ການນຳຂັ້ນສູງ ສປປ ເກົາຫຼີ ອວຍພອນ ວັນຊາດ ສປປ ລາວ


06.12.2018 9:55     

   ສະຫາຍ ກິມ ເຈິງ ອຸນ ປະທານພັກແຮງງານເກົາຫຼີ ປະທານຄະນະກຳມາທິການກິດຈະການແຫ່ງລັດ ແຫ່ງ ສາ ທາລະນະລັດ ປະຊາຊົນ ປະຊາທິປະໄຕ ເກົາຫຼີ, ຜູ້ບັນຊາການສູງສຸດຂອງ ກອງທັບປະຊາຊົນເກົາຫຼີ ໄດ້ສົ່ງສານອວຍພອນເຖິງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ ຜ່ານມາ ທີ່ນະຄອນຫຼວງວຽງຈັນ ເນື້ອໃນສານລະບຸວ່າ:ເນື່ອງໃນໂອກາດ ວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 43 ປີ, ຂ້າພະເຈົ້າ ຂໍສົ່ງຄຳຊົມເຊີຍອັນອົບອຸ່ນ ມາຍັງສະຫາຍ ແລະ ໂດຍຜ່ານສະຫາຍໄປຍັງພັກ, ລັດຖະບານ ແລະ ປະຊາຊົນລາວ ທີ່ເປັນໄມຕີຈິດມິດຕະພາບ. ຕະຫຼອດໄລຍະ 43 ປີ ທີ່ຜ່ານມາ, ພາຍໃຕ້ການຊີ້ນຳນຳພາ ອັນຖືກຕ້ອງ ຂອງພັກປະຊາຊົນປະຕິວັດລາວ, ລັດຖະບານ ແລະ ປະຊາຊົນລາວ ໄດ້ບັນລຸຜົນສຳເລັດ ອັນໃຫຍ່ຫຼວງ ໃນພາລະກິດປົກປັກຮັກສາອຸດົມການສັງຄົມນິຍົມ ແລະ ສ້າງລະບອບປະຊາທິປະໄຕ ປະຊາຊົນ ໃຫ້ແໜ້ນແຟ້ນຂຶ້ນ ແລະ ພາລະກິດພັດທະນາ ປະເທດຊາດໂດຍເອກະລາດ ແລະ ສ້າງສາປະເທດຊາດໃຫ້ມີຄວາມຈະເລີນວັດທະນາຖາວອນ. ຂ້າພະເຈົ້າເຊື່ອໝັ້ນວ່າ ສາຍພົວພັນ ມິດຕະພາບ ແລະ ການຮ່ວມມື ອັນເປັນມູນເຊື້ອ ລະຫວ່າງ ສອງພັກສອງລັດ ແລະ ປະຊາຊົນສອງປະເທດຂອງພວກເຮົາ ຊຶ່ງບັນດາອະດີດຜູ້ນຳໄດ້ສ້າງຕັ້ງຂຶ້ນ ຈະສືບຕໍ່ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ ໂດຍຄວາມພະຍາຍາມຮ່ວມກັນ ແລະ ຂໍອວຍພອນໄຊຢ່າງສຸດອົກສຸດໃຈ ໃຫ້ ສະຫາຍ ຈົ່ງມີສຸຂະພາບແຂງແຮງ, ມີຄວາມຜາສຸກ ແລະ ປະສົບຜົນສຳເລັດອັນຍິ່ງໃຫຍ່ກວ່າເກົ່າ ໃນພາລະໜ້າທີ່ຮັບຜິດຊອບ ຂອງສະຫາຍ. ໃນໂອກາດດັ່ງກ່າວນີ້ ສະຫາຍ ປາກ ບົງ ຈູ ນາຍົກລັດຖະ ມົນຕີ ແຫ່ງ ສປປ ເກົາຫຼີ ກໍໄດ້ສົ່ງສານອວຍພອນ ເຖິງ ສະຫາຍ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ແລະ ສະຫາຍ ຣີ ຢອງ ໂຮ ລັດຖະມົນຕີ ກະຊວງການຕ່າງປະເທດແຫ່ງ ສປປ ເກົາຫຼີ ກໍໄດ້ສົ່ງສານອວຍພອນ ເຖິງ ສະຫາຍ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດເຊັ່ນດຽວກັນ.