ປະທານ ສນຊ ເຄື່ອນໄຫວຢ້ຽມຢາມອະນຸສອນສະຖານຢູ່ເມືອງວຽງໄຊ


...

07.12.2018 9:30     

   ເນື່ອງໃນໂອກາດ ເດີນທາງເຂົ້າຮ່ວມງານສະເຫຼີມສະຫຼອງວັນ ສ້າງຕັ້ງເມືອງວຽງໄຊຖານທີ່ໝັ້ນ ຂອງການປະຕິວັດລາວ ຄົບ ຮອບ 50 ປີ (30 ພະຈິກ 1968 30 ພະຈິກ 2018). ໃນທ້າຍເດືອນພະຈິກຜ່ານມານີ້, ທ່ານ ໄຊສົມພອນ ພົມວິຫານ ກຳມະ ການກົມການເມືອງສູນກາງພັກ ປະທານສູນກາງແນວລາວສ້າງຊາດ (ສນຊ) ພ້ອມດ້ວຍຄະນະໄດ້ເຄື່ອນໄຫວຢ້ຽມຊົມອະນຸສອນສະຖານ ທ່ານປະທານ ໄກສອນ ພົມວິຫານ ຊຶ່ງເປັນສະຖານທີ່ພັກເຊົາຂອງ ທ່ານປະທານ ໄກສອນ ພົມວິຫານ ເພື່ອຊີ້ນຳນຳພາ ການປະຕິວັດ ລາວ ໃນສະໄໝຕໍ່ສູ້ກູ້ຊາດຕ້ານກັບຈັກກະພັດຜູ້ຮຸກຮານທັງແບບເກົ່າ ແລະ ແບບໃໝ່.
    ໂອກາດນີ້, ທ່ານປະທານ ສນຊ ພ້ອມຄະນະໄດ້ມອບເງິນຈຳ ນວນ 5 ລ້ານກີບ ໃຫ້ຄະນະຮັບ ຜິດຊອບອະນຸສອນສະຖານ ເພື່ອເປັນການປະກອບສ່ວນໃນການປົກປັກຮັກສາ, ບູລະນະອານຸສອນສະຖານດັ່ງກ່າວ ແລະ ຮັກສາໄດ້ບັນດາຮ່ອງຮອຍທາງປະຫວັດສາດ ທີ່ມີຄວາມໝາຍສຳຄັນ ເພື່ອຮອງຮັບບັນດາແຂກ, ນັກທ່ອງທ່ຽວທັງພາຍໃນ ແລະ ຕ່າງປະເທດໄດ້ມາທ່ອງທ່ຽວທັດສະນະສຶກສາ ແລະ ຢ້ຽມຊົມ.
ໃນວັນດຽວກັນ, ທ່ານປະ ທານ ສນຊ ໄດ້ຢ້ຽມຊົມອະນຸສອນສະຖານ ຫ້ອງວ່າການສູນກາງ ແນວລາວຮັກຊາດ ຊຶ່ງປະກອບມີ ຫ້ອງມູນເຊື້ອທີ່ໄດ້ວາງສະແດງຮູບພາບການ ເຄື່ອນໄຫວຈຳນວນໜຶ່ງຂອງແນວລາວອິດສະຫຼະ (19501956), ແນວລາວຮັກຊາດ (19561979) ແລະ ແນວລາວ ສ້າງຊາດ (1979ປັດຈຸບັນ); ໃນນີ້, ໄດ້ມີການວາງສະແດງຮູບພາບຂອງແນວລາວສ້າງຊາດ ແຂວງຫົວພັນ, ແນວລາວສ້າງຊາດເມືອງວຽງໄຊ, ຮູບພາບ 9 ຊົນເຜົ່າ ທີ່ມີພາຍໃນແຂວງຫົວພັນ ແລະ ວັດຖຸພັນ ອີກຈຳນວນໜຶ່ງ. ຈາກນັ້ນ, ຄະ ນະໄດ້ໄປຢ້ຽມຊົມອະນຸສອນສະຖານ (ຖ້ຳ) ຫ້ອງວ່າການສູນກາງແນວລາວຮັກຊາດ ຊຶ່ງເປັນບ່ອນເຮັດວຽກ ແລະ ພັກເຊົາ ຂອງພະນັກງານແນວລາວຮັກຊາດ ໃນສະໄໝຕໍ່ສູ້ກູ້ຊາດເມື່ອກ່ອນຕື່ມອີກ.
(ຂ່າວ: ຈິດຕະພົງ)