂອງກອງປະຊຸມຄັ້ງນີ້ ເພື່ອເປັນການສ້າງຄວາມຮັບຮູ້ເຂົ້າໃຈໃຫ້ ສະມາຊິກພັກພະນັກງານກໍຄືຜູ້ຊົງຄຸນວຸດທິບັນດາຊົນ ເຜົ່າໃນທົ່ວປະເທດເຫັນໄດ້ແນວທາງນະໂຍບາຍຂອງພັກລັດຕໍ່ວຽກງານດັ່ງກ່າວເພື່ອຍົກສູງບົດບາດ,ເສີມຂະຫຍາຍມູນເຊື້ອສິດເປັນເຈົ້າຂອງຜູ້ຊົງຄຸນວຸດທິບັນດາເຜົ່າໃນການປະກອບສ່ວນສຶກສາອົບຮົມເຕົ້າໂຮມຄວາມສາມັກຄີປອງດອງປວງຊົນລາວທັງຊາດ,ປຸກລະດົມກໍາລັງແຮງເຂົ້າຮ່ວມສ້າງສາພັດທະນາປະເທດຊາດພາຍໃຕ້ການນໍາພາຂອງພັກປະຊາຊົນປະຕິວັດລາວ, ສ້າງເງື່ອນໄຂໃຫ້ຜູ້ຊົງຄຸນວຸດທິໄດ້ພົບປະແລກປ່ຽນບົດຮຽນນໍາກັນ. ກອງປະຊຸມຄັ້ງນີ້, ຈະມີຕົວແທນຜູ້ຊົງວຸດທິບັນດາເຜົ່າ 49 ຊົນເຜົ່າໃນທົ່ວປະເທດເຂົ້າຮ່ວມທັງໝົດ 500 ກ່ວາທ່ານ. ຊຶ່ງມາຈາກບັນດາແຂວງນະຄອນຫຼວງ, ຈາກກະຊວງອົງການອ້ອມຂ້າງສູນກາງ, ຕົວແທນຄົນເຊື້ອຊາດລາວຢູ່ຕ່າງປະເທດລວມເຖິງອະດີດການນໍາຈາກຂະແໜງການທັງສູນກາງແລະທ້ອງຖີ່ນເຂົ້າຮ່ວມ. ກອງປະຊຸມຈະໄດ້ສະຫຼຸບຕີລາຄາການຈັດຕັ້ງປະຕິບັດຜົນກອງປະຊຸມພົບປະຜູ້ຊົງຄຸນວຸດທິບັນດາເຜົ່າທົ່ວປະເທດຄັ້ງທີII(ແຕ່ປີ 20152018 );ຮັບຟັງບົດປະກອບຄໍາເຫັນຈາກຕາງໜ້າຂະແໜງການຢູ່ຂັ້ນສູນກາງ ແລະ ທ້ອງຖີ່ນຈໍານວນໜຶ່ງ, ບົດຮຽນຕົວແບບດີເດັ່ນໃນການສ້າງເສດຖະກິດຄອບຄົວ, ການພັດທະນາຂອງບາງຊົນເຜົ່າ ແລະ ບົດປະກອບຄໍາເຫັນຂອງຜູ້ຕາງໜ້າຄົນເຊື້ອຊາດລາວຢູ່ຕ່າງປະເທດ. ( ຂ່າວ: ພູວັນ , ພາບ: ຍຸພິນທອງ )